PELAJAREN 42
Kai Nina Pustaka si Badia kerna Erjabu ras La Erjabu?
Bas piga-piga kebudayan, enterem kalak si erpengakap adi lenga erjabu la banci ermeriah ukur. Tapi situhuna labo kerina kalak si enggo erjabu ermeriah ukur. Janah, labo ka kerina kalak si la erjabu la ermeriah ukur. Nina Pustaka si Badia, erjabu ntah pe la erjabu duana enda pemere Dibata Jahwe.
1. Kai saja nge gunana adi la erjabu?
Nina Pustaka si Badia, “Kalak si erjabu lit manpaat idatna, tapi buen manpaat si idat kalak si la erjabu.” (Baca 1 Korinti 7:32, 33, 38.) Engkai banci sikataken “buen manpaat si idat” kalak si la erjabu? Kalak si la erjabu la perlu urusna keperlun teman geluhna. Buen kebebasenna asangken kalak si enggo erjabu. Contohna, piga-piga kalak Kristen si la erjabu banci mereken terbuen bas pelayanen. Banci kalak e lawes ku negri si deban guna erberita si meriah i je. Janah si pentingna, reh buena waktu si banci gunakenna gelah banci reh deherna ras Jahwe.
2. Kai saja nge gunana adi sah perjabun?
Bali bagi kalak si la erjabu, kalak si erjabu pe lit ka nge datna gunana. Nina Pustaka si Badia, “Ulin dua kalak asangken sekalak.” (Pengerana 4:9) E me si gejapken kalak Kristen si ndalanken pedah Pustaka si Badia i bas perjabunna. Pasangen si sah perjabunna enggo erjanji gelah terus engkelengi teman geluhna, ngergaisa, ras mehamat man bana. Biasana lebih aman ras tenang akap kalak e, asangken pasangen si enggo ras tading tapi la sah perjabunna. Selain si e, perjabun si sah banci ngelindungi anak-anakna.
3. Kai nina Jahwe kerna perjabun?
Sanga ipejabu Jahwe manusia si pertama, nina Jahwe, “Sekalak dilaki nadingken bapakna ras mamakna janah lalap ia ersada ras diberuna, jenari jadi sada kalak e.” (Kejadin 2:24) Ate Jahwe pasangen si enggo erjabu, terus sikeleng-kelengen janah tetap ersada segedang geluhna. La ibere Jahwe kalak si erjabu cerai, adi la salah sada pasangen si erjabu e erlua-lua (berzina). Adi e si terjadi, ibere Jahwe pasangen si la ersalah e erban keputusen cerai atena ntah lang. a (Matius 19:9) La ibere Jahwe kalak Kristen poligami, ntah pe la sada ngenca teman geluhna.—1 Timotius 3:2.
PELAJARI TERBAGESEN
Sibahas kari uga carana gelah meriah ukurndu bage pe ukur Jahwe, la soal kam erjabu ntah lang.
4. La erjabu e pemere, gunakenlah situasi e
Anggap Jesus situasi la erjabu e pemere. (Matius 19:11, 12) Bacalah Matius 4:23, kenca si e bahas penungkunen enda:
-
Perban Jesus la erjabu, uga ia nggunaken situasina e guna ngelayani Jahwe ras nampati kalak si deban?
Kalak Kristen si la erjabu pe, banci nggejapken keriahen ukur adi gunakenna situasina e bali bagi Jesus. Putar VIDEO, kenca si e bahas penungkunen enda:
-
Alu cara kai saja kalak Kristen si la erjabu nggunaken situasina e alu mehuli?
Tehndu nge?
Bas Pustaka si Badia la lit itetapken umur piga kalak banci erjabu. Tapi iahken Pustaka si Badia kalak si erjabu atena gelah itimaina ngasa “enggo cukup umurna.” E ertina kalak si erjabu atena ula min remaja denga, perban napsuna banci mpengaruhi keputusenna.—1 Korinti 7:36.
5. Pilihlah teman geluh alu pentar
Milih teman geluh eme salah sada keputusen si pentingna. Bacalah Matius 19:4-6, 9, kenca si e bahas penungkunen enda:
-
Engkai kalak Kristen arus ukurina lebe alu mbages sope ia erjabu?
Pustaka si Badia banci nampati kam meteh uga sipat-sipat teman geluh si mehuli. Si pentingna, daramilah teman geluh si engkelengi Jahwe. b Bacalah 1 Korinti 7:39 ras 2 Korinti 6:14. Kenca si e bahas penungkunen enda:
-
Engkai kalak Kristen arusna erjabu ras si nembah Jahwe saja?
-
Menurutndu, uga nge perasan Jahwe adi erjabu kita ras kalak si la engkelengi Ia?
Adi dua binatang si beda itamaken i bas sada pasangen, mesui kapna duana. Bage ka pe, kalak Kristen si erjabu ras kalak si la sada kiniteken, pasti ngenanami mbue masalah.
6. Bagi Jahwe lah carandu rukur kerna perjabun
Bas Israel mbarenda, piga-piga dilaki ceraikenna diberuna perban alasen si mentingken bana. Bacalah Maleaki 2:13, 14, 16, kenca si e bahas penungkunen enda:
-
Engkai maka merawa Jahwe man kalak si ceraikenna teman geluhna padahal teman geluhna e la erlua-lua?
Kalak si erlua-lua bage pe kalak si ceraikenna teman geluhna, pasti erban keluargana rate mesui
Putar VIDEO, kenca si e bahas penungkunen enda:
-
Adi teman geluhndu la nembah Jahwe, kai si banci lakokenndu gelah perjabunndu bahagia?
7. Ikutkenlah aturen Jahwe kerna perjabun
Banci saja lit kalak si arus erjuang ngikutken aturen Jahwe i bas perjabun. c Tapi pasti pasu-pasu Jahwe kalak si nggit ngikutken aturenNa. Putar VIDEO.
Bacalah Heber 13:4, kenca si e bahas penungkunen enda:
-
Adi menurutndu, ngasup nge kita ngikutken aturen Jahwe kerna perjabun? Engkai maka bage nindu?
Adi kalak Kristen erjabu ntah pe cerai, ate Jahwe arus ipastikenna maka e sah secara hukum, perban buen negara bage peraturenna. Bacalah Titus 3:1, kenca si e bahas penungkunen enda:
-
Adi enggo erjabu kam, banci nge pastikenndu maka perjabunndu e sah secara hukum pemerentah?
LIT SI NGATAKEN: “Adi lanai cocok, padin cerai saja.”
-
Kai nge nindu man bana?
KESIMPULEN PELAJAREN ENDA
Erjabu ras la erjabu e pemere bas Jahwe nari. Kalak si erjabu ras si la erjabu banci gejapkenna keriahen ukur adi ikutkenna sura-sura Jahwe.
Kai si Enggo Sipelajari?
-
Uga nge carana kalak si la erjabu banci nggunaken situasina alu mehuli?
-
Menurut Pustaka si Badia, engkai kalak Kristen arusna erjabu ras kalak si nembah Jahwe saja?
-
Menurut Pustaka si Badia sada ngenca alasen si banci erban kalak cerai. Kai e?
DARAMI TERBUEN
Kai ertina erjabu ras “pengikut Tuan” saja?
Tontonlah dua video singkat si banci nampati kam erban keputusen si mehuli kerna ngerondong ras erjabu.
Tontonlah pengalamen sekalak turang seninata si ergan akapna kai si enggo bereken Jahwe man bana asangken kai si enggo itadingkenna.
Kai si perlu iukuri kalak sope lenga banna keputusen kerna cerai ntah pe ranggung ras teman geluhna?
“Hormatilah ‘Apa yang Telah Disatukan Allah’” (Menara Pengawal Desember 2018)
b Bas piga-piga kebudayan, orang tua si milih ise si jadi teman geluh anakna. Adi bage situasina, orang tua si perkeleng pasti pilihna kalak si engkelengi Jahwe. Pentingen akapna si e asangken pangkat ras kebayaken.
c Adi tading kam ras pasangenndu tapi la kena erjabu, banci banndu keputusen erjabu kam ras ia ntah putuskenndu hubungen kena.
