PELAJAREN 34

Uga Carata Mbuktiken Keleng Ateta Jahwe?

MAINKEN

Adi bandingkenndu sanga tangtangna kam erlajar Pustaka si Badia, reh belinna nge kekelengenndu man Jahwe gundari? Terus nge atendu reh deherna ras Jahwe? Adi ue, ingetlah pasti reh kelengna ate Jahwe kam janah lebih ermediate Ia man bandu. Uga nge carandu mbuktiken man Jahwe keleng atendu Ia?

1. Uga carata mbuktiken man Jahwe keleng ateta Ia?

Sibuktiken kekelengenta man Jahwe adi patuh kita man baNa. (Baca 1 Johanes 5:3.) Labo ise pe ipaksa Jahwe patuh man baNa. Tapi ibereken Jahwe man kita kerina kebebasen guna milih patuh man baNa ntah lang. Engkai? Perban ate Jahwe kita “alu bulat ukur matuhi [Ia].” (Roma 6:17) Maksudna, ate Jahwe patuh kita man baNa perban keleng ateta Ia, labo perban terpaksa. Bagin 3 ras 4 buku enda, irancang guna nampati kam mbuktiken kekelengenndu man Jahwe, alu ngelakoken kai si ngena ateNa janah la ngelakoken kai si segat ateNa.

2. Engkai maka mon-mon mesera siakap mbuktiken kekelengenta man Jahwe?

“Melala kap kesusahen kalak si benar.” (Masmur 34:19) Kita kerina erjuang ngadapi keadanta si la sempurna. Janah banci saja siadapi masalah ekonomi, lit kalak si la adil man banta, ras lit ka masalah si debanna. Sanga sulit situasita, banci saja mesera siakap ngelakoken kai si pindo Jahwe. Si e perban banci saja nukahen ngelakoken kai si salah. Tapi, adi terus lakokenndu kai si ngena ate Jahwe, buktikenndu maka kelengen atendu Ia asangken kai pe. Buktikenndu ka setia kam man baNa. Emaka Jahwe pe pasti setia man bandu. Labo kam pernah itadingkenNa.—Baca Masmur 4:3.

PELAJARI TERBAGESEN

Sibahas kari engkai maka adi patuh kita man Jahwe, meriah siban ukurNa. Sibahas ka kari, kai si banci nampati kita tetap setia man Jahwe.

3. Kam pe ikut ituduh Setan

Bas buku Jop, lit tuduhen Setan man Jop bage pe man kerina kalak si atena nembah Jahwe. Bacalah Jop 1:1, 6–2:10, kenca si e bahas penungkunen enda:

Menurut Setan, engkai maka nggit Jop patuh man Jahwe?—Nen Jop 1:9-11.
Kai nge si kataken Setan kerna kerina manusia termasuk kam?—Nen Jop 2:4.

Bacalah Jop 27:5b, kenca si e bahas penungkunen enda:

Uga cara Jop mbuktiken maka tuhu-tuhu keleng atena Jahwe?

Ibuktiken Jop keleng atena Jahwe alu tetap setia man baNa

Sibuktiken keleng ateta Jahwe adi setia kita man baNa

4. Banlah meriah ukur Jahwe

Bacalah Kuan-kuanen 27:11, kenca si e bahas penungkunen enda:

Uga nge perasan Jahwe adi pentar kam janah patuh kam man baNa? Engkai?

5. Kam banci setia man Jahwe

Adi keleng ateta Jahwe, tersuruh ukurta nceritaken kerna Ia man kalak si deban. Janah adi setia kita man Jahwe, terus silakoken e amin pe la menukah. Putar VIDEO, kenca si e bahas penungkunen enda:

VIDEO: Mbela Kinitekenndu Paksa Lit si Nentang (5:09)

Pernah nge mesera kapndu nceritaken kerna Jahwe man kalak si deban?
Bas video e, kai si nampati Grayson gelah lanai mbiar?

Reh nukahna siakap setia man Jahwe, adi ngena ateta kai si ngena ateNa janah segat ateta kai si segat ateNa. Bacalah Masmur 97:10, kenca si e bahas penungkunen enda:

Arah kai si enggo pelajarindu seh asa gundari, kai saja nge contohna si ngena ate Jahwe? Kai saja nge contohna si segat ate Jahwe?
Kai nge si banci nampati kam gelah ngena atendu kai si mehuli janah segat atendu kai si la mehuli?

6. Mbelin kel gunana adi patuh kita man Jahwe

Patuh man Jahwe me si mehulina. Bacalah Jesaya 48:17, 18, kenca si e bahas penungkunen enda:

Menurutndu, tuhu-tuhu nge teh Jahwe kai si mehulina man banta? Engkai?
Kenca erlajar kam kerna Pustaka si Badia bage pe kerna Jahwe, Dibata si benar, kai nge gunana man bandu?

LIT SI NUNGKUN: “Banci nge kuban meriah ukur Dibata arah perbahanenku?”