Ate Jahwe tuhu-tuhu tandaindu min Ia. Engkai? Sebap adi reh buena tehndu kerna sipat-sipatNa, caraNa erurusen ras manusia, ras kai si arapkenNa arah kam, banci reh merhatna kam jadi temanNa. Tapi, mungkin nge kapndu kam banci jadi teman Dibata? (Baca Masmur 25:14.) Kai si perlu lakokenndu gelah banci kam jadi teman Dibata? Bas Pustaka si Badia lit jawapenna. Bas Pustaka si Badia pe ikataken kai alasenna maka Jahwe me Teman si mehulina si banci sidatken.

1. Undangen kai si bereken Jahwe man bandu?

Nina Pustaka si Badia, “Rembakkenlah diri kena ku Dibata, emaka rembakkenNa ka diriNa man kena.” (Jakup 4:8) Kai maksudna? Undang Jahwe kam jadi temanNa. Lit si erpengakap maka ia labo banci jadi teman Dibata perban Dibata la banci siidah. Tapi arah Pustaka si Badia, kataken Jahwe uga sipat-sipatNa gelah banci kita ndeher ras Ia. Emaka adi sibaca kata-kata Jahwe bas Pustaka si Badia, banci kita erteman ras Jahwe amin pe la banci siidah Ia.

2. Engkai maka Jahwe me Teman si mehulina?

Keleng kel ate Jahwe kam, lebihen asangken ise pe. AteNa, meriah min ukurndu ndalani kegeluhenndu. Janah ertoto min kam man baNa katawari pe kam perlu penampat. Nina Pustaka si Badia, “Benterkenlah kerina kekuatiren kena man Dibata, sebap perdiatekenNa kap kena.” (1 Petrus 5:7) Katawari pe, banci janah nggit Jahwe nampati, mpegegehi, ras megiken teman-temanNa.​—Baca Masmur 94:18, 19.

3. Kalak si uga nge si banci jadi teman Jahwe?

Keleng ate Jahwe kerina kalak, “tapi kompak Ia erteman ras kalak si bujur.” (Kuan-kuanen 3:32) Ate Jahwe teman-temanNa ngelakoken kai si mehuli janah la nggit ngelakoken kai si la mehuli. Lit piga-piga si erpengakap maka la mungkin silakoken kerina si pindo Jahwe janah la mungkin sipedauh kerina si la ngena ate Jahwe. Tapi erpengangka kel Jahwe, ise pe si tuhu-tuhu engkelengi Ia janah erusaha erban meriah ukurNa, alokenNa jadi temanNa.​—Masmur 147:11; Perbahanen Rasul-Rasul 10:34, 35.

 PELAJARI TERBAGESEN

4. Teman Jahwe kap Abraham

Bas Pustaka si Badia lit ceritakenna kerna Abraham (Abram). Arah cerita e banci siteh kalak si uga kin si banci jadi teman Dibata. Bacalah kerna Abraham bas Kejadin 12:1-4. Kenca si e bahas penungkunen-penungkunen enda:

• Kai si perentahken Jahwe man Abraham?

• Kai janji Jahwe man bana?

• Kai si lakoken Abraham kenca begina perentah Jahwe?

5. Si arapken Jahwe arah temanNa

Biasa nge adi lit siarapken arah temanta.

• Kai nge si arapkenndu arah temanndu?

Bacalah 1 Johanes 5:3, kenca si e bahas penungkunen enda:

• Kai si arapken Jahwe ilakoken teman-temanNa?

Gelah banci patuh man Jahwe, banci jadi perlu siubah perbahanenta ntah pe sipat-sipatta. Bacalah Jesaya 48:17, 18, kenca si e bahas penungkunen enda:

• Engkai maka pindo Jahwe temanNa erban perubahen?

 6. Si lakoken Jahwe man teman-temanNa

 KESIMPULEN PELAJAREN ENDA

Jahwe merhat jadi Temanndu, janah pasti sampatiNa kam gelah banci erteman ras Ia.

Kai si Enggo Sipelajari?

• Uga cara Jahwe nampati teman-temanNa?

• Engkai maka suruh Jahwe teman-temanNa erban perubahen bas perbahanen ras sipat-sipatna?

• Adi menurutndu mesera nge jadi teman Jahwe? Engkai maka bage nindu?