PELAJAREN 11

Carana Gelah Pembacan Pustaka si Badiata Lebih Erguna

MAINKEN

Pernah nge reh kisatndu ngelakoken sada dahin perban mesera ndahikenca? Banci jadi gelah ula kapndu meserasa, sitik-sitik lebe dahikenndu. Erlajar Pustaka si Badia pe bage, banci jadi la tehndu janari banci mulaindu. Bas pelajaren enda sibahas kari piga-piga cara gelah reh riahna kapndu mbaca ras erlajar Pustaka si Badia.

1. Engkai maka perlu teratur sibaca Pustaka si Badia?

Kalak si teratur mbaca Pustaka si Badia ntah “undang-undang Jahwe,” pasti meriah ukurna janah berhasil ia. (Baca Masmur 1:1-3.) Tangtangna, bacalah Pustaka si Badia piga-piga menit saja tiap wari. Reh buena tehndu Kata Dibata, reh riahna kapndu mbacasa.

2. Kai si arus silakoken gelah pembacan Pustaka si Badiata lebih erguna?

Gelah pembacan Pustaka si Badiata lebih erguna, sanga kita mbaca, kita arus ngadi kentisik, janah siukuri kai si sangana sibaca. Jadi lit dua si arus silakoken, arus sibaca ras ‘siukuri.’ (Josua 1:8) Sanga mbaca, cuba ukurindu enda, ‘Kai nge si banci kuteh arah ayat enda kerna Dibata Jahwe? Kai si arus kulakoken guna ndalanken ayat enda? Uga carana nggunaken ayat enda nampati kalak si deban?’

3. Ndigan nge waktu si cocok kapndu mbaca Pustaka si Badia?

Mesera nge kapndu ngaturken waktundu gelah banci mbaca Pustaka si Badia? Labo kam ngenca si bage. Banci cubakenndu ‘nggunaken waktu alu mehuli.’ (Epesus 5:16) Carana, tentukenlah ndigan waktundu si cocok mbaca Pustaka si Badia tiap wari. Lit kalak si banna waktuna mbaca Pustaka si Badia pagi-pagi si lampas. Lit ka si pilihna sanga ciger, mungkin sanga istirahat man ciger. Lit kalak berngi mbaca Pustaka si Badia, sanga ia muat medem. Adi kam, ndigan nge waktu si cocokna mbaca Pustaka si Badia?

PELAJARI TERBAGESEN

Sipelajari kari uga carana gelah ula kam bosan mbaca Pustaka si Badia. Sipelajari ka uga carana erban persiapen si mehuli gelah pelajaren Pustaka si Badiandu lebih erguna.

Banci dungna meriah siakap mbaca Pustaka si Badia, bali bagi man pangan si tangtangna la siakap entabeh manca

4. Carana gelah meriah kapndu mbaca Pustaka si Badia

Banci saja la kapndu nukah mulai mbaca Pustaka si Badia. Tapi adi ‘pebelinndu sura-surandu’ mbacasa, banci dungna meriah akapndu. Bali bagi sekalak jelma man pangan si lenga pernah panna, adi nggit ia ncubakenca, dungna entabeh kapna manca. Bacalah 1 Petrus 2:2, kenca si e bahas penungkunen enda:

Adi menurutndu, banci nge reh riahna siakap mbaca Pustaka si Badia adi sibaca tiap wari?

Putar VIDEO guna ngenen uga piga-piga kalak dungna meriah kapna mbaca Pustaka si Badia. Kenca si e, bahas penungkunen enda:

VIDEO: Anak Muda Kelengilah Kata Dibata (5:33)

Bas video e, tentangen kai nge si adapi piga-piga anak muda?
Kai si banci nampati kalak e gelah teratur mbaca Pustaka si Badia?
Kai si lakoken kalak e gelah reh riahna kapna mbaca Pustaka si Badia?

Saran-saran gelah reh riahna kapndu mbaca:

Pilihlah terjemahen si tepat si nggunaken bahasa si nukah iangkai. Bacalah Terjemahen Doni si Mbaru adi lit bas bahasandu.
Bacandulah lebe bagin si menarikna akapndu. Contohna, banci nenndu bagin “Bacalah Pustaka si Badia Tiap Wari.”
Banlah tandana asa ja enggo bacandu. Gunakenlah “Daftar Pasal Pembacan Pustaka si Badia” si lit bas buku enda.
Gunakenlah aplikasi JW Library^®. Adi lit aplikasi e bas HP-ndu ntah pe bas perangkat si deban, banci bacandu Pustaka si Badia ras begikenndu audiona i ja pe kam sangana.
Gunakenlah keterangen tambahen bas Terjemahen Doni si Mbaru. I je lit peta, tabel, ras kamus si banci erban reh riahna kapndu mbaca.

5. Banlah persiapen guna erlajar Pustaka si Badia

Bacalah Masmur 119:34, kenca si e bahas penungkunen enda:

Sanga erlajar Pustaka si Badia ateta, ntah pe erban persiapen guna erlajar Pustaka si Badia, engkai maka penting adi ertoto kita lebe?

Uga carana gelah mbue datndu manpaatna tiap erlajar Pustaka si Badia? Sanga persiapkenndu sada pelajaren, cuba lakoken enda:

Bacalah bagin awal pelajaren e.
Bacalah ayat-ayatna janah ukurilah kai hubungenna ras pelajaren e.
Garisi ntah warnai kata-kata kuncina si njawap penungkunenna, enda nampati kam gelah reh lancarna kari pembahasen ras si nampati kam erlajar.

Tehndu nge?

Saksi-Saksi Jahwe nggunaken melala terjemahen Pustaka si Badia. Tapi si riahna kap kami mbacasa eme Pustaka si Badia Terjemahen Doni si Mbaru perban terjemahen e tepat, jelas, janah lit i je gelar Dibata.—Nen Artikel web “Beda nge Pustaka si Badia Saksi-Saksi Jahwe?”

LIT SI NGATAKEN: “La lit waktuku erlajar Pustaka si Badia janah enggo latih kuakap.”

Adi kam, uga pendapatndu kerna erlajar Pustaka si Badia?

KESIMPULEN PELAJAREN ENDA

Gelah mbue datndu manpaat arah Pustaka si Badia, banlah jadwal guna mbacasa, ertotolah kam gelah angkaindu kai si bacandu, janah persiapenlah kam lebe guna erlajar Pustaka si Badia.