Kenca 40 wari i taneh mesawang janah ope lenga mulih ku Galilea, mulihken Jesus ndahi Johanes si mperidiken ia. Sanga Jesus nggo deher, ituduhken Johanes me Jesus janah nina man kalak si lit i je, “Nenlah, ia me Anak Biri-Biri Dibata si nasapken dosa doni! Ia me kalak si kumaksud sanga kukataken, ‘Kalak si pudin reh asangken aku, nggo ngelebei aku, perban ia nggo lit sope aku lit.’” (Johanes 1:​29, 30) Aminna pe Johanes tuan sitik asangken Jesus, tapi itehna maka ope lenga ia lahir, Jesus nggo leben lit selaku mahluk roh i surga.

Piga-piga minggu ope lenga si e, sanga Jesus reh guna iperidiken, tempa-tempa la tek Johanes adi Jesus e Mesias. Nina Johanes, “Aku pe labo kutandai ia tapi guna mpetandaken ia man kalak Israel, reh aku mperidiken alu lau.”​—Johanes 1:​31.

Kenca si e, iceritaken Johanes kai si terjadi sanga iperidikenna Jesus, nina, “Kuidah kesah si badia nusur i langit nari bagi merpati, janah kesah si badia e tetap lit i datasna. Aminna pe la ia kutandai, tapi Dibata si nuruh aku guna mperidiken alu lau, ngataken, ‘Adi idahndu kesah si badia nusur ku sekalak jelma janah kesah si badia e tetap lit i datasna, ia me kalak si mperidiken alu kesah si badia.’ Kerina si e nggo kuidah janah kuberitaken maka ia me Anak Dibata.”​—Johanes 1:​32-​34.

Paginna, mulihken ka Jesus ndahi Johanes. Paksa si e, Johanes sangana radu ras dua muridna. Nina Johanes, “Nen, ia me Anak Biri-Biri Dibata!” (Johanes 1:​36) Kenca megi si e, duana murid Johanes Peridiken e jadi pengikut Jesus. Salah sadana eme Andreas. Sekalak nari gelarna Johanes, banci saja ia si nulisken kerna cerita enda. Ia anak Salome. Banci jadi Salome e agi Maria, janah gelar dilakina eme Sebedeus. Johanes e senina sipemeren ras Jesus.

Sanga itulihken Jesus, idahna Andreas ras Johanes ngikutken ia, emaka isungkun Jesus, “Kai si man daramen kena?”

Ijawap kalak e, “O Rabbi, i ja kam tading?”

Nina Jesus, “Marilah gelah idah kena.”​—Johanes 1:​37-​39.

Paksa si e, kira-kira jam empat keraben, sada wari e Andreas bage pe Johanes terus ras Jesus. Meriah kel ukur Andreas, emaka idahina seninana eme Simon, si igelari ka Petrus, nina, “Enggo jumpa kami ras Mesias.” (Johanes 1:​41) Ibaba Andreas me Petrus ndahi Jesus. Banci saja, Johanes pe bage. Ibabana seninana Jakup ndahi Jesus. Memang labo lit iceritaken Johanes kerna si e i bas tulisenna.

Paginna, jumpa Jesus ras Pilipus si rehna arah Betsaida nari. Kota e deher pantai utara i Lawit Galilea, janah i je me kuta kemulihen Andreas ras Petrus. Jesus ngundang Pilipus, nina, “Jadilah pengikutku.”​—Johanes 1:​43.

Kenca si e, idahi Pilipus me Natanael si igelari ka Bartolomeus, nina, “Enggo jumpa kami ras kalak si ikataken i bas Undang-Undang Musa bage pe Ajaren Nabi-Nabi. Ia Jesus, anak Jusup arah Nasaret nari.” La tek Natanael janah nina, “Banci kin si mehuli reh i Nasaret nari?”

Ngaloi Pilipus, “Marilah sinen.” Sanga idah Jesus reh Natanael ndahi ia, ngerana Jesus kerna Natanael, “Ia me kalak Israel si asli, ia labo kalak si munapik.”

Nungkun Natanael, “Uga penandaindu aku?”

Ijawap Jesus, “Ope lenga kam idilo Pilipus, nggo kuidah kam i teruh batang ara.”

Luar biasa kel akap Natanael, nina, “O Guru, kam kap Anak Dibata. Kam me Raja kalak Israel.”

Nina Jesus, “Perban kukataken kuidah kam i teruh batang ara nge maka tek kam man bangku? Idahndu me pagi kejadin-kejadin si hebaten asangken si enda.” Jenari nina Jesus ka, “Situhuna, idah kena me pagi terbuka langit, janah malekat-malekat Dibata nangkih bage pe nusur guna Anak manusia.”​—Johanes 1:​45-​51.

La ndekah kenca si e, Jesus bage pe murid-muridna si mbaru lawes arah Lembah Jordan nari janah berkat ku Galilea.