PELAJAREN 47
Enggo nge Kam Siap Iperidiken?
Enggo melala si ipelajarindu kerna Jahwe arah Pustaka si Badia. Janah banci jadi piga-piga petunjukNa enggo idalankenndu bas kegeluhenndu. Tapi, banci jadi lit denga si erban kam mbiar mbaktiken diri man Jahwe ras iperidiken. Bas pelajaren enda, sibahas kari kai saja si biasana erban kalak lenga siap iperidiken, janah kai si nampati kam gelah banci iperidiken.
1. Arus nge mbue kel pemetehndu gelah banci iperidiken?
Memang gelah banci iperidiken, arus lit ‘pemetehndu si tepat kerna kebenaren.’ (1 Timotius 2:4) Tapi labo maksudna arus banci jawapndu kerina penungkunen kerna Pustaka si Badia. Kalak si enggo ndekah iperidiken pe, perlu denga terus erlajar. (Kolose 1:9, 10) Tapi amin gia bage, memang perlu tehndu ajaren-ajaren dasar Pustaka si Badia. Adi pastikenndu atendu enggo nge cukup pemetehndu, pertua-pertua banci nampati kam.
2. Kai saja nge si arus lakokenndu gelah banci kam iperidiken?
Gelah banci kam iperidiken, arus kam ‘ertobat janah mulihken.’ (Baca Perbahanen Rasul-Rasul 3:19.) E ertina arus isesalindu kesalahen si enggo lakokenndu, janah pindondu pengampunen man Dibata Jahwe. Selain si e, lanai lakokenndu kai si la ngena ateNa janah lakokenndu kai si ngena ateNa. Si perlu ka ilakokenndu eme teratur reh ku perpulungen janah erberita ras turang senina bas runggun.
3. Engkai maka la perlu kita mbiar guna iperidiken?
Lit kalak si mbiar la banci tepatina janjina man Jahwe. Tapi situhuna labo pindo Jahwe kita sempurna. UmatNa si setia mbarenda pe, mon-mon lakokenna ka nge kesalahen, kam pe bage ka nge. (Baca Masmur 103:13, 14.) Tapi adi usahakenndu ngelakoken si mehulina, pasti meriah ukur Jahwe! Janah sampatiNa nge kam. Selain si e, ate Dibata Jahwe tek kita maka la lit kai pe “si banci nirangken kita arah kekelengen Dibata.”—Baca Roma 8:38, 39.
PELAJARI TERBAGESEN
Sibahas kari engkai maka adi reh deherna kam ras Jahwe janah alokenndu penampatNa, lanai kam mbiar iperidiken.
4. Usahakenlah lebih nandai Jahwe
Gelah banci kam iperidiken, perlu tandaindu kel Jahwe. Alu bage, banci keleng kel atendu Ia janah lakokenndu kai si ngena ateNa. Putar VIDEO guna meteh uga kalak si erlajar i belang-belang doni dungna banci iperidiken. Kenca si e bahas penungkunen enda:
-
Kai nge si nampati kalak bas video e gelah siap iperidiken?
Bacalah Roma 12:2, kenca si e bahas penungkunen enda:
-
Arah kai si enggo pelajarindu, lit nge ajaren Pustaka si Badia si lenga kam yakin e kebenaren? Lenga nge kam yakin Saksi-Saksi Jahwe ngajarken kebenaren?
-
Adi bage, kai nge si banci lakokenndu gelah kam yakin?
5. Hadapilah tentangen
Kerina kalak si atena mbaktiken diri ras iperidiken, pasti ngadapi tentangen. Contohna, putar VIDEO, kenca si e bahas penungkunen enda:
-
Bas video e, tentangen kai si adapi Narangerel sanga atena ngelayani Jahwe?
-
Engkai maka kekelengenna man Jahwe erban ia ngasup ngadapi tentangen e?
Bacalah Kuan-kuanen 29:25 ras 2 Timotius 1:7, kenca si e bahas penungkunen enda:
-
Kai nge si banci nampati kita gelah pang janah ngasup ngadapi kerina tentangen?
6. Teklah pasti kam sampati Jahwe
Pasti sampati Jahwe kam gelah banci banndu meriah ukurNa. Putar VIDEO, kenca si e bahas penungkunen enda:
-
Kai nge si erban kalak si erlajar bas video e lenga siap iperidiken?
-
Kai nge si erban ia tek pasti sampati Jahwe ia?
Bacalah Jesaya 41:10, 13, kenca si e bahas penungkunen enda:
-
Kai nge si erban kam tek maka pasti kam ngasup nepati janjindu sanga kam mbaktiken diri man Jahwe?
7. Ergailah kekelengen Jahwe
Adi rusur ukurindu uga kelengna ate Jahwe man bandu, pasti keleng atendu Ia janah ngata bujur atendu man baNa, ras layanindu atendu Ia seh rasa lalap. Bacalah Masmur 40:5, kenca si e bahas penungkunen enda:
-
Arah kerina pasu-pasu Jahwe, si apai saja nge akapndu si mehergana?
Nabi Jeremia keleng atena Jahwe ras kata-kata Jahwe, janah sada kehamaten kapna banci jadi wakil Jahwe. Nina, “Kata-kataNdu erban meriah ukurku janah senang kuakap. Sebap aku si maba gelarNdu, o Dibata Jahwe.” (Jeremia 15:16) Bahaslah penungkunen enda:
-
Engkai maka sada kehamaten banci jadi Saksi Jahwe?
-
Merhat nge kam iperidiken jadi Saksi Jahwe?
-
Kai nge tentangenna si erbanca lenga kam iperidiken?
-
Kai si perlu lakokenndu gelah banci kam iperidiken?
LIT SI NGATAKEN: “Mbiar aku la aku ngasup nepati janjiku man Jahwe.”
-
Bage ka nge perasanndu?
KESIMPULEN PELAJAREN ENDA
Alu penampat Jahwe, pasti kam ngasup ngadapi tentangen gelah banci iperidiken.
Kai si Enggo Sipelajari?
-
Arus nge mbue kel pemetehndu gelah banci iperidiken?
-
Perubahen kai nge si perlu ibanndu gelah banci kam iperidiken?
-
Engkai maka la perlu kam mbiar guna iperidiken?
DARAMI TERBUEN
Kai nge si arusna ngiahken kam iperidiken?
Uga carana ngatasi tentangen gelah banci iperidiken?
“Engkai maka Lalap Aku Lenga Iperidiken?” (Sora Ermomo Maret 2019)
Tontonlah pengalamen sekalak dilaki si dungna banci iperidiken kenca atasina masalahna.
Tangtangna Ataa sangsi guna iperidiken. Tapi kai si dungna erban ia yakin iperidiken?
