PELAJAREN 09

Ertoto Erban Kam Reh Deherna ras Dibata

MAINKEN

Pernah nge gejapkenndu perlu kam pedah-pedah bas geluhndu? Merhat nge kam dat penampat i bas ndungi masalahndu? Perlu nge kam ipegegehi? Merhat nge kam reh deherna ras Jahwe? Ertoto banci nampati kam ndatken si e kerina. Tapi, uga nge cara ertoto si benar? Begiken Dibata nge kerina pertoton? Kai si arus lakokenndu gelah totondu ibegiken Dibata? Mari sibahas.

1. Man ise kita arus ertoto, janah kai si banci sitotoken?

Ajari Jesus gelah kita ertoto man Bapakta si i surga saja. Jesus pe ertoto man Bapakta si i surga eme Jahwe. Nina, “Bagendalah kena ertoto: ‘O Bapak kami si i surga . . .’” (Matius 6:9) Adi ertoto kita man Jahwe, reh deherna kita ras Ia.

Kai saja si banci sitotoken? Nina Pustaka si Badia, “Kai pe sipindo man [Dibata] adi sesuai ras peratenNa, begikenNa kita.” (1 Johanes 5:14) Jadi, pasti jawap Jahwe pertotonta, adi sesuai ras peratenNa. Bas Pustaka si Badia, kataken Jesus kai saja si perlu sitotoken. (Baca Matius 6:9-13.) Banci sitotoken kerna keperlunta, tapi ula kita lupa ngata bujur man Dibata man kerina si enggo lakokenNa, janah perlu ka sitotoken kalak si deban.

2. Uga arusna kita ertoto?

Nina Pustaka si Badia, “Turiken isi pusuh kena man [Dibata].” (Masmur 62:8) Emaka sanga kita ertoto, arus arah pusuh nari. Banci kita ertoto alu ersora ntah pe bas pusuh saja. Banci ka kita ertoto katawari pe ras i japa pe. Selain si e, labo pindo Jahwe arus kita ertoto alu sujud, kundul, ntah cinder. Si pentingna, arus kita mehamat sanga ertoto man baNa.

3. Uga cara Dibata njawap totota?

Jawap Jahwe totota alu erbage cara. Salah sada carana eme arah Pustaka si Badia. I je banci sidat jawapen arah penungkunen-penungkunenta. Mbaca Pustaka si Badia banci “erban kalak si la lit pengalamenna jadi pentar.” (Masmur 19:7; baca Jakup 1:5.) Dibata banci erban pusuh ras perukurenta dame amin pe lit masalah. Janah banci banNa tersuruh ukur umatNa nampati kita sanga perlu kita penampat.

PELAJARI TERBAGESEN

Sibahas kari uga carana gelah totondu si pesehndu arah pusuh nari banci erban meriah ukur Dibata. Selain si e, sibahas ka kari kai gunana man bandu adi ertoto kam.

4. Kai si arus silakoken gelah begiken Dibata pertotonta?

Kai si erban totota begiken Dibata ntah lang? Putar VIDEO.

VIDEO: Kerina nge Pertoton Ibegiken Dibata?—Cupliken (2:42)

Ate Jahwe, ertoto kita man baNa. Bacalah Masmur 65:2, kenca si e bahas penungkunen-penungkunen enda:

Adi menurutndu, merhat nge Dibata “Si Megiken toto” gelah ertoto kam man baNa? Engkai maka bage nindu?

Totota arus sesuai ras standar Dibata gelah ibegikenNa. Bacalah Miha 3:4 ras 1 Petrus 3:12, kenca si e bahas penungkunen enda:

Uga carana gelah begiken Jahwe totota?

Sanga terjadi perang, duana pihak si erperang e ertoto gelah banci menang. Mungkin nge begiken Dibata toto kalak e?

5. Ertoto arus arah pusuh nari

Lit kalak si ulih-ulihina kata-kata si seri sanga ia ertoto, sebap bage si enggo iajarken man bana. Tapi bage kin ate Dibata kita ertoto? Bacalah Matius 6:7, kenca si e bahas penungkunen enda:

Uga carana gelah ula ‘ulih-ulihindu kata-kata si seri’ tiap kam ertoto?

Tiap wari, ukurilah silang-langna sada pasu-pasu si alokenndu bas wari e. Kenca si e, ngata bujurlah kam man Jahwe. Adi lakokenndu e tiap wari bas sada minggu, enggo totokenndu pitu topik si berbeda, janah la e saja lalap si totokenndu.

Sekalak bapak si mehuli, atena anakna ngerana man bana arah pusuh nari. Jahwe pe, arah pusuhta nari min ateNa kita ertoto man baNa.

6. Pertoton eme pemere si meherga arah Dibata

Uga toto mpegegehi kita sanga lit situasi si sulit? Putar VIDEO.

VIDEO: Ngasup Kami Ngadapisa Perban Ertoto (1:32)

Bas Pustaka si Badia lit janji maka adi ertoto kita banci kita tenang. Bacalah Pilipi 4:6, 7, kenca si e bahas penungkunen-penungkunen enda:

Mon-mon, enggo pe kita ertoto lit denga masalahta, jadi uga toto banci nampati kita?
Kai saja si atendu totokenndu?

Tehndu nge?

Kata “amin” ertina “jadilah bage” ntah “pasti.” Mulai jaman Pustaka si Badia nari, kata “amin” ibelasken bas pendungi toto. —1 Kronika 16:36.

7. Ula lupa ertoto

Mon-mon banci saja sibuk kel kita, dungna lupa kita ertoto. Menurut Jesus, uga nge pentingna ertoto? Bacalah Matius 14:23 ras Markus 1:35, kenca si e bahas penungkunen-penungkunen enda:

Kai si lakoken Jesus gelah lit waktuna guna ertoto?
Ndigan nge waktu si cocok akapndu ertoto?

LIT SI NGATAKEN: “Sia-sia nge ertoto, labo begiken Dibata totota.”

Uga nge nindu njawapsa?

KESIMPULEN PELAJAREN ENDA

Adi ertoto kita arah pusuhta nari, banci kita reh deherna ras Dibata, banci dame pusuh ras perukurenta janah ngasup kita ngelakoken kai si ngena ate Jahwe.