Gundari, wari si peteluken kenca Natanael jadi salah sada murid Jesus si pertama. Jesus ras piga-piga murid-muridna si pertama lawes ku kuta kemulihen kalak e, eme ku utara daerah Galilea. Kalak enda iundang ku pesta perjabun i Kana, ingan Natanael lahir. Kana e daerah deleng, la ndauh arah Nasaret, ingan Jesus ipebelin.

Maria, nande Jesus pe reh ku pesta perjabun e. Erkiteken erteman ras keluarga si erjabu, banci saja Maria ikut ngelai. Emaka mis itehna sanga lit masalah, janah ikatakenna man Jesus, “Nggo keri lau anggur kalak enda.”​—Johanes 2:3.

Enda ngertiken maka iarapken Maria gelah ibere Jesus penampat. Tapi nina Jesus, “O Nande, urusenta kin e? Lenga kap seh waktuku.” (Johanes 2:4) Erkiteken ia Raja si ipilih Dibata, arus ikutken Jesus petunjuk arah Bapakna si i surga nari, labo arah keluarga ntah pe temanna. Beluh kel Maria erkiteken iarapkenna anakna ndungi masalah e. Nina Maria man pelayan-pelayan si lit i je, “Lakoken saja kai nina.”​—Johanes 2:5.

I je lit enem kudin si iban arah batu janah tep-tep kudin banci siat isina 40 liter lau. Nina Jesus man pelayan-pelayan, “Gundari, buatlah sitik lau jenari baba man ketua i bas kerja enda.”​—Johanes 2:​7, 8. 

Mejile kel anggur e akap ketua i bas kerja e, tapi la itehna anggur e lit erkiteken mukjizat. Ilebuhna si empo e, janah nina, “Biasana anggur si mehulina nge leben ibagiken kalak, janah kenca mabuk tamu-tamu e, emaka ibagiken me anggur si biasa. Tapi kam seh asa gundari lit isimpanndu anggur si mehuli.”​—Johanes 2:​10.

Enda me mukjizat si pertama si ilakoken Jesus. Paksa inen murid-murid si pertama mukjizat e, reh paguhna kiniteken kalak e man Jesus. Kenca si e, Jesus, nandena, bage pe adek tirina, lawes kalak e ku kota Kapernaum i pinggir barat-laut Lawit Galilea.