Pernah nge kam erceda ate perban mate keluargandu ntah pe temanndu? Bas masa si bage, banci jadi tersungkun-sungkun kam, ‘Uga nge keadan kalak mate? Lit nge pagi masana banci ka kita jumpa ras keluargata ntah pe temanta si enggo mate?’ Bas pelajaren enda bage pe pelajaren berikutna, sibahas kari kai nina Pustaka si Badia. Jawapenna banci erban malem pusuhta.

1. Uga nge situhuna keadan kalak mate?

Ipeseri Jesus kalak mate ras kalak si entabeh kel perpedemna. Kalak si entabeh perpedemna, labo tehna kai pe si terjadi i sekelilingna. Kai si seri antara kalak si mate ras kalak si sangana medem? Kalak si enggo mate lanai gejapna mesui, janah labo ia tersiksa. Ikataken bas Pustaka si Badia, “Kalak mate la tehna kai pe.”​—Baca Pengerana 9:5.

2. Kai gunana adi siteh uga situhuna keadan kalak mate?

Enterem kalak si mbiar ia mate janah mbiar ka ia man kalak mate. Tapi kai si ikataken Pustaka si Badia kerna kematen, banci erban kam lanai mbiar. Nina Jesus, “Kebenaren e si mbebasken kena.” (Johanes 8:32) Melala agama si la seri ajarenna ras Pustaka si Badia kerna kalak mate. Bas Pustaka si Badia labo lit iajarken maka kenca kita mate, lit denga tendita si tetap nggeluh, ntah pe lit denga bagin arah dirita si tetap nggeluh. Emaka kalak mate labo ia tersiksa, janah perban kalak mate la tehna kai pe, labo banci icilakaina kita. Emaka labo perlu sisembah kalak mate, ntah silakoken kai pe gelah ula ia merawa, janah labo perlu sitotoken kalak e.

Lit kalak si ngataken maka banci ia ngerana-ngerana ras kalak si enggo mate. Tapi e labo mungkin. Bagi si enggo sipelajari, kalak mate “la tehna kai pe.” Kalak si erpengakap maka ia ngerana ras keluarga bage pe temanna si enggo mate, banci saja situhuna ia ngerana ras malekat-malekat jahat, perban malekat-malekat jahat banci nyamar jadi keluarga ntah pe temanna si enggo mate. Emaka, adi enggo siteh uga kin situhuna keadan kalak mate, banci kita terlindung arah malekat-malekat jahat. Enggo larang Jahwe kita ngerana ras kalak mate, perban adi lit hubungenta ras malekat-malekat jahat, banci kita cilaka.​—Baca Ulangen 18:10-12.

3. Uga kin situhuna keadan kalak si enggo mate?

I belang-belang doni, beda-beda pendapat kalak kerna keadan kalak mate. Tapi si pasti, labo kerina pendapat kalak e benar.

• Bas daerahndu, uga nge pendapat kalak kerna keadan kalak mate?

 4. Kai gunana adi siteh uga keadan kalak mate?

Adi siteh uga situhuna keadan kalak mate, lanai kita mbiar man kalak mate. Bacalah Pengerana 9:10, kenca si e bahas penungkunen enda:

• Banci nge kalak mate ncilakai kita?

Adi tek kita man kebenaren si ajarken Pustaka si Badia, lanai kita tek maka kalak mate perlu isembah, ntah pe perlu silakoken kai pe gelah ula ia merawa. Bacalah Jesaya 8:19 ras Ketangkasen 4:11, kenca si e bahas penungkunen enda:

• Adi menurutndu uga nge perasan Jahwe man kalak si nembah kalak mate, ntah pe si mindo penampat man kalak mate?

5. Kebenaren kerna kematen erban kita la mbiar

Enterem kalak erpengakap maka kenca ia mate, ihukum ia perban si la mehuli si ilakokenna mbarenda. Tapi malem kel pusuhta kenca siteh maka kalak mate labo isiksa, la soal uga ia jahatna mbarenda. Bacalah Roma 6:7, kenca si e bahas penungkunen enda:

• Kenca siteh ikataken bas Pustaka si Badia maka kalak mate enggo ibebasken arah dosana, mungkin nge akapndu kalak mate isiksa perban dosana si mbarenda?

Reh buena siteh kerna Jahwe, reh jelasna siteh maka labo ihukum Jahwe kalak si mate. Bacalah Ulangen 32:4 ras 1 Johanes 4:8, kenca si e bahas penungkunen enda:

• Adi sipat-sipat Dibata bagi si ikataken bas ayat ndai, mungkin nge isiksaNa kalak si enggo mate?

• Uga nge perasanndu kenca tehndu kebenaren kerna kematen? Engkai?

 KESIMPULEN PELAJAREN ENDA

Kenca sekalak jelma mate, lanai tehna kai pe. Kalak mate labo gejapna mesui, janah labo banci ise pe gangguna.

Kai si Enggo Sipelajari?

• Uga nge situhuna keadan kalak mate?

• Kai gunana siteh kebenaren kerna kematen?

• Engkai maka malem pusuhta kenca siteh kebenaren kerna kematen?