PELAJAREN 23
Engkai maka Perlu Usahakenndu gelah Kam Iperidiken?
Ikataken Jesus maka kalak Kristen arus iperidiken. (Baca Matius 28:19, 20.) Tapi kai kin maksudna iperidiken? Janah kai si arus ilakoken gelah banci iperidiken?
1. Kai kin maksudna iperidiken?
Kata “iperidiken” rehna arah bahasa Junani si ertina “ibenamken” ntah pe “icelupken” ku bas lau. Sanga Jesus iperidiken, ibenamken ia ku bas Lau Jordan, kenca si e, ‘ndarat ia bas lau nari.’ (Markus 1:9, 10) Bage ka pe, kalak Kristen situhu-tuhu, iperidiken alu ibenamken ku bas lau.
2. Iperidiken e mbuktiken kai?
Sanga sekalak jelma iperidiken, cidahkenna man jelma si enterem maka enggo ibaktikenna dirina man Dibata Jahwe. Uga carana mbaktiken diri? Carana, sope iperidiken, ertoto ia lebe man Jahwe janah turikenna maka nggit ia ngelayani Jahwe seh rasa lalap. Erjanji ia ngelayani Jahwe saja, janah si pentingna bas geluhna eme ngelakoken kai si ngena ate Jahwe. Ipilihna ‘lanai nggeluh man dirina sendiri janah terus ikutkenna’ ajaren bage pe usihen si bereken Jesus. (Matius 16:24) Perban enggo ibaktikenna dirina janah iperidiken ia, banci ia rembak ras Jahwe bage pe ras kalak si deban si ngelayani Jahwe.
3. Kai nge si perlu lakokenndu gelah banci kam iperidiken?
Gelah banci kam iperidiken, perlu kam erlajar kerna Jahwe janah pepaguhndu kinitekenndu man baNa. (Baca Heber 11:6.) Adi enggo reh buena pemetehndu kerna Jahwe janah enggo reh paguhna kinitekenndu, pasti reh belinna kekelengenndu man baNa. Enda pasti erban merhat kam nceritaken kerna Jahwe man kalak si deban. Janah nggit kam ngelakoken kai si ngena ate Jahwe. (2 Timotius 4:2; 1 Johanes 5:3) Kalak si cara geluhna enggo “ngena ate Jahwe,” mbelin kemungkinenna merhat ia mbaktiken dirina man Jahwe janah iperidiken.—Kolose 1:9, 10. a
PELAJARI TERBAGESEN
Sibahas kari kai si banci sipelajari arah kegeluhen Jesus. Sibahas ka kari kai si perlu ilakokenndu gelah banci iperidiken.
4. Kai si banci siteh sanga Jesus iperidiken?
Bacalah Matius 3:13-17 guna meteh terbuen kerna kai si terjadi sanga Jesus iperidiken. Kenca si e bahas penungkunen enda:
-
Bayi denga nge Jesus sanga ia iperidiken?
-
Uga nge carana Jesus iperidiken? Ipercikken saja nge Jesus alu lau sanga iperidiken?
Kenca iperidiken, mulai ilakoken Jesus tugas istimewa si ibereken Dibata man bana. Bacalah Lukas 3:21-23 ras Johanes 6:38, kenca si e bahas penungkunen enda:
-
Kenca Jesus iperidiken, kai nge si utamakenna bas geluhna?
5. Pasti kam banci iperidiken
Banci saja tangtangna la kapndu kam mungkin mbaktiken diri janah iperidiken. Tapi adi terus kam erlajar kerna Jahwe janah reh deherna kam ras Ia, banci dungna tetap ukurndu guna mbaktiken diri ras iperidiken. Guna ngenen pengalamen piga-piga kalak si bage, putar VIDEO.
Bacalah Johanes 17:3 ras Jakup 1:5, kenca si e bahas penungkunen enda:
-
Adi lit kalak si atena iperidiken, kai si banci nampati ia?
-
Sibaktiken dirita man Jahwe sanga sikataken man Jahwe maka silayani ateta Ia seh rasa lalap
-
Sanga kita iperidiken, sicidahken man jelma si enterem maka kita enggo mbaktiken diri man Dibata
6. Kenca kita iperidiken, kita jadi anggota keluarga Jahwe
Kenca kita iperidiken, kita jadi bagin keluarga si ersada i belang-belang doni. Kerina Saksi Jahwe, la soal i ja ia tading ras uga latar belakangna, seri kinitekenna janah cara geluhna sesuai ras kai si ikataken bas Pustaka si Badia. Bacalah Masmur 25:14 ras 1 Petrus 2:17, kenca si e bahas penungkunen enda:
-
Menurut ayat-ayat e, manpaat kai nge si idat kalak si enggo iperidiken?
LIT SI NGATAKEN: “Lenga aku siap iperidiken.”
-
Adi misalna bage perasanndu, nggit nge kam erusaha gelah banci iperidiken?
KESIMPULEN PELAJAREN ENDA
Jesus ngajarken maka kalak Kristen perlu iperidiken. Gelah banci iperidiken, arus sipepaguh kinitekenta man Jahwe, cara geluhta arus sesuai ras kai si ngena ateNa, janah sibaktiken dirita man baNa.
Kai si Enggo Sipelajari?
-
Kai maksudna iperidiken, janah engkai maka e penting?
-
Kai hubungenna mbaktiken diri ras iperidiken?
-
Kai si arus ilakoken gelah banci mbaktiken diri janah iperidiken?
DARAMI TERBUEN
Pelajarilah kai kin maksudna iperidiken.
Bacalah kai saja si perlu ilakoken gelah banci peridiken.
“Kekelengen man Jahwe Erban Tersuruh Ukurndu Iperidiken” (Sora Ermomo Maret 2020)
Bacalah pengalamen sekalak dilaki si dungna teriahken guna iperidiken.
“Saya Harus Membuktikan Sendiri Apa yang Benar” (Menara Pengawal 1 Februari 2013)
Engkai maka perlu kam iperidiken, janah uga carana gelah banci kam iperidiken?
“Apakah Aku Mesti Dibaptis?” (Pertanyaan Kaum Muda —Jawaban yang Praktis, Jilid 2, pasal 37)
a Kalak si enggo iperidiken bas agama si deban, tetap denga perlu iperidiken. Engkai? Sebap agamana si mbarenda la ngajarken kebenaren arah Pustaka si Badia.—Nen Perbahanen Rasul-Rasul 19:1-5 ras Pelajaren 13.
