PELAJAREN 16

Kai si Lakoken Jesus Sanga i Doni?

MAINKEN

Beda-beda si bayangken kalak kerna Jesus. Lit si mbayangken Jesus e bayi denga. Lit ka si mbayangken nabi si bijaksana. Janah lit ka si mbayangken dilaki si isiksa. Tapi, adi sipelajari terdauhen kerna kegeluhenna sanga ia i doni, kai si banci siteh? Bas pelajaren enda sibahas kari piga-piga dahinna si pentingna janah kai pengaruhna man bandu.

1. Kai dahin Jesus si pentingna?

Dahin Jesus si pentingna eme ‘mberitaken berita si meriah kerna Kerajan Dibata.’ (Baca Lukas 4:43.) Kerajan Dibata eme sada pemerentahen si ipajekken Dibata si banci ndungi kerina masalah manusia. a Telu setengah tahun dekahna Jesus la erlatih-latih mberitaken berita si meriah e.—Matius 9:35.

2. Kai tujun Jesus erban mukjizat?

Nina Pustaka si Badia melala “perbahanen [Jesus] si dem alu kuasa, mukjizat, ras tanda-tanda si cidahken Dibata arah ia.” (Perbahanen Rasul-Rasul 2:22) Alu kuasa Dibata, Jesus ngasup mpetenang angin si seh kel gegehna, mere man ribun kalak, mpepalem kalak sakit ras mpegeluh kalak mate. (Matius 8:23-27; 14:15-21; Markus 6:56; Lukas 7:11-17) Arah mukjizat-mukjizat si iban Jesus jelas siteh maka Dibata si nuruh ia. Arah mukjizat-mukjizat e pe banci ka siteh, lit kuasa Jahwe guna ndungi kerina masalahta.

3. Kai si banci sipelajari arah kegeluhen Jesus?

Jesus patuh man Jahwe uga pe situasina. (Baca Johanes 8:29.) Lakoken Jesus kai pe si suruh Bapakna amin pe melala tentangen janah setia ia ngasa mate. Buktikenna maka manusia ngasup ngelayani Dibata amin pe situasina sulit. Iban Jesus ‘usihen gelah siikutken dalan-dalanna alu megermet.’—1 Petrus 2:21.

PELAJARI TERBAGESEN

Sibahas kari uga Jesus erberita ras erban mukjizat.

4. Jesus mberitaken berita si meriah

Erdalan Jesus ratusen kilometer bas dalan si rabu-abu. Beritakenna berita si meriah man enterem jelma. Bacalah Lukas 8:1, kenca si e bahas penungkunen enda:

Man kalak si enggo pulung guna megiken ia saja nge Jesus erberita?
Kai si lakoken Jesus gelah banci jumpaina kalak?

Lit nubuat bas Pustaka si Badia maka beritaken Mesias berita si meriah. Bacalah Jesaya 61:1, 2, kenca si e bahas penungkunen enda:

Uga nubuat e terjadi bas Jesus?
Menurutndu perlu nge kalak gundari megiken berita si meriah?

5. Jesus ngajarken pelajaren penting

Selain mberitaken berita si meriah kerna Kerajan Dibata, ajarken Jesus ka pelajaren-pelajaren si erguna. Sibahas kari piga-piga contohna arah Khotbah i Gunung si ipeseh Jesus. Bacalah Matius 6:14, 34 ras 7:12, kenca si e bahas penungkunen enda:

Kai nge nasehat si erguna si bere Jesus bas ayat-ayat e?
Menurutndu erguna denga nge nasehat e gundari?

6. Jesus erban mukjizat

Bereken Jahwe kuasa man Jesus guna erban melala mukjizat. Contohna, bacalah Markus 5:25-34 ntah putar VIDEO. Kenca si e bahas penungkunen enda:

VIDEO: Diberu si Sakit Ipepalem (5:10)

Bas video e, kai nge akap diberu si sakit e pasti terjadi?
Kai nge kapndu si menarik bas mukjizat e?

Bacalah Johanes 5:36, kenca si e bahas penungkunen enda:

Mukjizat si iban Jesus, ‘mbuktiken’ kai kerna ia?

Tehndu nge?

Keterangen si mbuena kerna Jesus lit bas empat buku Pustaka si Badia si igelari Injil, eme Matius, Markus, Lukas, ras Johanes. Masing-masing penulis, lit tulisna keterangen si la lit itulis penulis si deban kerna Jesus. Emaka adi sibaca empatna buku e, banci sidat gambaren si lengkap ras menarik kerna kegeluhen Jesus.

MATIUS

nulis buku si pertama bas Injil. Bas buku e, melala si ceritakenna kerna ajaren Jesus, khususna ajaren Jesus kerna Kerajan Dibata.
MARKUS

nulis buku si gendekna bas Injil. Ceritakenna melala kejadin-kejadin si menarik.
LUKAS

nceritaken uga pentingna akap Jesus ertoto janah uga Jesus ermediate man diberu.
JOHANES

nceritaken melala percakapen Jesus ras teman-temanna bage pe ras kalak si deban. Enda nampati kita meteh uga kin sipat Jesus.