PELAJAREN 50
Uga Carana gelah Keluargata Bahagia?—Bagin 2
Anak-anak eme pemere arah Jahwe. Ate Jahwe ijaga orang tua min pemereNa e. Bereken Jahwe nasehat man orang tua gelah banci dalankenna tanggung jawapna alu mehuli. BerekenNa ka nasehat man anak-anak gelah banci ikut erban keluargana bahagia.
1. Kai nasehat Jahwe man orang tua?
Ate Jahwe orang tua engkelengi anakna janah mereken melala waktu man anak-anakna. Selain si e, ate Jahwe orang tua ngelindungi anak-anakna arah bahaya. Janah igunaken orang tua prinsip-prinsip si lit bas Pustaka si Badia guna ngajari anakna. (Kuan-kuanen 1:8) Nasehat Jahwe man perbapan, “Pebelinlah [anak-anak kena] alu . . . pengajaren Jahwe.” (Baca Epesus 6:4.) Adi ikutken orang tua nasehat arah Jahwe i bas mpebelin anak, janah la serahkenna tanggung jawapna e man kalak si deban, e erban meriah ukur Jahwe.
2. Kai nasehat Jahwe man anak-anak?
Perentah Jahwe man anak-anak, “Patuhlah kena man orang tua kena.” (Baca Kolose 3:20.) Adi anak-anak matuhi ras ngergai orang tuana, e banci erban meriah ukur Jahwe bage pe ukur orang tuana. (Kuan-kuanen 23:22-25) Jesus eme contoh si mehuli man anak-anak. Sanga ia kitik denga, amin pe ia sempurna, tetap patuhina ras ergaina orang tuana si la sempurna.—Lukas 2:51, 52.
3. Uga carana gelah keluargandu reh deherna ras Dibata?
Adi lit anakndu, pasti atendu anakndu e engkelengi Jahwe. Uga carandu nampatisa? Perlu ikutkenndu nasehat Pustaka si Badia, nina, ‘Arus ulih-ulihi kena ngajarken Kata-Kata Jahwe man anak-anak kena. Cakapkenlah e sanga kundul i rumah ras sanga bas perdalanen.’ (Ulangen 6:7) Adi kam orang tua, pasti enggo tehndu gelah banci inget anak-anak kerna sada hal, arus mulih-ulih katakenndu. Emaka maksud ayat ndai, arus daramindu kesempaten gelah banci rusur ceritakenndu kerna Jahwe man anakndu. Perlu kel iban orang tua waktu tiap minggu guna ibadah keluarga. Bicara lenga pe lit anakndu, mbelin ka nge gunana adi tiap minggu banndu waktu guna mpelajari Kata Dibata.
PELAJARI TERBAGESEN
Sibahas kari piga-piga nasehat si banci erban keluarga dame ras bahagia.
4. Ajarilah anakndu alu cara si perkeleng
Labo menukah ngajari anak. Uga Pustaka si Badia banci nampati kam? Bacalah Jakup 1:19, 20, kenca si e bahas penungkunen enda:
-
Uga orang tua ncidahken kekelengen sanga ia komunikasi ras anakna?
-
Engkai maka la mehuli adi orang tua ndisiplin anakna sanga merawa? a
5. Lindungilah anakndu
Guna ngelindungi anakndu, penting kel bahasndu kerna seks ras tiap anakndu. Banci jadi mehangke kam ncakapkenca. Putar VIDEO, kenca si e bahas penungkunen enda:
-
Engkai maka piga-piga orang tua mesera kapna ncakapken kerna seks ras anakna?
-
Uga cara piga-piga orang tua njelasken kerna seks man anakna?
Bagi si enggo ikataken bas Pustaka si Badia, doni Setan enda reh dekahna reh jahatna. Bacalah 2 Timotius 3:1, 13, kenca si e bahas penungkunen enda:
-
Piga-piga kalak jahat si imaksudken bas ayat 13, eme kalak si ngelecehken anak secara seksual. Jadi, engkai maka penting orang tua ngajarken anakna kerna seks ras uga carana ngelindungi anakna e arah kalak si ngelecehken ndai?
Tehndu nge?
Melala artikel ras video si enggo iban Saksi-Saksi Jahwe guna nampati orang tua ngajarken anakna kerna seks, ras ngelindungi anakna arah kalak si ngelecehken secara seksual. Contohna, nen:
-
Lindungi Anak Kalian (video)
-
“Mengajar Anak tentang Seks” (Sadarlah! No. 5 2016)
6. Hamatilah orang tuandu
Adi anak-anak ras remaja sopan ngerana man orang tuana, e buktina mehamat ia man orang tuana. Putar VIDEO, kenca si e bahas penungkunen enda:
-
Kai gunana adi kalak si nguda denga sopan ngerana man orang tuana?
-
Uga cara si sopan ngerana man orang tua?
Bacalah Kuan-kuanen 1:8, kenca si e bahas penungkunen enda:
-
Uga nge arusna tanggapen anak-anak sanga inasehati orang tuana?
7. Ras-raslah kena nembah Jahwe sada keluarga
Bas tiap minggu, iban Saksi-Saksi Jahwe waktuna guna ras-ras nembah Jahwe sada keluarga. Uga nge iban kalak e carana? Putar VIDEO, kenca si e bahas penungkunen enda:
-
Kai si ilakoken piga-piga keluarga gelah banci teratur Ibadah Keluarga?
-
Kai si banci ilakoken orang tua gelah ibadah keluargana meriah janah erguna?—Nen gambar bas awal pelajaren enda.
-
Tentangen kai nge si erban mesera akap keluarga kena ngelakoken ibadah keluarga?
Bas Israel mbarenda, ate Jahwe tiap keluarga teratur mbahas Kata Dibata. Bacalah Ulangen 6:6, 7, kenca si e bahas penungkunen enda:
-
Uga kam banci ngikutken prinsip si lit bas ayat e?
Piga-piga ide guna ibadah keluarga:
-
Persiapkenlah bahan perpulungen.
-
Baca ras bahaslah cerita si lit bas Pustaka si Badia si meriah akap keluargandu.
-
Adi lit anakndu si kitik denga, download ntah cetaklah bahan-bahan pelajaren man anak-anak arah jw.org.
-
Adi lit anakndu si enggo remaja, bahaslah artikel kerna remaja si lit bas jw.org.
-
Banlah drama ras anak-anakndu kerna cerita si lit bas Pustaka si Badia.
-
Tonton ras bahaslah sada video arah jw.org.
LIT SI NGATAKEN: “Sibuk kel kami erdahin. Emaka labo lit waktu kami ngajari anak-anak kami kerna Pustaka si Badia.”
-
Uga nge nindu man bana?
KESIMPULEN PELAJAREN ENDA
Ate Jahwe orang tua engkelengi, ngajari, ras ngelindungi anak-anakna. Janah anak-anak arus mehamat ras patuh man orang tuana. Selain si e, ate Jahwe kerina anggota keluarga ras-ras nembah Ia.
Kai si Enggo Sipelajari?
-
Uga orang tua banci ngajari ras ngelindungi anakna?
-
Uga anak-anak banci mehamat man orang tuana?
-
Kai gunana adi teratur kita ibadah keluarga tiap minggu?
DARAMI TERBUEN
Kai saja si banci ajarkenndu man anak-anak gelah kalak e jadi kalak si mehuli?
“6 Pelajaran Penting untuk Anak-Anak” (Sadarlah! No. 2 2019)
Kai nina Pustaka si Badia man kalak si ngurus orang tuana si enggo lansia?
“Apa Pendapat Alkitab tentang Mengurus Orang Tua yang Lansia?” (Artikel web)
Uga sekalak dilaki si tangtangna la tehna cara mpebelin anak tapi dungna banci jadi bapak si mehuli?
Uga sekalak perbapan banci kompak ras anakna si dilaki?
“Bagaimana Seorang Ayah Bisa Tetap Dekat dengan Anak Lelakinya?” (Menara Pengawal 1 November 2011)
a I bas Pustaka si Badia kata “disiplin” lit hubungenna ras mereken petunjuk, pengajaren, ras mpekena si salah. Labo maksudna penyiksan ntah pe perbahanen si kejam.—Kuan-kuanen 4:1.
