PELAJAREN 31

Kai kin Kerajan Dibata e?

MAINKEN

Tema utama Pustaka si Badia eme kerna Kerajan Dibata. Gunaken Jahwe KerajanNa erban doni enda jadi pardis. Kai kin Kerajan Dibata e? Janari siteh Kerajan e enggo merentah gundari? Kai si enggo ilakoken Kerajan Dibata? Janah kai si nandangi ilakokenna i bas masa depan? I bas pelajaren enda bage pe i bas dua pelajaren selanjutna, ijawap kari penungkunen e.

1. Kai kin Kerajan Dibata e janah ise Rajana?

Kerajan Dibata eme sada pemerentahen si ipajekken Dibata Jahwe. Rajana eme Jesus Kristus si merentah arah surga nari. (Matius 4:17; Johanes 18:36) Nina Pustaka si Badia kerna Jesus, “Jadi Raja pagi ia . . . seh rasa lalap.” (Lukas 1:32, 33) Perban Jesus si jadi Raja i bas Kerajan e, ipinpinna pagi kerina kalak si lit bas doni.

2. Ise si merentah ras Jesus?

Jesus labo sisada merentah. Kalak arah ‘tiap suku, bahasa, umat, ras bangsa, merentah jadi raja nandangi doni enda.’ (Ketangkasen 5:9, 10) Piga kalak si merentah ras Kristus? Kenca Jesus reh ku doni, jutan kalak Kristen enggo jadi pengikutna. Tapi 144.000 kalak ngenca si ipilih ku surga guna merentah ras Jesus. (Baca Ketangkasen 14:1-4.) Kerina kalak Kristen si debanna, tading i doni enda jadi rakyat Kerajan Dibata.—Masmur 37:29.

3. Engkai maka Kerajan Dibata ndauh hebaten asangken kerina pemerentahen manusia?

Amin pe lit nge peminpin manusia si erusaha ngelakoken kai si mehuli, tapi kalak e la ngasup ngelakoken kerina sura-surana e. Dungna kalak e igantiken peminpin si deban si banci saja mentingken bana ras la diatena rakyatna. Tapi Jesus, Raja arah Kerajan Dibata, labo pagi pernah igantiken ise pe. Dibata enggo “majekken sada kerajan si la pernah kernep.” (Daniel 2:44) Merentah pagi Jesus ku sebelang doni, janah la ibeda-bedakenna kalak. Jesus e perkeleng, mehuli, ras adil. Janah ajarina ka kalak gelah perkeleng, mehuli, ras adil man sada ras si debanna.—Baca Jesaya 11:9.

PELAJARI TERBAGESEN

Sipelajari kari engkai maka Kerajan Dibata ndauh hebaten asangken kerina pemerentahen manusia.

4. Kerajan Dibata merentah pagi i sebelang doni

Kuasa Jesus Kristus ndauh belinen asangken peminpin manusia si apai pe. Bacalah Matius 28:18, kenca si e bahas penungkunen enda:

Kai bedana kuasa Jesus ras kuasa kerina peminpin manusia?

Peminpin manusia rusur ganti-ganti, janah tiap peminpin sada wilayah ngenca iperentahna. Adi Kerajan Dibata uga? Bacalah Daniel 7:14, kenca si e bahas penungkunen enda:

Perban Kerajan Dibata “la pernah kernep,” menurutndu kai nge gunana man banta?
Perban Kerajan Dibata merentah pagi ku sebelang doni, menurutndu kai nge gunana man banta?

5. Pemerentahen manusia arus iganti

Engkai maka Kerajan Dibata arus nggantiken pemerentahen manusia? Putar VIDEO, kenca si e bahas penungkunen enda:

VIDEO: Kai kin Kinirajan Dibata e?—Cupliken (1:41)

Kai nge si terjadi sedekah manusia si merentah doni?

Bacalah Pengerana 8:9, kenca si e bahas penungkunen enda:

Adi menurutndu perlu nge pemerentahen manusia igantiken Kerajan Dibata? Engkai maka bage nindu?

6. Jesus ras 144.000 kalak si merentah ras ia ngangkai keadanta

Jesus Rajata, pernah nggeluh jadi manusia. Emaka ‘angkaina kelemahenta.’ (Heber 4:15) Selain si e, 144.000 dilaki ras diberu si setia si merentah ras Jesus, ipilih Jahwe arah “tiap suku, bahasa, umat, ras bangsa.” —Ketangkasen 5:9.

Kenca tehndu Jesus ras 144.000 kalak si merentah ras ia ngangkai uga perasan ras masalahta, meriah nge ukurndu? Engkai?

Enggo ipilih Jahwe dilaki ras diberu arah erbage latar belakang guna merentah ras Jesus

7. Undang-undang Kerajan Dibata ndauh ulin asangken undang-undang si iban manusia

Pemerentahen manusia erban undang-undang guna ngelindungi ras nampati rakyatna. Kerajan Dibata pe, lit undang-undangna si arus ipatuhi rakyatna. Bacalah 1 Korinti 6:9-11, kenca si e bahas penungkunen enda:

Menurutndu, uga nge keadan doni enda adi kerina kalak patuh man undang-undang Dibata? a
Masuk akal nge kapndu adi pindo Jahwe rakyat KerajanNa patuh man undang-undangNa? Engkai?
Kai buktina kalak si mbarenda la ngikutken undang-undang Dibata banci berubah?—Nen ayat 11.

Bali bagi pemerentahen manusia, Kerajan Dibata pe lit undang-undangna si ngelindungi ras nampati rakyatna. Tapi ndauh ulin undang-undang Kerajan Dibata.

LIT SI NGATAKEN: “Kerajan Dibata e bas pusuh nge ngenca.”