Sanga ras turang seninata kita, perasanta seri bagi perasan Raja Daud, nina, “Seh kel ulina janah seh kel senangna sanga kalak si erturang ras ersenina tading ras-ras bas persadan!” (Masmur 133:1) Memang, labo otomatis kita banci ersada. Kita banci ersada perban kerina kita erusaha gelah tetap ersada.

1. Engkai maka luar biasa kel persadan umat Dibata?

Adi reh kita ku perpulungen bas negara si deban, banci jadi la siangkai bahasana. Tapi bagi keluargata siakap turang senina si lit i je. Engkai? Perban kita kerina sikeleng-kelengen. Janah, i sebelang doni sipelajari Pustaka si Badia arah publikasi si seri. La soal i ja kita tading, kita kerina “ngelebuh gelar Jahwe, gelah ersada nembah Ia.”​—Sepanya 3:9.

2. Uga kam banci ikut njaga persadan?

Nina Pustaka si Badia, “Tuhu-tuhulah kena sikeleng-kelengen arah pusuh nari.” (1 Petrus 1:22) Uga kam banci ndalanken nasehat enda? Ula kam fokus man kelemahen turang senina bas runggun. Tapi fokuslah ku sipat-sipatna si mehuli. Janah ula kam erteman ras kalak si seri ras kam saja. Tapi usahakenlah erteman ras turang senina arah erbage-bage latar belakang. Perlu ka tuhu-tuhu siusahaken ngambekken perasan negatif kerna kalak si deban si mungkin lit bas pusuhta.​—Baca 1 Petrus 2:17. a

3. Kai nge si lakokenndu adi la kam sicocoken ras sekalak turang senina?

Kita kerina ersada, tapi kita pe la ka sempurna. Mon-mon, siban kalak si deban kecewa ras sakit hati. Emaka nina Pustaka si Badia, “Ampunilah sada ras si debanna. Bagi Jahwe alu bulat ukur ngampuni kena, lakoken ka bage.” (Baca Kolose 3:13.) Kita pe rusur nge siban Jahwe sakit hati, tapi nggit Ia ngampuni kita. Emaka arapkenNa kita pe nggit ngampuni turang seninata. Adi siteh lit siban kalak si deban sakit hati, siusahakenlah ndungi masalah e ras ia.​—Baca Matius 5:23, 24. b

 PELAJARI TERBAGESEN

4. Ambekken perasan negatif kerna kalak si deban

Ateta sikelengi kerina turang seninata. Tapi, mon-mon mesera siakap kompak ras kalak si la seri latar belakangna ras kita. Kai si banci nampati kita? Bacalah Perbahanen Rasul-Rasul 10:34, 35, kenca si e bahas penungkunen enda:

• Jahwe nggit ngaloken kalak arah bangsa si apai pe jadi SaksiNa. Adi usihndu atendu Jahwe, uga arusna perasanndu kerna kalak si la seri ras kam?

• Perasan negatif kai nge si biasana lit bas daerahndu kerna kalak si deban?

Bacalah 2 Korinti 6:11-13, kenca si e bahas penungkunen enda:

• Adi menurutndu, uga carana gelah banci kam reh kompakna ras turang senina si la seri latar belakangna ras kam?

5. Ampunilah alu bulat ukur janah usahakenlah erdame

Jahwe nggit ngampuni kita aminna pe labo perlu siampuni Ia. Bacalah Masmur 86:5, kenca si e bahas penungkunen enda:

• Kai nge si banci sipelajari kerna Jahwe arah ayat enda?

• Engkai maka ngata bujur kel kam perban nggit lalap Jahwe ngampuni kam?

• Bas situasi si uga nge si banci mesera siakap erdame ras kalak si deban?

Uga kita banci ngusih Jahwe gelah tetap ersada ras turang seninata? Bacalah Kuan-kuanen 19:11, kenca si e bahas penungkunen enda:

• Adi lit kalak si erban kam tersinggung, kai nge si banci lakokenndu guna ndungi masalah e?

 Mon-mon siban kalak si deban sakit hati. Adi bage si terjadi, kai nge si arus silakoken? Putar VIDEO, kenca si e bahas penungkunen enda:

• Bas video e, kai nge si lakoken turang seninata si diberu e guna erdame?

 KESIMPULEN PELAJAREN ENDA

Kam banci ikut njaga runggun tetap ersada alu nggit ngampuni ras engkelengi turang senina.

Kai si Enggo Sipelajari?

• Uga kam banci ngambekken perasan negatif kerna kalak si deban?

• Kai nge si lakokenndu adi la kam sicocoken ras sekalak turang senina?

• Engkai maka usihndu atendu Jahwe si nggit lalap ngampuni?