PELAJAREN 36

Jujurlah i bas Kai Pe

MAINKEN

Kita kerina, ateta teman-temanta jujur man banta. Jahwe pe, ateNa teman-temanNa jujur. Tapi mon-mon, jujur e mesera perban enterem kalak bas doni enda si la jujur. Kai saja nge gunana adi jujur kita i bas kai pe?

1. Kai alasen si pentingna maka perlu kita jujur?

Adi lalap kita jujur, sibuktiken man Jahwe maka keleng ateta Ia janah siergai Ia. Iteh Jahwe kerina si lit bas perukurenta bage pe perbahanenta. (Heber 4:13) Sanga jujur kita, pasti idahNa janah ergaiNa. Nina Pustaka si Badia, “Ciga ate Jahwe man kalak si licik, tapi kompak Ia erteman ras kalak si bujur.”—Kuan-kuanen 3:32.

2. Uga kita banci lalap jujur bas kegeluhenta?

Ate Jahwe ‘sikataken si tuhu sanga kita ngerana ras kalak si deban.’ (Sakaria 8:16, 17) E ertina, sanga ngerana kita ras keluargata, temanta erdahin, turang senina bas runggun, ntah pe pejabat pemerentah, la kita erbual ntah pe sibereken keterangen si erban salah kesimpulen si dat kalak. Jujur pe maksudna la kita nggit nangko ntah pe nipu. (Baca Kuan-kuanen 24:28 ras Epesus 4:28.) Sigalari ka kerina pajak si arus sigalari. (Roma 13:5-7) Bage me piga-piga cara si banci silakoken gelah “jujur bas kai pe.”—Heber 13:18.

3. Kai saja nge gunana adi jujur?

Adi tandai kalak kita kalak si jujur, tek kalak man banta. Turang senina bas runggun pe banci aman kapna ras kita. Dungna, runggun bali bagi keluarga si kompak. Selain si e, banci bersih pusuh peratenta. Adi jujur kita, banci “reh jilena pengajaren Dibata Si Nelamatken kita.” Dungna, e banci erban merhat kalak ngelayani Jahwe.—Titus 2:10.

PELAJARI TERBAGESEN

Sipelajari kari terbagesen uga perasan Jahwe adi jujur kam ras kai saja gunana adi jujur. Sibahas ka kari uga carana jujur bas erbage situasi.

4. Meriah ukur Jahwe ngidah kalak si jujur

Bacalah Masmur 44:21 ras Maleaki 3:16, kenca si e bahas penungkunen enda:

Adi menurutndu, engkai maka ula siakap lit si banci sibuniken arah Jahwe?
Adi menurutndu, uga nge perasan Jahwe adi jujur kita amin pe mesera siakap ngelakokenca?

Meriah ukur orang tua adi jujur anakna, meriah ukur Jahwe adi jujur kita

5. Teruslah jujur

Enterem kalak si erpengakap maka labo mungkin banci lalap jujur. Tapi engkai maka arus lalap kita jujur? Putar VIDEO.

VIDEO: Kai Saja si Banci Erban Kita Ermeriah Ukur?—Pusuh Peraten si Bersih (2:32)

Bacalah Heber 13:18, janah bahas uga kita banci jujur . . .

bas keluarga.
bas ingan erdahin ntah pe sekolah.
bas situasi si debanna.

6. Melala sidat gunana adi jujur kita

Mon-mon sanga kita jujur, banci saja sidat masalah. Tapi bas pudi wari pasti sigejapken gunana. Bacalah Masmur 34:12-16, kenca si e bahas penungkunen enda:

Kai nge si gejapkenndu perban kam jujur?

Perjabun banci reh paguhna adi perbulangen ras ndehara sama-sama jujur
Kalak si jujur bas dahinna, pasti tek bosna man bana
Sekalak warga negara si jujur, banci erban pejabat pemerentah reh tekna man bana

LIT SI NGATAKEN: “Sekali-sekali erbual labo dalih, si penting ula tereteh.”