Beda-beda selera kalak kerna peruis ras penampilen. Bas Pustaka si Badia, lit prinsip si banci nampati kita erban pilihen kerna si e. Adi siikutken prinsip e, peruis ras penampilenta banci sesuai ras selerata, janah banci ka siban Jahwe senang. Mari sibahas piga-piga prinsip e.

1. Prinsip kai saja si banci nampati kita erban pilihen kerna peruis ras penampilen?

Arus sipilih ‘paken si sopan ras la lebihsa, janah beluh min kita rukur.’ Selain si e, penampilenta pe arus bersih gelah banci idah kalak maka kita “nembah Dibata.” (1 Timotius 2:9, 10) Perdiatekenlah empat prinsip enda: (1) Peruista arus “sopan.” Bas perpulungen banci idahndu beda-beda nge peruis ras penampilen umat Jahwe. Tapi arah peruis ras gaya buk kalak e, banci siidah maka ergaina kel Dibata Jahwe. (2) Siusahaken gelah peruista “la lebihsa.” Ertina, ula siban iperdiateken kalak kel kita perban peruista, ntah pe turah perukurenna si salah perban peruista. (3) Sicidahken maka ‘beluh kita rukur’ adi la siikutken kerina mode peruis ras penampilen si terbaru. (4) Penampilenta arus ncidahken maka kita “nembah Dibata.” Ertina, arah peruista ras penampilenta banci min idah kalak maka kita nembah Dibata si benar.​—1 Korinti 10:31.

2. Kai pengaruh peruista ras penampilenta man turang seninata?

Memang, bebas nge kita milih kai ateta sipake. Tapi, perlu siukuri kai pengaruhna e man kalak si deban. Siusahaken asa bancina la erban kalak tertuktuk. Ateta “erban kalak si deban ermeriah ukur alu kai si mehuli gelah ia ipegegehi.”​—Baca Roma 15:1, 2.

3. Engkai maka peruista banci erban kalak tertarik erlajar kerna Jahwe?

Perlu siperdiateken peruista katawari pe. Terlebih ka sanga kita erberita ntah pe sanga reh ku perpulungen. La ateta peruista erban kalak lanai tertarik nandangi berita si meriah. Tapi, ateta min peruista banci erban kalak tertarik nandangi kebenaren janah erban “reh jilena pengajaren Dibata Si Nelamatken kita.”​—Titus 2:10.

 PELAJARI TERBAGESEN

4. Banci simuliaken Jahwe adi sipastiken penampilenta tetap mehuli

Kai alasen si pentingna maka arus sijaga penampilenta? Bacalah Masmur 47:2, kenca si e bahas penungkunen enda:

• Perban penampilenta banci mpengaruhi perukuren kalak kerna Jahwe, paken si uga nge si arus sipilih?

• Adi menurutndu, perlu nge siperdiateken penampilenta sanga kita lawes ku perpulungen ntah pe erberita? Engkai maka bage nindu?

 5. Kai si banci nampati kita sanga erban keputusen kerna peruis ras penampilenta?

Putar VIDEO.

La soal pakenta merga ntah lang, si pentingna eme pakenta arus bersih janah cocok ras kegiaten si sangana silakoken. Bacalah 1 Korinti 10:24 ras 1 Timotius 2:9, 10. Kenca si e, bahaslah engkai maka kita la nggit make paken si . . .

• la rapi, la bersih, ntah pe santaisa.

• banci erban kalak tergoda perban ketatsa ntah pe terbuka.

Memang kalak Kristen la perlu patuh man Undang-Undang Musa, tapi arah undang-undang e banci siteh uga perukuren Jahwe. Bacalah Ulangen 22:5, kenca si e bahas penungkunen enda:

• Engkai maka la kita nggit penampilen ras pakenta erban dilaki teridah bagi diberu ntah diberu teridah bagi dilaki?

Bacalah 1 Korinti 10:32, 33 ras 1 Johanes 2:15, 16, kenca si e bahas penungkunen enda:

• Engkai maka arus sipastiken penampilenta la erban terganggu pusuh kalak si lit i deherta bage pe turang senina bas runggun?

• Mode paken ras penampilen si uga nge si melala bas inganndu?

• Arah kerina mode paken ras penampilen e, lit nge si la cocok man kalak Kristen? Engkai maka bage nindu?

 KESIMPULEN PELAJAREN ENDA

Adi siban keputusen si mehuli kerna peruis ras penampilenta, e ertina siergai Jahwe bage pe kalak si deban.

Kai si Enggo Sipelajari?

• Engkai maka penting akap Jahwe peruis ras penampilenta?

• Prinsip kai saja si banci nampati kita erban keputusen kerna penampilen?

• Uga penampilenta banci mpengaruhi pandangen kalak kerna ibadah si benar?