PELAJAREN 54

Tugas “Budak si Setia ras Pentar”

MAINKEN

Jesus eme Kepala runggun Kristen. (Epesus 5:23) Gundari, surga nari ipinpinna pengikutna i doni arah “budak si setia ras pentar.” (Baca Matius 24:45.) Perban budak si setia e enggo ilantik Jesus, emaka lit hak kalak e erban keputusen. Tapi arus terus kalak e patuh man Kristus janah layanina senina-senina Kristus. Ise kin budak si setia ras pentar e? Uga kalak e ngurus kita?

1. Ise kin “budak si setia ras pentar” e?

Mbarenda ipilih Jahwe sekalak dilaki ntah pe sekelompok dilaki guna minpin umatNa. (Maleaki 2:7; Heber 1:1) Kenca Jesus mate, rasul-rasul bage pe pertua-pertua i Jerusalem me si minpin umat Dibata. (Perbahanen Rasul-Rasul 15:2) Gundari pe, lit sada kelompok pertua si igelari Badan Pinpinen Saksi-Saksi Jahwe. Kalak e mereken pangan rohani ras ngaturken pendahin erberita. Kelompok e eme “budak si setia ras pentar, si ilantik [Jesus].” (Matius 24:45a) Kerina anggota Badan Pinpinen eme kalak Kristen si erpengarapen nggeluh ku surga. Kenca enggo dung kegeluhenna i doni, kalak e merentah ras Jesus i surga.

2. Pangan rohani kai si isikapken budak si setia ras pentar?

Nina Jesus, budak e “mere pangan man [kerina kalak Kristen] bas waktu si tepat.” (Matius 24:45b) Pangan rohani si bereken budak enda eme petunjuk arah Kata Dibata. Bali bagi pangan si erban dagingta sehat janah megegeh, pangan rohani pe banci erban kita ngasup tetap setia man Jahwe bage pe ngasup ndalanken tugas si bereken Jesus. (1 Timotius 4:6) Pangan rohani e banci sidat arah perpulungen, pertemuan wilayah bage pe pertemuan regional. Selain si e, lit ka baca-bacan ras video si banci nampati kita ngangkai sura-sura Dibata janah reh deherna ras Ia.

PELAJARI TERBAGESEN

Sibahas kari engkai maka perlu kita “budak si setia ras pentar” e, eme Badan Pinpinen.

Badan Pinpinen mereken pangan rohani, petunjuk, bage pe bantuan man Saksi-Saksi Jahwe si lit i sebelang doni

3. Umat Jahwe arus terorganisasi

Bas abad pertama, Jesus si minpin kegiaten kalak Kristen. Gundari pe bage. Badan Pinpinen ngaturken kegiaten Saksi-Saksi Jahwe sesuai ras pengarahen Jesus. Putar VIDEO.

VIDEO: Iorganisasi Jahwe UmatNa (6:18)

Bacalah 1 Korinti 14:33, 40, kenca si e bahas penungkunen enda:

Uga ayat e ncidahken maka ate Jahwe Saksi-SaksiNa iorganisasi?

4. Budak si setia ngaturken dahin erberita

Pendahin si pentingna si ilakoken kalak Kristen abad pertama eme erberita. Bacalah Perbahanen Rasul-Rasul 8:14, 25, kenca si e bahas penungkunen enda:

Ise si ngaturken pendahin erberita bas abad pertama?
Uga tanggapen Petrus ras Johanes sanga bereken rasul si deban petunjuk man kalak e?

Pendahin si pentingna si iaturken Badan Pinpinen eme dahin erberita. Putar VIDEO.

VIDEO: Tutus i bas Dahin Erberita (1:24)

Ikataken Jesus maka pendahin erberita e seh kel pentingna. Bacalah Markus 13:10, kenca si e bahas penungkunen enda:

Engkai maka penting kel akap Badan Pinpinen dahin erberita e?
Engkai maka perlu kita “budak si setia ras pentar” guna ngaturken pendahin erberita i sebelang doni?

5. Budak si setia mereken petunjuk

Badan Pinpinen mereken petunjuk man kalak Kristen i sebelang doni. Uga cara kalak e erban keputusen sope mereken petunjuk? Perdiateken uga cara badan pinpinen bas abad pertama mereken petunjuk man kalak Kristen. Bacalah Perbahanen Rasul-Rasul 15:1, 2, kenca si e bahas penungkunen enda:

Masalah kai si erban kalak Kristen bas abad pertama erjengil?
Man ise Paulus, Barnabas, ras kalak Kristen si debanna mindo petunjuk guna ndungi masalah e?

Bacalah Perbahanen Rasul-Rasul 15:12-18, 23-29, kenca si e bahas penungkunen enda:

Kai si ilakoken badan pinpinen bas abad pertama gelah keputusen si iban kalak e sesuai ras petunjuk Dibata? —Nen ayat 12, 15, ras 28.

Bacalah Perbahanen Rasul-Rasul 15:30, 31 ras 16:4, 5, kenca si e bahas penungkunen enda:

Uga tanggapen kalak Kristen bas abad pertama kenca alokenna petunjuk arah badan pinpinen?
Uga Jahwe masu-masu kalak e perban kalak e patuh?

Bacalah 2 Timotius 3:16 ras Jakup 1:5, kenca si e bahas penungkunen enda:

Gundari, uga Badan Pinpinen ndarami petunjuk Dibata sope erban keputusen?

LIT SI NGATAKEN: “Adi begiken kena Badan Pinpinen berarti jelma kap si ikutken kena.”

Kai si erban kam tek maka Jesus me si minpin Badan Pinpinen?

KESIMPULEN PELAJAREN ENDA

Badan Pinpinen eme “budak si setia ras pentar” si ilantik Kristus. Kalak e mereken petunjuk ras pangan rohani man kalak Kristen si lit i sebelang doni.