PELAJAREN 53

Pilihlah Hiburen si Ngena Ate Jahwe

MAINKEN

Jahwe e “Dibata si ermeriah ukur.” (1 Timotius 1:11) AteNa meriah min ukurta ndalani geluhta janah lit min waktuta santai. Tapi uga carana gelah sanga kita santai meriah ka siban ukur Jahwe? Bas pelajaren enda sibahas kari kerna si e.

1. Kai si perlu ingetndu sanga kam milih hiburen?

Kai nge si lakokenndu sanga kam santai? Piga-piga kalak banna kegiatenna i rumah. Misalna mbaca buku, megiken musik, nonton, ntah pe nggunaken internet. Lit ka kalak si gawah-gawah ras temanna. Misalna naik gunung, ridi-ridi, ntah pe banna permainen ras teman-temanna. Kai pe si pilihndu, pastikenlah e “ngena ate Tuhan.” (Epesus 5:10) Engkai maka bage? Perban melala hiburen si meriah akap kalak gundari lit kekerasenna, perbahanen seks si salah, ntah pe lit begu-beguna, janah e segat ate Jahwe. (Baca Masmur 11:5.) Kai si banci nampati kita milih hiburen alu pentar?

Adi sipilih temanta si keleng atena Jahwe, banci berekenna pengaruh si mehuli man banta. Dungna banci sipilih hiburenta alu pentar. Bagi si enggo sipelajari bas Pelajaren 48, “kalak si erteman ras kalak pentar jadi pentar.” Tapi, adi erteman kita ras kalak si la nggit ngikutken standar Jahwe, ‘pasti kita kena cilaka.’—Kuan-kuanen 13:20.

2. Engkai maka perlu sibatasi waktuta guna hiburen?

Amin pe pilihen hiburenta labo salah, perlu denga kita hati-hati gelah ula mbuesa waktuta ku je. Sebap banci kari lanai lit waktuta ngelakoken kai si lebih penting. Nina Pustaka si Badia, “Gunakenlah waktu kena alu mehuli.”—Baca Epesus 5:15, 16.

PELAJARI TERBAGESEN

Sibahas kari uga carana gelah banci banndu keputusen si mehuli kerna hiburen.

3. Pilihlah hiburen si mehuli

Engkai maka arus hati-hati kita milih hiburen? Putar VIDEO, kenca si e bahas penungkunen enda:

VIDEO: Hiburen si Uga Nge si Arus Kupilih? (4:39)

Kai si seri arah pertandingen gladiator mbarenda ras piga-piga hiburen si lit gundari?
Bas video e, pelajaren kai si dat Danny kerna hiburen?

Bacalah Roma 12:9, kenca si e bahas penungkunen enda:

Uga ayat enda banci nampati kam milih hiburen alu pentar?

Kai saja nge si segat ate Jahwe? Bacalah Kuan-kuanen 6:16, 17 ras Galati 5:19-21. Kenca tiap ayat ibaca, bahaslah penungkunen enda:

Arah kerina si ituriken bas ayat ndai, kai saja nge si melala bas hiburen si gundari?

Cara milih hiburen alu pentar

Cuba ukuri penungkunen enda:

Lit nge si segat ate Jahwe bas hiburen e?
Lanai nge aku sempat ngelakoken kai si lebih penting gara-gara hiburen e?
Reh kompakna nge aku ras kalak si la engkelengi Jahwe gara-gara hiburen e?

Sanga kita maba motor, perlu sihindari bahaya. Sanga kita milih hiburen, perlu sihindari kerina si la mehuli pengaruhna man banta.

4. Gunakenlah waktundu alu pentar

Putar VIDEO, kenca si e bahas penungkunen enda:

VIDEO: Kai nge si Erban Keri Waktundu? (2:45)

Amin pe turang seninata si lit bas video e labo ngenen hiburen si la mehuli, kai akibatna perban melalasa waktuna ngenen hiburen?

Bacalah Pilipi 1:10, kenca si e bahas penungkunen enda:

Uga ayat e banci nampati kita nentuken asa buena waktuta guna hiburen?

5. Pilihlah hiburen alu pentar

Amin pe piga-piga hiburen la ngena ate Jahwe, melala denga hiburen si ngena ateNa. Bacalah Pengerana 8:15 ras Pilipi 4:8, kenca si e bahas penungkunen enda:

Hiburen kai nge si meriah akapndu tapi tetap ngena ate Jahwe?

Melala hiburen ras rekreasi si banci pilihndu janah ngena ka ate Jahwe

LIT SI NGATAKEN: “Labo lit salahna nonton hiburen si lit kekerasenna, perbahanen seks si salah, ntah pe si lit begu-beguna. Si penting ula lakoken.”