PELAJAREN 26
Engkai maka Lit Kejahaten ras Kesusahen?
Sanga terjadi kai si la mehuli, rusur kel kalak tersungkun-sungkun, “Engkai maka enda terjadi?” Bas Pustaka si Badia jelas kel jawapenna, enda banci erban meriah kel ukurta.
1. Uga nge tangtangna kejahaten lit?
Setan si Iblis mberontak man Dibata. Atena ia si jadi penguasa, emaka ipengaruhina Adam ras Hawa gelah ikut mberontak ras ia. Carana bualina Hawa. (Kejadin 3:1-5) Ibanna Hawa erpengakap maka lit si mehuli si la bereken Jahwe man Hawa. Tempa-tempa ikatakenna, sikapen nge geluh manusia adi la patuh man Dibata. Sanga katakenna maka labo kari Hawa mate, e me bual Setan si pertama. E me sebapna bas Pustaka si Badia ikataken maka Setan e “perbual janah ia bapak kalak si perbual.”—Johanes 8:44.
2. Keputusen kai si iban Adam ras Hawa?
Melala kel si enggo bereken Jahwe man Adam ras Hawa. Ikataken Jahwe maka kerina buah batang kayu si lit bas Taman Eden banci pan kalak e. Sada ngenca si la banci ipan. (Kejadin 2:15-17) Tapi e pe pan kalak e. ‘Putikken Hawa buah e janah panna.’ Kenca si e, ‘pan Adam ka buah e.’ (Kejadin 3:6) Duana ia la patuh man Dibata. Situhuna, perban Adam ras Hawa sempurna, labo kapna mesera matuhi perentah Dibata. Tapi, sanga sengaja langgarna perentah Dibata, erdosa me ia janah la ia nggit iatur Dibata. Keputusenna e erban susah kel kalak e dungna.—Kejadin 3:16-19.
3. Kai pengaruh keputusen Adam ras Hawa man banta?
Perban Adam ras Hawa enggo erdosa, wariskenna dosa e man kerina keturunenna. Nina Pustaka si Badia kerna Adam, “Dosa masuk ku doni arah sekalak manusia, dosa e maba kematen. Akibatna, kematen enggo ngelangketi kerina manusia.”—Roma 5:12.
Kai saja si banci erban kita susah? Mon-mon kita susah perban siban keputusen si salah, ntah pe kalak si erban keputusen si salah. Selain si e, banci ka kita susah perban lit kejadin si la isangka-sangka.—Baca Pengerana 9:11.
PELAJARI TERBAGESEN
Sibahas kari engkai maka labo Dibata si ertanggung jawap nandangi kejahaten ras kesusahen si terjadi bas doni enda gundari. Sibahas ka kari uga perasan Dibata sanga kita susah.
4. Ise nge si erban kita susah?
Enterem kalak si erpengakap maka Dibata si erkuasa nandangi doni enda. Tuhu kin bage? Putar VIDEO.
Bacalah Jakup 1:13 ras 1 Johanes 5:19, kenca si e bahas penungkunen enda:
-
Dibata nge si erban lit kesusahen ras kejahaten?
5. Kai nge si terjadi kenca Setan erkuasa?
Bacalah Kejadin 3:1-6, kenca si e bahas penungkunen enda:
-
Bual kai nge si ikataken Setan?—Nen ayat 4 ras 5.
-
Kai nge si ikataken Setan si erban tempa-tempa itahan Jahwe kai si mehuli arah manusia?
-
Adi menurut Setan, perlu nge manusia patuh man Jahwe selaku Penguasa gelah banci ermeriah ukur?
Bacalah Pengerana 8:9, kenca si e bahas penungkunen enda:
-
Kai nge si terjadi sanga la Jahwe si nguasai doni enda?
-
Adam ras Hawa tading i Pardis janah kalak e sempurna. Tapi begikenna Setan janah mberontak kalak e man Jahwe.
-
Kenca pemberontaken e, doni dem alu dosa, kesusahen, ras kematen
-
Ihapusken Jahwe me pagi dosa, kesusahen, ras kematen. Dungna manusia mulihi ka jadi sempurna janah nggeluh bas Pardis.
6. Idah Jahwe kesusahenta
Iperdiateken Dibata nge kita sanga kita susah? Mari siperdiateken kai si itulis Raja Daud ras Rasul Petrus. Bacalah Masmur 31:7 ras 1 Petrus 5:7, kenca si e bahas penungkunen enda:
-
Uga nge perasanndu sanga itehndu idah Jahwe ras iperdiatekenNa kita sanga kita susah?
7. Imasapken Dibata pagi kerina kesusahenta
Bacalah Jesaya 65:17 ras Ketangkasen 21:3, 4, kenca si e bahas penungkunen enda:
-
Engkai maka meriah ukurta sanga siteh maka imasapken Dibata Jahwe pagi kerina si la mehuli si inanami manusia?
Tehndu nge?
Arah bual Setan si pertama, ipitnahna Jahwe. Ceda banna gelar Jahwe, banna kalak erpengakap maka Jahwe e labo Penguasa si adil ras perkeleng. Tapi lanai ndekah bersihken Jahwe gelarNa alu nasapken kerina si erban manusia susah. BuktikenNa maka pemerentahenNa me si mehulina. Salah sada persoalen si pentingna bas alam semesta enda eme mpebadia gelar Jahwe.—Matius 6:9, 10.
LIT SI NGATAKEN: “Iban Dibata kita susah guna nguji kinitekenta.”
-
Uga nge nindu njawapsa?
KESIMPULEN PELAJAREN ENDA
Setan si Iblis ras dua manusia pertama me si jadi penyebab utama melala kejahaten bas doni enda. Perdiateken Jahwe kel kita sanga kita susah janah lanai ndekah hapusken Dibata kerina kesusahenta e.
Kai si Enggo Sipelajari?
-
Bual kai si ikataken Setan si Iblis man Hawa?
-
Kai pengaruh pemberontaken Adam ras Hawa man kita kerina?
-
Janari siteh maka perdiateken Jahwe kel kita sanga kita susah?
DARAMI TERBUEN
Nenlah kai erti dosa menurut Pustaka si Badia.
Bacalah kerna tuduhen Setan si Iblis man Jahwe bas Taman Eden.
“Mengapa Allah Membiarkan Penderitaan?” (Menara Pengawal 1 Januari 2014)
Bacalah jawapen arah penungkunen enda si banci erban malem pusuhta.
“Mengapa Allah Membiarkan Nazi Membantai Begitu Banyak Orang?” (Artikel web)
Tontonlah pengalamen sekalak dilaki si dungna tehna engkai maka melala kesusahen.
