Ilewati Jesus ras murid-muridna daerah Samaria guna lawes arah Judea nari ku Galilea si lit i sebelah utara. Latih kel akap kalak e perban nggo ndauh kel erdalan. Paksa nggo mulai ciger, ngadi kalak e i kota Sihar guna istirahat i deher sumur. Banci saja, si ngkuraksa sumur e eme Jakup ntah pe kalak upahen ratusen tahun si nggo lewat. Seh asa gundari lit denga sumur e i deher kota Nablus.

Sanga istirahat Jesus i deher sumur, lawes murid-muridna ku kota guna nukur pangan. Kenca lawes kalak e, reh sekalak diberu Samaria guna muat lau. Nina Jesus man bana, “Enta ge sitik lau ena gelah kuinem.”​—Johanes 4:7.

Paksa si e, nggo ndekah kel kalak Jahudi ras kalak Samaria curiga sada ras si debanna, e me sebapna kalak enda la nggit erteman. Sengget diberu e, nina, “Kam me kalak Jahudi, janah aku kalak Samaria. Engkai maka ipindondu lau inemen man bangku?” Ijawap Jesus, “Adi itehndu kerna pemere Dibata, janah adi itandaindu ise si mindo lau inemen man bandu enda, pasti ipindondu man bana lau, jenari iberekenna man bandu lau kegeluhen.” Ngaloi diberu e, “O Pa, mbages kap sumur enda, janah timbandu pe la lit. I ja nari banci buatndu lau kegeluhen? Nini bulang kami, eme Jakup, nggo iberekenna sumur enda man kami. Ia, anak-anakna, ras asuh-asuhenna pe minem jenda nari. Me labo kam belinen asangken ia?”​—Johanes 4:​9-​12.

Ijawap Jesus, “Ise pe si minem lau enda, muas denga nge. Tapi ise pe si minem lau si kubereken man bana, lanai pagi pernah muas. Lau si kubereken e jadi sumber lau bas dirina si mereken kegeluhen si rasa lalap.” (Johanes 4:​13, 14) Aminna pe latih akap Jesus, nggit ia mpeseh kebenaren si mereken kegeluhen si rasa lalap man diberu Samaria e.

Ngaloi diberu e, “O Pa, bereken min bangku lau e, gelah lanai aku muas janah la perlu aku mulih-ulih ku jenda muat lau.” Nina Jesus, “To legi dilakindu, janah babalah ia ku jenda.” Ngaloi diberu e, “La kap lit dilakiku.” Nina Jesus, “Payo katandu ena, la lit dilakindu. Sebap nggo lima dilakindu, janah dilaki si ras kam gundari e labo dilakindu.” (Johanes 4:​15-​18) Sengget kel diberu e megi si e!

Mis sadar diberu e maka Jesus labo kalak si biasa saja. Ngaloi diberu e, “O Pa, kam pasti sekalak nabi me. Nini bulang kami [kalak Samaria] nembah Dibata i das deleng enda [Deleng Gerisim si deher i je], tapi ning kena [kalak Jahudi] i Jerusalem ngenca ingan nembah Dibata.” Arah ranan diberu e, siteh maka merhat ia nembah Dibata.​—Johanes 4:​19, 20.

Ikataken Jesus man bana maka labo penting kerna ingan nembah Dibata, nina, “Seh me pagi waktuna maka lanai kena nembah Bapak das deleng enda bage pe i Jerusalem. Tapi reh me waktuna, janah situhuna gundari pe nggom seh waktuna, kalak si nembah Bapak alu cara si benar nembah Ia pagi alu kesah si badia ras kebenaren. Sebap, Bapak sangana ndarami kalak si nembah Ia alu cara si bage.”​—Johanes 4:​21, 23, 24.

Si penting man Dibata eme carana nembah Ia, labo inganna. Luar biasa kel kap diberu e, nina, “Kuteh Mesias si igelari Kristus nandangi reh. Adi nggo reh kari ia, ipebetehkenna man kami kerinana alu jelas.”​—Johanes 4:25.

Kenca si e, ipebetehken Jesus kebenaren si penting, nina, “Aku kap ia, si sangana ngerana ras kam.” (Johanes 4:​26) Cuba ukuri! Reh diberu e guna muat lau saja. Tapi jumpa ia ras Jesus, janah la isangkana Jesus si kalak Jahudi e nggit leben ncakapi ia. Ikataken Jesus ka alu terus terang kai si lenga pernah ikatakenna man kalak si deban, eme ia kap Mesias.

Enggo mulihken murid-murid Jesus arah Sihar nari maba pangan. Idah kalak e Jesus kundul denga i sumur Jakup janah sangana ngeranai ras sekalak diberu Samaria. Sanga kalak e seh, itadingken diberu e ingan launa janah lawes ku kota.

Seh kenca i Sihar, iceritaken diberu e man jelma si nterem kerna kai si ikataken Jesus man bana. Tek kel ia ngatakenca, “Ota sinen dilaki si nggo ngataken kerina si nggo pernah kulakoken.” Banci jadi, gelah reh merhatna kalak e metehsa, nina ka, “Banci saja ia kap Kristus e!” (Johanes 4:​29) Enda me si rusur icakapken mulai kin jaman Musa nari. (Ulangen 18:18) Kalak si lit i bas kota e pe lawes gelah banci mis idahna Jesus.

Paksa si e, isuruh murid-murid me Jesus man. Tapi nina Jesus, “Lit kap panganku si la iteh kena.” Mamang ate murid-murid, emaka sisungkun-sungkunen kalak e, “Me labo lit kalak si naruhken pangan man bana?” Ijelasken Jesus, “Panganku eme ngelakoken peraten Si nuruh aku, janah ndungi dahin si iberekenNa man bangku.”​—Johanes 4:​32-​34.

 Pendahin si imaksud Jesus labo mperani biji-bijin si ilakoken empat bulan nari. Tapi si imaksud Jesus eme njadiken murid. Nina, “Nenlah juma-juma nggo megersing janah nggo banci iperani. Kalak si rani nggo ngaloken upahna janah sangana ipepulungna asil peranin guna kegeluhen si rasa lalap, alu bage kalak si nuan ras kalak si rani radu ras ermeriah ukur.”​—Johanes 4:​35, 36.

Paksa si e, banci saja nggo isadari Jesus maka kai si icakapkenna man diberu ndai erguna man nterem kalak i Sihar. Kalak e jadi erkiniteken man Jesus, perban ikataken diberu e, “Iceritakenna man bangku kerina si nggo pernah kulakoken.” (Johanes 4:​39) Kalak e pe reh ku sumur e, janah mindo man Jesus gelah tading Jesus ras kalak e guna ngajari terbuen. Emaka tading Jesus i je sedekah dua wari.

Kenca ibegiken kalak Samaria e Jesus, reh teremna kalak Samaria erkiniteken man bana. Nina kalak e man diberu e, “Gundari nggo tek kami, labo erkiteken kai si ikatakenndu saja, tapi perban kami sendiri si nggo megiken ajarenna, janah iteh kami maka dilaki enda me si jadi juru selamat man doni.” (Johanes 4:​42) Banci siusih diberu e. Paksa erberita guna mereken kesaksin kerna Jesus, siban gelah kalak si megiken kita merhat meteh terbuen.

Ingetlah maka enda empat bulan ope lenga rani, eme kira-kira bulan Nopember ntah Desember, sebap kemungkinen rani biji barli kira-kira bulan Maret ras April. Emaka, kenca perayan Paskah tahun 30 M, Jesus ras murid-muridna nggo i Judea kira-kira waluh bulan dekahna guna ngajar ras mperidiken kalak. Gundari mulih ate kalak e ku kutana eme Galilea. Kai si nandangi terjadi i je?