Manusia si pertama eme Adam ras Hawa, la patuh man Dibata, emaka kita jadi erdosa, susah, janah mate. a Tapi lit denga arapenta. Utus Jahwe AnakNa eme Jesus Kristus ku doni enda mate guna kita, gelah banci kita ibebasken arah dosa ras kematen. Bas Pustaka si Badia iajarken maka kematen Jesus jadi tebusen man banta. Tebusen eme erga si igalari guna mbebasken manusia. Erga si igalari Jesus eme kegeluhenna si sempurna. (Baca Matius 20:28.) Situhuna banci nge Jesus nggeluh rasa lalap i doni. Tapi nggit ia mate guna kita, gelah banci sidatken mulihi kerina si enggo bene iban Adam ras Hawa. Tebusen Jesus pe mbuktiken maka keleng kel ate Jahwe ras Jesus man banta. Pelajaren enda banci nampati kam gelah reh belinna pengerganndu perban enggo mate Jesus man banta.

1. Kai nge gunana kematen Jesus man banta gundari?

Perban kita enggo erdosa, melala perbahanenta si la ngena ate Jahwe. Tapi adi tuhu-tuhu kita menyesal janah sipindo gelah iampuni Jahwe kita arah korban tebusen Jesus Kristus, jenari siusahaken kel gelah la mulihi silakoken kesalahenta e, banci kita rembak ras Dibata Jahwe. (1 Johanes 2:1) Nina Pustaka si Badia, ‘Kristus si ngelakoken kai si benar sekali ngenca mate guna dosa seh rasa lalap. Ia mate guna kalak si ngelakoken kai si salah. Banna bage gelah banci tegu-teguna kena ku Dibata.’​—1 Petrus 3:18.

2. Kai nge gunana kematen Jesus man banta bas masa depan?

Jahwe ngutus Jesus ku doni guna mpersembahken kegeluhenna si sempurna “gelah ise pe si erkiniteken man [Jesus] la ikernepken tapi ndatken kegeluhen si rasa lalap.” (Johanes 3:16) Ngata bujur kel kita man kai si enggo ilakoken Jesus, sebap alu bage, lanai ndekah ipekena Jahwe kerina si la mehuli perban Adam la patuh. Adi tek kita man korban tebusen Jesus, banci kita nggeluh seh rasa lalap bas pardis i doni.​—Jesaya 65:21-23.

 PELAJARI TERBAGESEN

3. Kematen Jesus mbebasken kita arah dosa ras kematen

1. Adam eme manusia si sempurna si la patuh man Dibata, janah banna manusia jadi erdosa ras mate

2. Jesus eme manusia si sempurna si patuh man Dibata, janah banna kalak jadi sempurna ras nggeluh rasa lalap

4. Kematen Jesus erguna man kerina kalak

 5. Tebusen e pemere Jahwe man bandu

Umat Jahwe, anggapna tebusen e pemere Jahwe man bana secara pribadi. Contohna, bacalah Galati 2:20, kenca si e bahas penungkunen enda:

• Kai si ikataken Rasul Paulus si mbuktiken maka anggapna tebusen e pemere man bana secara pribadi?

Perban Adam erdosa, ia ras kerina keturunenna arusna mate. Tapi, utus Jahwe AnakNa mate nebus kam gelah banci kam nggeluh rasa lalap.

Sanga bacandu ayat-ayat enda, bayangkenlah uga perasan Jahwe sanga idahNa AnakNa rate mesui. Bacalah Johanes 19:1-7, 16-18, kenca si e bahas penungkunen enda:

• Uga nge perasanndu sanga tehndu kai si enggo ilakoken Jahwe ras Jesus man bandu?

 KESIMPULEN PELAJAREN ENDA

Perban Jesus enggo mate guna nebus kita, banci ampuni Jahwe dosa-dosata janah banci kita nggeluh seh rasa lalap.

Kai si Enggo Sipelajari?

• Engkai maka Jesus perlu mate?

• Perban Jesus manusia si sempurna, tebusen si uga nge si banci berekenna?

• Kai nge gunana kematen Jesus man bandu?