Kenca perayan Paskah tahun 30 M, lawes Jesus ras murid-muridna nadingken Jerusalem. Tapi, la kalak e mis mulih ku rumahna i Galilea. Lawes kalak e ku Judea, i je nterem jelma si iperidiken kalak e. Johanes Peridiken pe mperidiken kalak kira-kira setahun dekahna, banci saja i lembah Lau Jordan. Piga-piga murid-muridna tetap denga ngikutken ia.

La lit sekalak pe si iperidiken Jesus, tapi murid-muridna isuruhna ngelakoken si e. Peridin si ilakoken kalak e jadi tanda pertobaten, bali bagi peridin si ilakoken Johanes. Paksa si e, Jesus bage pe Johanes ngajari kalak Jahudi si nggo ertobat arah dosa-dosana si nggelanggar perjanjin Undang-Undang Dibata.​—Perbahanen Rasul-Rasul 19:4.

Tapi, jungut-jungut murid-murid Johanes kerna Jesus, nina, “Dilaki [Jesus] si ras kam . . . gundari iperidikenna ka kalak janah kerina kalak ndahi ia.” (Johanes 3:​26) Tapi la cian ate Johanes. Meriah ukurna ngidah nterem kalak ngikutken Jesus janah atena min gelah murid-muridna pe ermeriah ukur. Ingetken Johanes kalak e, “Kena sendiri nge si jadi saksi maka pernah kukataken, ‘Aku labo Kristus, tapi aku isuruh leben asangken ia.’” Iberekenna perumpaman gelah iangkai kalak e, “Penganten si dilaki kap mpuna penganten si diberu. Meriah me ukur teman penganten si dilaki paksa cinder i deher penganten si dilaki janah ibegina sorana. Bage me aku, keriahen ukurku la kurang kai pe.”​—Johanes 3:​28, 29.

Bali bagi teman penganten si dilaki, piga-piga bulan si lewat meriah ukur Johanes mpetandaken murid-muridna man Jesus. Piga-piga muridna nggo ngikutken Jesus, janah pagin ipilih alu kesah si badia. Lit denga murid-murid Johanes si ngikutken ia, ate Johanes min gelah murid-muridna e pe jadi pengikut Jesus, sebap tujun Johanes eme nikapken dalan guna pelayanen Kristus. Nina Johanes, “Kai si ilakokenna reh buena, tapi kai si kulakoken reh sitikna.”​—Johanes 3:​30.

Salah sada murid Jesus si pertama, si gelarna Johanes ka, bas pudi wari nulis kerna bena-benana kegeluhen Jesus ras tanggung jawapna si penting, “Si reh arah datas nari, belinen asangken ise pe. . . . Keleng ate Bapak man AnakNa, janah iberekenNa kerina ku bas tanna. Ise pe si erkiniteken man Anak, ndatken kegeluhen si rasa lalap. Ise pe si la patuh man Anak, labo ndatken kegeluhen, tapi rawa Dibata lalap lit bas ia.” (Johanes 3:​31, 35, 36) Enda me kebenaren si penting si arus iteh kerina kalak!

La ndekah kenca Johanes Peridiken ngataken maka tanggung jawap ras dahinna nandangi urak, itangkap Raja Herodes ia. Ibuat Herodes janah iempoina Herodes, diberu senina tirina Pilipus. Alu pang, ipersingeti Johanes me Herodes i lebe-lebe jelma si enterem erkiteken ia erlua-lua. Dungna, imasukken Herodes me Johanes ku penjara. Sanga megi si e, lawes Jesus ras murid-muridna arah Judea ku Galilea.​—Matius 4:​12; Markus 1:​14.