PELAJAREN 15
Ise kin Situhuna Jesus?
Hampir kerina kalak pernah begina kerna Jesus. Tapi buen kalak meteh gelarna saja. La tehna ise kin situhuna ia. Beda-beda pendapat kalak kerna Jesus. Kai nge si ajarken Pustaka si Badia kerna Jesus?
1. Ise kin situhuna Jesus?
Jesus eme malekat si tading i surga. Jesus leben iciptaken Dibata Jahwe asangken kerinana. E me sebapna ia ikataken “si pertama iciptaken Dibata arah kerina si ciptakenNa.” (Kolose 1:15) Bas Pustaka si Badia, Jesus ikataken “AnakNa si tonggal” perban ia ngenca si langsung iciptaken Jahwe. (Johanes 3:16) Jesus kerja sama ras Bapakna eme Jahwe. Sampatina Jahwe nciptaken kerinana. (Baca Kuan-kuanen 8:30.) Mbarenda nari ngasa gundari kompak kel Jesus ras Jahwe. Setia ia ngelayani jadi si mpeseh berita ntah pe petunjuk arah Dibata. E me sebapna bas Pustaka si Badia ia igelari “Kata.”—Johanes 1:14.
2. Engkai maka Jesus reh ku doni?
Kira-kira 2.000 tahun si lewat, iban Jahwe mukjizat. GunakenNa kesah si badia guna mindahken kegeluhen Jesus ku rahim sekalak singuda-nguda si gelarna Maria. Tangtangna Jesus malekat i surga, dungna lahir jadi manusia. (Baca Lukas 1:34, 35.) Jesus reh ku doni jadi Mesias ntah pe Kristus si ijanjiken guna nelamatken manusia. a Kerina nubuat kerna Mesias terjadi bas Jesus. Emaka banci jelas idah kalak buktina maka Jesus kap “Kristus, Anak Dibata si nggeluh.”—Matius 16:16.
3. I ja nge Jesus gundari?
Kenca mate Jesus sanga ia jadi manusia i doni, ipekeke Dibata ia jadi malekat. Kenca si e, mulih ia ku surga. I je “bereken Dibata man bana keduduken si terganjangen asangken si mbarenda.” (Pilipi 2:9) Gundari, keduduken Jesus seh kel ganjangna. Ia jadi pribadi nomor dua kenca Jahwe.
PELAJARI TERBAGESEN
Sibahas kari terdauhen ise kin situhuna Jesus e, janah engkai maka perlu sipelajari kerna ia.
4. Jesus labo Dibata Si Madakuasa
Amin pe Jesus malekat si megegeh bas surga, tapi ikataken bas Pustaka si Badia maka patuh ia man Jahwe eme Dibatana ras Bapakna. Putar VIDEO guna ngenen kai nina Pustaka si Badia maka Jesus la seri ras Dibata Si Madakuasa.
Ayat-ayat enda banci nampati kita ngangkai maka Jahwe la seri ras Jesus. Bacalah tiap ayat, kenca si e bahas penungkunenna:
Bacalah Lukas 1:30-32.
-
Kai nge nina malekat e si mbuktiken maka Jesus la seri ras Jahwe, “Dibata Si Meganjangna”?
Bacalah Matius 3:16, 17.
-
Sanga Jesus iperidiken, lit terbegi sora i langit nari, kai nge nina?
-
Menurutndu sora ise nge e?
Bacalah Johanes 14:28.
-
Ise nge si lebih metua ras si belinen kuasana? Bapak ntah anak?
-
Jesus ngelebuh Jahwe e Bapak. Kesimpulen kai si banci sidat je nari?
Bacalah Johanes 12:49.
-
Seri nge akap Jesus ia ras Bapakna? Uga menurutndu?
5. Kai buktina Jesus e Mesias?
Mesias eme kalak si ipilih Dibata guna nelamatken manusia. Bas Pustaka si Badia melala nubuat kerna Mesias. Nubuat-nubuat e banci nampati kita meteh ise kin Mesias si ijanjiken e. Putar VIDEO guna meteh piga-piga nubuat si terjadi bas Jesus sanga ia reh ku doni.
Bacalah nubuat-nubuat si lit bas ayat enda, kenca si e bahas penungkunenna:
Bacalah Miha 5:2 guna meteh nubuat kerna i ja Mesias lahir. b
-
Sesuai nge ingan Jesus lahir ras nubuat e? —Matius 2:1.
Bacalah Masmur 34:20 ras Sakaria 12:10 guna meteh piga-piga nubuat kerna kematen Mesias.
-
Terjadi nge nubuat-nubuat e? —Johanes 19:33-37.
-
Menurutndu enggo nge aturken Jesus leben gelah kerina kejadin e terjadi bagi si inubuatken?
-
Jadi, kai nge si banci simpulkenndu kerna Jesus?
6. Melala sidat gunana adi sipelajari kerna Jesus
Bas Pustaka si Badia ikataken maka seh kel pentingna erlajar kerna Jesus ras tugas si enggo ibereken Dibata man bana. Bacalah Johanes 14:6 ras 17:3, kenca si e bahas penungkunen enda:
-
Engkai maka penting kel erlajar kerna Jesus?
Buka Jesus dalan gelah kita banci jadi teman Dibata. Ajarkenna kebenaren kerna Jahwe, janah arah ia banci sidat kegeluhen seh rasa lalap.
LIT SI NGATAKEN: “Saksi-Saksi Jahwe la tek man Jesus.”
-
Uga nge nindu njawapsa?
KESIMPULEN PELAJAREN ENDA
Jesus eme malekat si megegeh. Ia Anak Dibata janah ia pe Mesias.
Kai si Enggo Sipelajari?
-
Engkai maka Jesus igelari “si pertama iciptaken Dibata arah kerina si ciptakenNa”?
-
Kai si lakoken Jesus sanga lenga ia reh ku doni?
-
Kai buktina Jesus e Mesias?
DARAMI TERBUEN
Bacalah bukti-bukti si deban maka Jesus e Mesias.
“Apakah Yesus Memang Mesias yang Dinubuatkan?” (Artikel web)
Jesus e anak Dibata. Lit nge ajarken Pustaka si Badia maka Dibata erketurunen bagi manusia?
Bacalah bukti-bukti maka Tritunggal e labo ajaren Pustaka si Badia.
Bacalah pengalamen sekalak diberu si dungna berubah kegeluhenna kenca pereksana kai nina Pustaka si Badia kerna Jesus.
“Seorang Wanita Yahudi Menjelaskan Mengapa Ia Memeriksa Kembali Imannya” (Sedarlah! Mei 2013)
a Bas pelajaren 26 ras 27 ibahas engkai maka manusia perlu iselamatken janah uga Jesus nelamatken kita.
