PELAJAREN 01

Kai Gunana Pustaka si Badia man Banta?

MAINKEN

Enterem kalak rusur tersungkun-sungkun kerna kegeluhen, kesusahen, kematen, ras masa depan. Banci jadi kita pe kuatir kerna uga carana ndarami pendahin ras uga gelah keluargata tetap ermeriah ukur. Bas Pustaka si Badia lit jawapenna, janah lit ka pedah kerna uga cara si mehulina ndalani kegeluhen. Enterem kalak enggo nggejapken maka erguna kel Pustaka si Badia bas geluhna. Adi menurutndu, banci nge Pustaka si Badia nampati kita?

1. Kai saja contoh penungkunen si banci sidatken jawapenna arah Pustaka si Badia?

Bas Pustaka si Badia lit jawapen kerna penungkunen si penting enda. Uga nge tangtangna lit kegeluhen? Kai nge tujun geluh enda? Engkai maka kalak si mehuli susah pergeluhna? Uga keadan kalak mate? Engkai maka melala perang adi kerina kalak merhat ndatken kedamen? Kai pagi si terjadi man doni enda? Pustaka si Badia ngiahken kita guna ndarami jawapenna, janah jutan kalak enggo ndatken jawapen e.

2. Uga Pustaka si Badia banci nampati kita bas kegeluhenta tiap wari?

Bas Pustaka si Badia, melala pedah si banci nampati kita. Misalna iajarken Pustaka si Badia man banta uga carana gelah keluargata bahagia. Lit ka pedah kerna kai si arus silakoken sanga gulut ukurta, ras uga carana gelah meriah ukurta ngelakoken pendahinta. Sanga sibahas buku enda ras-ras, banci kari tehndu kai si ajarken Pustaka si Badia kerna si e ras kerna si debanna. Mbera-mbera tek kari kam maka “kerina isi Kitap si Badia . . . erguna.”—2 Timotius 3:16.

Buku enda labo nggantiken Pustaka si Badia. Tapi buku enda ngiahken kam gelah mereksa Pustaka si Badia. Emaka bacalah ayat-ayat si lit bas buku enda janah bandingken ayat-ayat e ras kai si sangana pelajarindu.

PELAJARI TERBAGESEN

Sipelajari kari uga Pustaka si Badia banci nampati kita, uga carana gelah meriah siakap mbaca Pustaka si Badia, ras engkai maka perlu kita penampat guna ngangkaisa.

3. Pustaka si Badia banci negu-negu kita

Pustaka si Badia bali bagi senter si seh kel terangna, perban Pustaka si Badia banci nampati kita ngidah ntah pe meteh kai si nandangi terjadi bas masa depan janah nampati kita erban keputusen si mehuli.

Bacalah Masmur 119:105, kenca si e bahas penungkunen-penungkunen enda:

Uga nge perasan penulis masmur e kerna Pustaka si Badia?
Uga nge perasanndu kerna Pustaka si Badia?

4. Pustaka si Badia banci njawap penungkunen-penungkunenta

Lit sada video si ncidahken uga Pustaka si Badia nampati sekalak diberu meteh jawapen kerna penungkunen-penungkunen si enggo ndekah kel daramina jawapenna. Putar VIDEO, kenca si e bahas penungkunen-penungkunen enda:

VIDEO: Tetaplah Erpengarapen! (1:48)

Penungkunen kai nge si lalap ukuri diberu si lit bas video e?
Uga perasanna kenca erlajar Pustaka si Badia?

Pustaka si Badia ngiahken kita gelah terus nungkun. Bacalah Matius 7:7, kenca si e bahas penungkunen enda:

Kai nge penungkunenndu si banci saja lit jawapenna bas Pustaka si Badia?

5. Banci meriah kapndu mbaca Pustaka si Badia

Enterem kalak meriah kapna mbaca Pustaka si Badia, janah e erguna kel man bana. Putar VIDEO, kenca si e bahas penungkunen-penungkunen enda:

VIDEO: Mbaca Pustaka (2:05)

Meriah nge kap anak muda bas video e mbaca?
Engkai maka meriah kap kalak e mbaca Pustaka si Badia amin gia labo ia hobi mbaca?

Pustaka si Badia banci erban kita ermeriah ukur ras erban lit arapenta. Bacalah Roma 15:4, kenca si e bahas penungkunen enda:

Merhat nge kam meteh terbuen kerna janji si lit bas ayat e?

6. Lit si banci nampati kita ngangkai Pustaka si Badia

Aminna pe mehuli adi sibaca sendiri Pustaka si Badia, tapi enterem kalak nggejapken maka ndauh ulin adi ibahasna Pustaka si Badia ras kalak si deban. Bacalah Perbahanen Rasul-Rasul 8:26-31, kenca si e bahas penungkunen enda:

Uga carana gelah banci siangkai Pustaka si Badia?—Nen ayat 30 ras 31.

Sekalak dilaki Etiopia perlu isampati guna ngangkai Pustaka si Badia. Gundari pe, enterem kalak si reh jelasna angkaina Pustaka si Badia perban isampati kalak si deban.

LIT SI NGATAKEN: “Erlajar Pustaka si Badia e ngkeriken waktu saja.”

Adi menurutndu uga? Engkai maka bage nindu?

KESIMPULEN PELAJAREN ENDA

Bas Pustaka si Badia lit pedah kerna cara si mehulina ndalani kegeluhen. Lit ka i je jawapen arah penungkunen-penungkunen si penting. Pustaka si Badia pe banci erban kita ermeriah ukur ras erban lit arapenta.