PELAJAREN 30
Kalak si Keleng Atendu Banci Nggeluh Mulihi!
Adi lit keluargata ntah pe temanta si mate, pasti getem kel pusuhta. E me sebapna bas Pustaka si Badia ikataken kematen e musuh. (1 Korinti 15:26) Bas Pelajaren 27, enggo sipelajari maka taluken Jahwe pagi musuh e. Tapi kai nge pagi si terjadi man kalak si enggo mate? Bas pelajaren enda, sipelajari kari janji Jahwe si luar biasa eme mpekeke miliaren kalak si enggo mate guna nggeluh rasa lalap. Mungkin nge e terjadi? Kenca ipekeke, i ja nge pagi kalak e tading, i surga ntah i doni?
1. Kai nge sura-sura Jahwe man keluarga ntah pe temanta si enggo mate?
Merhat kel Jahwe mpekeke kalak si enggo mate. Sekalak si erkiniteken si gelarna Jop, tek ia maka labo ilupaken Jahwe ia kenca ia mate. Nina Jop man Dibata, “LebuhNdu pagi aku, janah kualoi pagi Kam [arah Kuburen nari].”—Baca Jop 14:13-15.
2. Kai si erban kita tek maka kalak mate banci ipekeke?
Sanga Jesus i doni, ibereken Dibata kuasa man bana guna mpekeke kalak mate. Pernah ipekeke Jesus sekalak diberu si umurna 12 tahun bage pe anak sekalak janda. (Markus 5:41, 42; Lukas 7:12-15) Selain si e bas pudi wari, Lasarus teman Jesus mate. Amin pe Lasarus enggo mate janah empat wari ikuburken, tapi banci ipekeke Jesus ia. Kenca ertoto Jesus man Dibata, nina alu sora si megang, “O Lasarus, ndaratkenlah!” Jenari “ndarat dilaki si enggo mate e.” Nggeluh ka ia mulihi! (Johanes 11:43, 44) Bayangkenlah uga riahna ukur keluargana bage pe teman-temanna!
3. Lit nge arapen man keluarga ntah pe temanta si enggo mate?
Pustaka si Badia erjanji, “Lit pagi kekeken arah si mate nari.” (Perbahanen Rasul-Rasul 24:15) Mbarenda, sanga ipekeke Jesus kalak mate, kalak mate e labo sangana i surga. (Johanes 3:13) Emaka meriah ukur kalak e perban banci nggeluh mulihi i doni enda. Lanai ndekah, ipekeke Jesus miliaren kalak guna nggeluh rasa lalap bas pardis i doni. Ikataken Jesus maka kerina kalak si inget Dibata pasti pagi ipekeke, amin pe la lit kalak si nginget ia pernah nggeluh.—Johanes 5:28, 29.
PELAJARI TERBAGESEN
Sipelajari kari arah Pustaka si Badia engkai maka kita tek maka kalak mate banci ipekeke janah pasti ipekeke. Sipelajari ka kari engkai maka janji kerna kekeken banci erban malem pusuhndu janah mereken arapen man bandu.
4. Ibuktiken Jesus banci ipekekena kalak mate
Sipelajari kari kai si ilakoken Jesus man temanna eme Lasarus. Bacalah Johanes 11:14, 38-44, kenca si e bahas penungkunen enda:
-
Janari siteh maka Lasarus e tuhu-tuhu enggo mate?—Nen ayat 39.
-
Adi Lasarus enggo nggeluh i surga, masuk akal nge akapndu ipekeke Jesus ia gelah nggeluh ka i doni?
5. Enterem pagi kalak si ipekeke!
Bacalah Masmur 37:29, kenca si e bahas penungkunen enda:
-
Sanga ipekeke pagi miliaren kalak si enggo mate, i ja nge pagi kalak e nggeluh?
Labo kalak si nembah Jahwe ngenca pagi ipekeke Jesus. Bacalah Perbahanen Rasul-Rasul 24:15, kenca si e bahas penungkunen enda:
-
Sanga ipekeke pagi kalak mate, ras ise nge atendu jumpa?
Cuba ukurindu: Nukah akap Jesus mpekeke kalak mate bali bagi sekalak bapak nukah akapna ngingeti anakna si sangana medem
6. Janji kerna kekeken banci mpepalem pusuhndu ras mereken arapen man bandu
Bas Pustaka si Badia lit iceritaken kerna anak Jairus si enggo ipekeke. Cerita e mpegegehi ras mpepalem pusuh enterem kalak si erceda ate. Bacalah ceritana bas Lukas 8:40-42, 49-56.
Sanga nandangi ipekeke Jesus anak Jairus, nina Jesus man Jairus, “Ula mbiar, erkiniteken sajalah.” (Nen ayat 50.) Uga arapen kekeken banci nampati kam . . .
-
sanga lit keluarga ntah pe temanndu si mate?
-
sanga geluhndu terancam?
Putar VIDEO, kenca si e bahas penungkunen enda:
-
Uga arapen kekeken banci mpegegehi ras mpepalem pusuh orang tua Phelicity?
LIT SI NGATAKEN: “Lo mungkin kalak mate banci nggeluh mulihi.”
-
Adi kam, uga pendapatndu?
-
Ayat si apai nge si banci gunakenndu bas mbuktiken maka kalak mate banci nggeluh mulihi?
KESIMPULEN PELAJAREN ENDA
Pustaka si Badia erjanji maka miliaren kalak mate ipekeke pagi. Ate Jahwe kalak e nggeluh mulihi, emaka bereken Jahwe man Jesus kuasa guna mpekeke kalak e.
Kai si Enggo Sipelajari?
-
Janari siteh maka tertima-tima kel Jahwe ras Jesus guna mpekeke kalak mate?
-
Sanga ipekeke pagi miliaren kalak mate, i ja nge pagi kalak e nggeluh, i surga ntah i doni? Engkai maka bage nindu?
-
Engkai kam tek maka keluarga ntah pe temanndu si enggo mate banci nggeluh mulihi?
DARAMI TERBUEN
Nenlah kai saja si banci lakokenndu sanga kam erceda ate.
Banci nge pedah-pedah si lit bas Pustaka si Badia nampati kalak si sangana erceda ate?
Kai nge si banci nampati anak-anak sanga lit keluarga ntah pe temanna si mate?
Lit nge pagi kalak si ipekeke ku surga? Ise nge pagi si la ipekeke?
