PELAJAREN 03
Banci nge Kita Tek man Pustaka si Badia?
Bas Pustaka si badia melala janji ras nasehat. Banci saja merhat kam meteh kai si iajarken Pustaka si Badia. Tapi mungkin kam ragu, terteki kin Pustaka si Badia e ntah lang. Mungkin tersungkun-sungkun kam, banci denga nge kita tek man buku si enggo ndekah kel itulis e? Erguna denga nge nasehat Pustaka si Badia gundari? Banci kin kita tek maka janji Pustaka si Badia kerna masa depan pasti terjadi? Lit jutan kalak si tek man Pustaka si Badia. Mari sibahas kai saja buktina maka situhuna kam pe banci tek man Pustaka si Badia.
1. Tuhu nge cerita-cerita si lit bas Pustaka si Badia pernah terjadi?
Pustaka si Badia ngataken maka kerina isina eme ‘kata-kata kebenaren si tepat.’ (Pengerana 12:10) Kerina kejadin si iceritaken bas Pustaka si Badia memang pernah terjadi. (Baca Lukas 1:3; 3:1, 2.) Ndigan kejadin e terjadi pe ituriken bas Pustaka si Badia alu tepat. Selain si e, kerina kalak ras ingan si iceritaken Pustaka si Badia memang tuhu-tuhu lit. Enda enggo ibuktiken arah penemuan-penemuan sejarah ras arkeologi.
2. Amin pe Pustaka si Badia enggo ribun tahun si lewat itulis, engkai maka kita tek isina erguna denga?
Bas Pustaka si Badia rusur kel iceritaken kerna kai si mbarenda lenga iteh kalak. Contohna eme si lit hubungenna ras ilmu pengetahuan. Sanga keterangen e itulis, enterem kalak si la tek. Tapi bas pudi wari, kai si ikataken Pustaka si Badia e banci ibuktiken arah ilmu pengetahuan. Emaka Pustaka si Badia memang “banci terteki . . . rasa lalap.”—Masmur 111:7, 8.
3. Engkai maka banci kita tek kai si enggo ikataken Pustaka si Badia pasti terjadi?
Bas Pustaka si Badia melala nubuat a kerna “kai si lenga terjadi.” (Jesaya 46:10) Mbue arah nubuat e si enggo ndekah kel ikataken sope e terjadi. Janah sanga e terjadi, tepat bagi si inubuatken. Bas Pustaka si Badia pe, enggo ikataken alu jelas uga keadan doni enda gundari. Bas pelajaren enda sibahas kari piga-piga nubuat Pustaka si Badia si terjadi tepat bagi si enggo inubuatken.
PELAJARI TERBAGESEN
Sibahas kari piga-piga contoh si mbuktiken maka Pustaka si Badia sesuai ras ilmu pengetahuan. Janah sipelajari ka piga-piga nubuat Pustaka si Badia si luar biasa.
4. Pustaka si Badia sesuai ras ilmu pengetahuan
Mbarenda teremen kalak tek maka lit si natang doni enda. Putar VIDEO.
Cuba siperdiateken kai si itulis bas buku Jop kira-kira 3.500 tahun si lewat. Bacalah Jop 26:7, kenca si e bahas penungkunen enda:
-
Bas ayat e ikataken maka doni isangkutken “bas si la lit,” engkai maka luar biasa kata-kata e?
Kerna siklus lau i doni, kira-kira 200 tahun si lewat maka enggo tuhu-tuhu iangkai. Tapi cuba perdiateken kai nina Pustaka si Badia kira-kira 3.500 tahun si lewat. Bacalah Jop 36:27, 28, kenca si e bahas penungkunen-penungkunen enda:
-
Uga nge pendapatndu kerna siklus lau si ijelasken bas ayat e?
-
Kenca bacandu ayat ndai, reh tekna nge kam man Pustaka si Badia?
5. Enggo inubuatken Pustaka si Badia kerna kejadin-kejadin si penting
Bacalah Jesaya 44:27–45:2, kenca si e bahas penungkunen enda:
-
Keterangen kai si enggo inubuatken bas Pustaka si Badia kerna ndabuhna kerajan Babilon 200 tahun sope e terjadi?
Arah bukti sejarah banci siteh maka si naluken kota Babilon eme Raja Kores arah Persia bas tahun 539 SM. b I sekeliling kota Babilon lit sungai si jadi salah sada pertahanen kota e. Ipindahken Kores ras pasukenna aliren sungai e. Kenca si e, masuk kalak e arah gerbang kota si ipediat talang. Taluken kalak e kota e janah la lit perlawanen. Gundari, lebih 2.500 tahun kenca si e, reruntuhen kota e ngenca si tading. Perdiatekenlah kai si enggo inubuatken bas Pustaka si Badia.
Bacalah Jesaya 13:19, 20, kenca si e bahas penungkunen enda:
-
Kai buktina maka nubuat e tuhu-tuhu terjadi?
Kota Babilon si enggo runtuh si lit bas Irak gundari
6. Enggo inubuatken Pustaka si Badia kerna keadan doni si gundari
Nina Pustaka si Badia, kita gundari nggeluh bas “wari-wari pendungi.” (2 Timotius 3:1) Perdiatekenlah kai si inubuatken Pustaka si Badia kerna wari-wari pendungi.
Bacalah Matius 24:6, 7, kenca si e bahas penungkunen enda:
-
Menurut Pustaka si Badia, kai saja nge si terjadi bas wari-wari pendungi?
Bacalah 2 Timotius 3:1-5, kenca si e bahas penungkunen-penungkunen enda:
-
Menurut Pustaka si Badia, uga nge sipat teremen kalak bas wari-wari pendungi?
-
Sipat kai saja nge bas ayat e si enggo idahndu i sekelilingndu?
LIT SI NGATAKEN: “Pustaka si Badia e manusia nge si erbanca.”
-
Bukti si apai nge si erban kam tek kel maka Pustaka si Badia banci terteki?
KESIMPULEN PELAJAREN ENDA
Banci kita tek man Pustaka si Badia perban isina cocok ras sejarah, sesuai ras ilmu pengetahuan, janah nubuat Pustaka si Badia lalap terjadi.
Kai si Enggo Sipelajari?
-
Tuhu nge cerita-cerita si lit bas Pustaka si Badia pernah terjadi?
-
Kai contoh si mbuktiken maka Pustaka si Badia sesuai ras ilmu pengetahuan?
-
Menurutndu banci nge Pustaka si Badia mpebetehken kerna masa depan? Engkai maka bage nindu?
DARAMI TERBUEN
Lit nge si salah si ikataken Pustaka si Badia kerna ilmu pengetahuan?
“Sesuai nge Pustaka si Badia ras Ilmu Pengetahuan?” (Artikel web)
Kai saja si terjadi bas “wari-wari pendungi”?
“6 Nubuat Alkitab yang Anda Lihat Sedang Terjadi” (Menara Pengawal 1 Mei 2011)
Uga nubuat Pustaka si Badia kerna Junani terjadi?
Bacalah uga Pustaka si Badia ngubah kegeluhen kalak.
