PELAJAREN 43
Kai Nina Pustaka si Badia kerna Inemen si Lit Alkoholna?
I sebelang doni, beda-beda pendapat kalak kerna inemen si lit alkoholna. Lit si la kapna masalah sesekali nginemsa sanga pulung ras teman-temanna. Lit ka si la nggit sitik pe nginemsa. Tapi, lit ka si nginemsa seh ngasa mabuk. Kai nge nina Pustaka si Badia kerna inemen si lit alkoholna?
1. Salah nge minem inemen si lit alkoholna?
Bas Pustaka si Badia, labo lit ikataken la banci minem inemen si lit alkoholna. Malahen salah sada pemere Dibata si ikataken bas Pustaka si Badia eme “anggur si erban manusia ermeriah ukur.” (Masmur 104:14, 15) Selain si e, piga-piga umat Dibata si iceritaken bas Pustaka si Badia pe, inemna ka nge inemen si lit alkoholna.—1 Timotius 5:23.
2. Kai nina Pustaka si Badia man kalak si pilihna minem inemen si lit alkoholna?
Bas Pustaka si Badia ikataken, “Ula ersada ras kalak si mbuesa minem anggur.” (Kuan-kuanen 23:20) Jadi, la meriah ukur Jahwe adi melalasa siinem inemen si lit alkoholna bage pe adi mabuk kita. (Galati 5:21) Adi nggit kita nginemsa, ula mbuesa siinem, termasuk sanga kita sisada. Adi mbuesa siinem, banci dungna lanai kita ngasup rukur janah lanai banci sikendaliken ranan bage pe perbahanenta. Selain si e, banci ka kita sakit. Adi la banci sikendaliken asa buena siinem, pangen sitik pe la pedah siinem.
3. Uga carana ngergai keputusen kalak si deban kerna inemen si lit alkoholna?
Kerna minem inemen si lit alkoholna, e keputusenta masing-masing. Jadi, adi lit kalak si nggit nginemsa tapi labo mbuesa ntah pe rusursa, ula sihakimi ia. Janah adi lit kalak si la nggit nginemsa, ula sipaksa ia. (Roma 14:10) Selain si e, adi siteh lit kalak si terganggu akapna adi siinem, pangen la siinem adi sangana kita ras ia. (Baca Roma 14:21.) Perlu siukuri ‘kepentingen kalak si deban labo kepentingenta saja.’—Baca 1 Korinti 10:23, 24.
PELAJARI TERBAGESEN
Sibahas kari prinsip-prinsip Pustaka si Badia si banci nampati kita erban keputusen kerna minem inemen si lit alkoholna, ras asa buena siinem. Sibahas ka kari kai si banci silakoken adi lit kebiasanta mbuesa ntah pe rusursa nginem inemen e.
4. Banlah keputusen inemndu ntah lang
Uga pendapat Jesus kerna minem inemen si lit alkoholna? Guna meteh jawapenna, mari sibahas mukjizat Jesus si pertama. Bacalah Johanes 2:1-11, kenca si e bahas penungkunen enda:
-
Arah mukjizat e, uga nge pendapat Jesus kerna inemen si lit alkoholna bage pe kalak si nginemsa?
-
Perban la ilarang Jesus kita minem inemen si lit alkoholna, banci nge sihakimi kalak si nggit nginemsa?
Memang, kalak Kristen la ilarang minem inemen si lit alkoholna. Tapi perlu siukuri lebe adi siinem ateta. Bacalah Kuan-kuanen 22:3, kenca si e ukurilah uga situasi enda banci mpengaruhi keputusenndu:
-
Adi kam nandangi maba kendaran ntah pe erdahin alu nggunaken mesin.
-
Adi kam sangana hamil.
-
Adi isaranken dokter ula inemndu inemen si lit alkoholna.
-
Adi la terkendalikenndu asa buena si banci inemndu.
-
Adi bas inganndu tading ilarang minem inemen si lit alkoholna.
-
Adi sangana kam ras kalak si la nggit nginemsa, perban mbarenda la terkendalikenna tiap inemna.
Perlu nge isediakenndu inemen si lit alkoholna bas acara perjabun ntah pe acara si debanna? Guna meteh kai si banci nampati kam erban keputusen, putar VIDEO.
Bacalah Roma 13:13 ras 1 Korinti 10:31, 32. Kenca baca kena tiap ayat, bahaslah penungkunen enda:
-
Uga prinsip bas ayat enda banci nampati kam erban keputusen si erban Jahwe senang?
Tiap kalak Kristen banci iputuskenna inemna inemen si lit alkoholna ntah lang. Amin pe sekali-sekali nggit ia nginemsa, banci jadi lit situasi si erban ia la nggit nginemsa.
5. Banlah keputusen asa buena inemndu
Adi iputuskenndu minem inemen si lit alkoholna, ingetlah enda: Aminna pe la ilarang Jahwe siinem, la meriah ukurNa adi mbuesa siinem. Engkai maka bage? Bacalah Hosea 4:11, 18, kenca si e bahas penungkunen enda:
-
Kai nge si banci terjadi adi mbuesa siinem inemen si lit alkoholna?
Uga carana gelah ula mbuesa siinem? Arus siteh keterbatasenta. Bacalah Kuan-kuanen 11:2, kenca si e bahas penungkunen enda:
-
Engkai maka perlu jelas banndu batasna asa buena si banci inemndu?
6. Uga carana gelah lanai mbuesa inemndu?
Nenlah uga sekalak dilaki dungna lanai mbuesa ntah pe rusursa minem inemen si lit alkoholna. Putar VIDEO, kenca si e bahas penungkunen enda:
-
Kai pengaruh alkohol ku perbahanen Dmitry?
-
Banci nge mis pengadina kebiasan mbuesa minem ntah pe rusursa minem?
-
Uga nge maka dungna banci pengadina kebiasan si la mehuli e?
Bacalah 1 Korinti 6:10, 11, kenca si e bahas penungkunen enda:
-
Kai nina Pustaka si Badia kerna mabuk?
-
Kai buktina kalak si pernah mbuesa minem inemen si lit alkoholna banci berubah?
Bacalah Matius 5:30, kenca si e bahas penungkunen enda:
-
Bas ayat e, motong tan maksudna siban pengorbanen gelah banci siban meriah ukur Jahwe. Kai si banci lakokenndu adi sangana kam erjuang mpengadi kebiasan mbuesa minem? a
Bacalah 1 Korinti 15:33, kenca si e bahas penungkunen enda:
-
Adi bergaul kam ras kalak si mbuesa minem inemen si lit alkoholna, kai nge pengaruhna man bandu?
LIT SI NUNGKUN: “Salah kin minem inemen si lit alkoholna?”
-
Uga nindu njawapsa?
KESIMPULEN PELAJAREN ENDA
Salah sada pemere Jahwe si erban meriah ukurta eme inemen si lit alkoholna. Tapi la meriah ukurNa adi mbuesa siinem ntah pe mabuk kita.
Kai si Enggo Sipelajari?
-
Kai nina Pustaka si Badia kerna inemen si lit alkoholna?
-
Kai nge bahayana adi mbuesa siinem?
-
Uga carata ngergai keputusen kalak si deban kerna minem inemen si lit alkoholna?
DARAMI TERBUEN
Uga kalak si nguda denga banci erban keputusen si mehuli kerna inemen si lit alkoholna?
Kai saja si banci lakokenndu guna mpengadi kebiasan mbuesa minem inemen si lit alkoholna?
“Pertahankan Sikap yang Sepatutnya Terhadap Alkohol” (Menara Pengawal 1 Januari 2010)
Banci nge kalak Kristen bersulang?
Bas pengalamen “Saya Adalah Tong Bolong,” bacalah pengalamen sekalak dilaki si mbarenda mbuesa minem banci dungna berubah.
a Kalak si enggo candu minem inemen si lit alkoholna, mungkin perlu penampat kalak si ahli. Melala dokter si ngataken maka kalak si bage, pangen sitik pe lanai inemna.
