Sanga Jesus i Jerusalem ngerayaken Paskah tahun 30 M, melala ilakokenna mukjizat si luar biasa. Dungna, nterem kalak erkiniteken bana. Salah sadana eme Nikodemus kalak Parisi. Ia anggota Pengadilen Agama Jahudi. Erkiteken terbuen atena si ipelajarina, idahina Jesus paksa wari nggo gelap, sebap banci saja mbiar ia iteh peminpin-peminpin Jahudi janah dungna mbau gelarna.

Nina Nikodemus, “O Rabbi, iteh kami maka kam me guru si isuruh Dibata. Sebap ise pe labo banci erban mukjizat-mukjizat bagi si ibanndu e, adi la kin Dibata ras ia.” Ikataken Jesus man bana maka gelah banci masuk ku bas Kerajan Dibata, sekalak jelma arus “lahir mulihi.”​—Johanes 3:​2, 3.

Uga sekalak jelma banci lahir mulihi? Nungkun Nikodemus, “Me labo ia banci masuk ku bas beltek nandena janah ilahirken mulihi?”​—Johanes 3:4.

Labo e ertina ilahirken mulihi. Ijelasken Jesus, “Situhuna, ise pe la banci masuk ku bas Kerajan Dibata adi la kin ia lahir i bas lau bage pe kesah si badia nari.” (Johanes 3:5) Kenca Jesus iperidiken janah nusur ku datasna kesah si badia, paksa si e me ia ilahirken “i bas lau bage pe kesah si badia” nari. I je me terbegi sora i langit nari, “Enda me AnakKu si Kukelengi, ia me si ngena ateKu.” (Matius 3:​16, 17) Alu cara bage, ipebetehken Dibata maka Jesus e me Anak Dibata si nggeluh pagi jadi mahluk roh i surga. Kenca si e, paksa Pentakosta tahun 33 M, kalak si iperidiken pe nusur ku datasna kesah si badia. Alu bage, kalak e ilahirken mulihi jadi anak-anak Dibata si nggeluh pagi jadi mahluk roh i surga.​—Perbahanen Rasul-Rasul 2:​1-4.

La iangkai Nikodemus si iajarken Jesus man bana kerna Kerajan. Emaka, ijelasken Jesus terbuen kerna tanggung jawapna si istimewa erkiteken jadi Anak Dibata i doni. Nina Jesus, “Bali bagi Musa sanga i taneh mesawang, ipeganjangna nipe i tiang, bage ka me Anak manusia arus ipeganjang, gelah kerina kalak si tek man bana banci ndatken kegeluhen si rasa lalap.”​—Johanes 3:​14, 15.

Mbarenda lit kalak Israel si itagut nipe si erbisa, janah gelah banci tetap nggeluh, arus itatap kalak e nipe tembaga si iban Musa. (Bilangen 21:9) Bage ka pe, kerina manusia perlu erkiniteken man Anak Dibata gelah nggeluh seh rasa lalap. Guna ncidahken si enda, ibuktiken Jahwe kekelengenNa, ikataken Jesus man Nikodemus, “Erkiteken keleng kel ate Dibata doni enda, emaka iberekenNa AnakNa si tonggal, gelah ise pe si erkiniteken man bana la ikernepken tapi ndatken kegeluhen si rasa lalap.” (Johanes 3:16) Jadi, kira-kira enem bulan kenca imulai Jesus pelayanenna, icidahken Jesus maka ia kap dalan keselamaten.

Ikataken Jesus man Nikodemus, “Dibata nuruh AnakNa ku doni enda labo guna nghakimi.” Jadi, Jesus reh ku doni enda labo guna masapken manusia i doni, tapi bagi si ikatakenna, ia reh guna ‘nelamatken’ doni enda.​—Johanes 3:​17.

Siinget maka Nikodemus ndahi Jesus sanga wari nggo gelap. Idungi Jesus ranan kalak enda alu ngataken, “Enda me alasenna kalak e ihakimi: Terang nggo reh ku doni enda, tapi ngenan ate manusia nandangi kegelapen asangken terang, perban jahat perbahanenna. Ise pe si rusur ngelakoken kai si jahat, segat atena nandangi terang, janah la idahina terang gelah ula tereteh perbahanenna e. Tapi ise pe si ngelakoken kai si benar, idahina me terang e, gelah teridah perbahanenna si sue ras peraten Dibata.”​—Johanes 3:​19-​21.

Sekalak Parisi ras guru Israel, si gelarna Nikodemus, ngukuri kai si ibegina kerna tanggung jawap Jesus i bas tujun Dibata, janah arus ibanna keputusen kerna kai si arus ilakokenna.