PELAJAREN 24
Uga nge Situhuna Malekat e?
Ate Jahwe siteh min kerna keluargaNa si lit i surga. KeluargaNa e termasuk malekat-malekat si igelari “anak-anak Dibata.” (Jop 38:7) Kai si ikataken Pustaka si Badia kerna malekat? Lit nge pengaruh malekat man manusia? Kerina nge malekat anggota keluarga Dibata?
1. Ise kin situhuna malekat e?
Malekat-malekat leben iciptaken Dibata Jahwe asangken doni enda. Bali bagi Jahwe, malekat pe mahluk si la teridah si tading i surga. (Heber 1:14) Lit jutan malekat, janah beda-beda kerina kepribadian ntah pe sipatna. (Ketangkasen 5:11) Malekat “ndalanken kata [Jahwe] janah patuh man kata-kataNa.” (Masmur 103:20) Mbarenda, isuruh Jahwe malekatNa guna mpeseh berita arah Ia bage pe guna nampati ras nelamatken umatNa. Gundari, malekat nampati kalak Kristen gelah jumpa ras kalak si nggit erlajar kerna Dibata.
2. Ise kin Setan ras malekat-malekat jahat?
Lit malekat-malekat si la setia man Jahwe. Malekat si pertama mberontak eme malekat “si igelari Iblis ras Setan, si sangana nipu kerina kalak si tading i doni.” (Ketangkasen 12:9) Merhat kel Setan jadi penguasa emaka pengaruhina manusia si pertama. Kenca si e, pengaruhina ka malekat-malekat si deban gelah ikut mberontak ras ia. Malekat-malekat si mberontak e igelari malekat-malekat jahat. Setan ras malekat-malekat jahat e enggo ipelawes Jahwe arah surga nari ku doni. Janah imasapken me pagi kalak e.—Baca Ketangkasen 12:9, 12.
3. Kai saja si ilakoken Setan ras malekat-malekat jahat guna nipu kita?
Setan ras malekat-malekat jahat nipu enterem kalak arah kai pe si lit hubungenna ras ia. Usahaken malekat-malekat jahat gelah terlibat kalak ras ia secara langsung ntah pe lang. Tapi enterem kalak si la sadar kerna si e. Contohna, lit kalak si nungkun man ahli bintang, peramal, guru si baso, bage pe dukun. Lit ka kalak si terlibat ras malekat-malekat jahat perban ertambar. Lit ka kalak si terlibat perban akapna banci denga ia ngerana ras kalak mate. a Tapi persingeti Jahwe kita, nina, “Ula kena erguru man kalak si beluh ngelebuh begu kalak mate janah ula pindo kena petunjuk man peramal.” (Imamat 19:31) PersingetiNa kita guna ngelindungi kita arah Setan ras malekat-malekat jahat. Sebap kalak e musuh Jahwe janah banna atena kita cilaka.
PELAJARI TERBAGESEN
Sipelajari kari kai saja si ilakoken malekat-malekat si setia, kai nge bahayana adi terlibat kita ras malekat-malekat jahat, janah uga carana ngelindungi dirita arah Setan ras malekat-malekat jahat.
4. Malekat si setia nampati manusia erlajar kerna Jahwe
Malekat labo langsung erberita man manusia. Tapi sampatina umat Dibata gelah jumpa ras kalak si merhat erlajar kerna Dibata. Bacalah Ketangkasen 14:6, 7, kenca si e bahas penungkunen enda:
-
Engkai maka perlu kita penampat malekat bas erberita?
-
Meriah nge ukurndu sanga tehndu isampati malekat kam gelah jumpa ras kalak si merhat meteh kerna Pustaka si Badia? Engkai?
5. Ula terlibat bas kai pe si lit hubungenna ras malekat jahat
Setan ras malekat-malekat jahat eme musuh Jahwe. Emaka kalak e pe musuhta ka nge. Bacalah Lukas 9:38-42, kenca si e bahas penungkunen enda:
-
Arah ayat e, uga nge perbahanen malekat-malekat jahat man manusia?
Pasti la kita nggit ipengaruhi malekat-malekat jahat. Bacalah Ulangen 18:10-12, kenca si e bahas penungkunen enda:
-
Kai si banci erban kita terlibat ras malekat-malekat jahat? Bas daerahndu, kebiasan kai saja nge si lit hubungenna ras malekat-malekat jahat?
-
Menurutndu lit nge gunana man banta ilarang Jahwe kita terlibat bas kai pe si lit hubungenna ras malekat jahat? Engkai?
Putar VIDEO, kenca si e bahas penungkunen enda:
-
Adi menurutndu, bahaya nge jimat si ipake anak Palesa? Engkai?
-
Kai si perlu lakoken Palesa gelah la ia iganggu malekat jahat?
Kalak Kristen situhu-tuhu arus lalap ngelawan malekat-malekat jahat. Bacalah Perbahanen Rasul-Rasul 19:19 ras 1 Korinti 10:21, kenca si e bahas penungkunen enda:
-
Engkai maka kai pe si lit hubungenna ras malekat jahat perlu sihancurken ntah pe sikernepken?
6. Menang ngelawan Setan ras malekat-malekat jahat
Peminpin malekat-malekat jahat eme Setan. Tapi peminpin malekat si setia eme Mikael kepala malekat-malekat. Mikael e maksudna Jesus. Uga nge hebatna Mikael e? Bacalah Ketangkasen 12:7-9, kenca si e bahas penungkunen enda:
-
Apai nge hebaten, Mikael ras malekat-malekatna ntah Setan ras malekat-malekatna?
-
Menurutndu, perlu nge pengikut-pengikut Jesus mbiar man Setan ras malekat-malekatna?
Kam banci menang ngelawan Setan ras malekat-malekatna. Bacalah Jakup 4:7, kenca si e bahas penungkunen enda:
-
Uga nge carana gelah banci kam ngelindungi diri arah Setan ras malekat-malekat jahat?
LIT SI NGATAKEN: “Labo lit salahna main game ntah pe nonton film begu-begu. Ah me hiburen saja nge.”
-
Engkai maka bahaya kel cara rukur si bage?
KESIMPULEN PELAJAREN ENDA
Malekat-malekat si setia nampati kita. Tapi Setan ras malekat-malekat jahat musuh Jahwe. Itipuna enterem kalak alu erban kalak e terlibat bas kai pe si lit hubungenna ras malekat-malekat jahat.
Kai si Enggo Sipelajari?
-
Uga malekat-malekat si setia nampati kalak erlajar kerna Jahwe?
-
Ise kin Setan ras malekat-malekat jahat?
-
Engkai maka la kam nggit terlibat ras malekat-malekat jahat?
DARAMI TERBUEN
Nenlah buktina maka Jesus me Mikael kepala malekat.
Nenlah buktina maka Iblis e labo sekedar sipat jahat saja si lit bas dirita.
Nenlah uga sekalak diberu mbebasken diri arah pengaruh malekat-malekat jahat.
“Ia Menemukan Arti Kehidupan” (Menara Pengawal 1 Juli 1993)
Uga Setan nipu kalak arah ilmu sihir?
“Kebenaren kerna Ilmu Sihir ras Kinigurun” (Dalan si Nuju Kegeluhen si Rasa Lalap, pelajaren 5)
a Bas Pelajaren 29, ijelasken maka kalak mate labo tehna kai pe.
