Enggo enem bulan kenca Johanes Peridiken erberita, gundari umur Jesus kira-kira 30 tahun, janah idahina Johanes i Lau Jordan. Erkai? Labo guna ngeranai ntah pe ngenen kemajun pendahin Johanes, tapi ipindo Jesus gelah iperidiken Johanes ia.

Itulak Johanes pemindonna janah nina, “Aku nge arusna si iperidikenndu, tapi ngkai maka kam si ndahi aku?” (Matius 3:​14) Iteh Johanes maka Jesus eme Anak Dibata. Siinget maka sanga Maria hamil, i bas beltekna lit Jesus. Paksa si e, Maria ndahi Elisabet si sangana hamil ka, Johanes si lit i bas beltek Elisabet minter kemuit alu meriah ukur. I bas pudi wari, pasti iceritaken Elisabet kerna si e man Johanes. Pasti iteh Johanes ka sanga ikataken Gabriel man Maria kerna kelahiren Jesus, bage pe kerna malekat-malekat si ndahi permakan-permakan i bas berngi sanga Jesus lahir.

Iteh Johanes maka peridin si ilakokenna eme guna kalak erdosa si ertobat. Tapi Jesus la erdosa. Aminna pe itulak Johanes tapi iasak Jesus ia, nina, “Labo dalih, sebap alu bage silakoken kerina peraten Dibata.”​—Matius 3:​15.

Engkai Jesus perlu iperidiken? Jesus iperidiken labo ngertiken pertobaten arah dosa nari. Tapi alu iperidiken, icidahkenna maka nggit ia ngelakoken peraten Bapakna. (Heber 10:​5-7) Sedekah enda Jesus jadi tukang kayu, tapi gundari imulaina me pelayanenna i doni bagi si isuruh Bapakna si i surga. Menurutndu, iteh Johanes nge lit kari kejadin si luar biasa si terjadi sanga iperidikenna Jesus?

Nina Johanes, “Dibata si nuruh aku guna mperidiken alu lau, ngataken, ‘Adi idahndu kesah si badia nusur ku sekalak jelma janah kesah si badia e tetap lit i datasna, ia me kalak si mperidiken alu kesah si badia.’” (Johanes 1:33) Iteh Johanes maka lit nusur kesah si badia Dibata man salah sada kalak si iperidikenna. Eme sebapna, sanga Jesus ndarat arah lau nari, banci saja labo sengget Johanes sanga idahna “kesah Dibata nusur ku datas Jesus bagi merpati.”​—Matius 3:​16.

Kenca Jesus iperidiken, rempet “terbuka langit.” Kai ertina e? Banci saja enda ngertiken maka kenca Jesus iperidiken, mulai iingetna mulihi kegeluhenna i surga. Ingetna maka mbarenda ia mahluk roh si tading ras Bapakna Jahwe. Ingetna ka kerina kebenaren si iajarken Bapakna ope lenga ia ku doni.

Selain si e, sanga Jesus iperidiken, lit ka sora arah surga si ngataken, “Enda me AnakKu si Kukelengi, ia me si ngena ateKu.” (Matius 3:17) Sora ise e? Pasti labo sora Jesus, sebap ia sangana ras Johanes. E sora Dibata. Jelas me, Jesus labo Dibata, tapi ia Anak Dibata.

Aminna pe Jesus i doni jadi manusia, ia tetap jadi anak Dibata, bali bagi Adam eme manusia pertama si iciptaken Dibata. Kenca iceritaken Lukas kerna Jesus si iperidiken, itulis Lukas, “Sanga imulai Jesus pendahinna, umurna kira-kira 30 tahun. Menurut pengakap kalak, ia eme, anak Jusup, anak Eli, . . . anak Daud, . . . anak Abraham, . . . anak Nuah, . . . anak Adam, anak Dibata.”​—Lukas 3:​23-​38.

Bali bagi Adam, sanga Jesus jadi manusia pe tetap nge ia “anak Dibata.” Kenca iperidiken, sadar Jesus maka ia Anak Dibata si mulihi pagi jadi mahluk roh ka i surga. Alu bage, banci iajarken Jesus kebenaren kerna Dibata janah ncidahken dalan kegeluhen si rasa lalap. Gundari imulai Jesus me pelayanenna janah pelayanenna e dung kenca ia mate jadi korban man manusia si erdosa.