Ajarken Jesus pengikutna gelah “lanai jadi bagin doni enda.” (Johanes 15:19) Enda ertina kita arus tetap netral. Maksudna la sidukung pihak si apai pe i bas masalah politik bage pe perang. Mon-mon enda la menukah. Banci saja tokoh-tokohi kalak kita perban tetap kita netral. Uga carana kita banci tetap netral janah terus setia man Dibata Jahwe?

1. Uga nge pandangen kalak Kristen situhu-tuhu nandangi pemerentah?

Ergai kalak Kristen situhu-tuhu kel pemerentah. Sipatuhi perentah Jesus guna ‘mereken man Kaisar kai si jadi bagin Kaisar.’ Emaka sipatuhi undang-undang si lit bas negarata, misalna undang-undang guna nggalar pajak. (Markus 12:17) Ikataken bas Pustaka si Badia maka pemerentah manusia banci denga merentah perban ijinken Jahwe. (Roma 13:1) E ertina, pemerentahen manusia terbatas kuasana. Emaka tek kita, Dibata ras KerajanNa ngenca si banci ndungi kerina masalah manusia.

2. Uga carata ncidahken maka kita tetap netral?

Bali bagi Jesus, la kita ikut campur bas urusen politik. Sanga idah kalak Jesus erban mukjizat, usahaken kalak e gelah Jesus jadi raja, tapi Jesus la nggit. (Johanes 6:15) Engkai? Perban nina Jesus, “Kerajanku labo bagin arah doni enda.” (Johanes 18:36) Selaku murid Jesus, banci sicidahken alu erbage cara maka kita tetap netral. Misalna, la kita ikut erperang. (Baca Miha 4:3.) Selain si e, amin pe siergai lambang-lambang negara bagi bendera, tapi la siangkat tanta guna ngormati lambang-lambang e. Perban adi e silakoken, seri saja kita ras nembah lambang-lambang e. (1 Johanes 5:21) La ka kita nggit ndukung ntah pe nentang salah sada partai ntah pe kandidat politik. Enda ndai me piga-piga contoh si ncidahken maka kita tuhu-tuhu setia man pemerentahen Dibata, eme kap KerajanNa.

 PELAJARI TERBAGESEN

3. Kalak Kristen situhu-tuhu tetap netral

Jesus ras murid-muridna mereken usihen i bas kenetralen. Bacalah Roma 13:1, 5-7 ras 1 Petrus 2:13, 14. Dung e, putar VIDEO. Kenca si e bahas penungkunen enda:

• Engkai maka arus siergai pemerentah?

• Uga carata ncidahken maka kita patuh man pemerentah?

Sanga terjadi perang, piga-piga negara ngataken maka kalak e netral. Tapi ibere kalak e penampat man duana pihak si sangana erperang e. Uga nge situhuna perbahanen kalak si netral? Bacalah Johanes 17:16. Dung e, putar VIDEO. Kenca si e bahas penungkunen enda:

• Kai nge maksudna tetap netral?

Uga adi ituntut pemerentah kita ngelakoken sada hal si la sesuai ras undang-undang Dibata? Bacalah Perbahanen Rasul-Rasul 5:28, 29. Dung e, putar VIDEO. Kenca si e bahas penungkunen enda:

• Adi undang-undang manusia ras undang-undang Dibata ertentangen, undang-undang si apai nge si arus sipatuhi?

• Menurutndu, uga nge contoh situasina si erban kalak Kristen la patuh man pemerentah?

 4. Tetaplah netral bas perukuren ras perbahanen

Bacalah 1 Johanes 5:21. Dung e, putar VIDEO. Kenca si e bahas penungkunen enda:

• Bas video ndai, engkai maka Ayenge la terlibat bas partai politik ntah pe bas upacara nasional, misalna alu angkat tan guna hormat bendera?

• Menurutndu, enggo nge tepat keputusen Ayenge e?

Bas situasi kai ka nge si mesera siakap tetap netral? Putar VIDEO, kenca si e bahas penungkunen enda:

• Uga kita banci tetap netral sanga lit pertandingen olahraga internasional?

• Uga kita banci tetap netral adi lit sada keputusen arah politikus si banci erban kita untung ntah pe rugi?

• Kai pengaruhna man banta adi siikuti berita kerna politik ntah pe adi erteman kita ras kalak si meriah akapna ncakapken politik?

 KESIMPULEN PELAJAREN ENDA

Arus iusahaken kalak Kristen tetap netral secara politik i bas perukuren, ranan, ras perbahanenna.

Kai si Enggo Sipelajari?

• Uga nge arusna perbahanenta man pemerentahen manusia?

• Engkai maka arus kita tetap netral bas politik?

• Bas situasi kai saja nge banci mesera siakap tetap netral?