Kenca pesta perjabun i Kana, lawes Jesus ku Kapernaum ras nandena, bage pe ras adek-adek tirina​—Jakup, Jusup, Simon, bage pe Judas.

Engkai Jesus lawes ku Kapernaum? Belinen kota e janah sikapen asangken Nasaret bage pe Kana. Selain si e, nterem murid Jesus tading i Kapernaum ntah pe i sekelilingna, emaka banci ibereken Jesus pelatihen man kalak e i kuta murid-muridna.

Sanga i Kapernaum, ilakoken Jesus ka piga-piga mukjizat. Enterem kalak i bas kota e bage pe i sekelilingna si megi kerna kai si ilakoken Jesus i je. Tapi, selaku kalak Jahudi si patuh, Jesus ras teman-temanna arus minter lawes ku Jerusalem guna ngerayaken Paskah tahun 30 M.

Undang-Undang Dibata nuruh kalak Israel arus mpersembahken korban binatang i rumah pertoton. Selain si e, sedekah tading i Jerusalem, kalak si reh arah ingan si ndauh merluken pangan. Emaka, Undang-Undang Dibata mereken ijin man kalak e guna maba sen gelah banci nukur “lembu, biri-biri, kambing,” bage pe keperlun si deban. (Ulangen 14:​24-​26, Terjemahan Dunia Baru [NW]) Erkiteken si e, dungna perbinaga si lit i Jerusalem ndayaken binatang i halamen rumah pertoton, janah lit piga-piga si erbinaga alu erga si seh kel mergana.

Idah murid-murid Jesus maka merawa kel Jesus erkiteken kai si terjadi i bas rumah pertoton.

Kai si ilakoken Jesus? Itunggalingkenna meja-meja kalak si nukari sen seh asa merap kerina sen logamna e, janah ipelawesna. Kenca si e nina, “Angkat ndarat kerina barangndu e! Ula nai ban rumah Bapakku jadi ingan erbinaga!”​—Johanes 2:​16.

Luar biasa kel akap murid-murid ngenen kejadin e janah teringet kalak e nubuat kerna Anak Dibata, “Semangatku nandangi rumahNdu gurlah bagi api i bas pusuhku.” Tapi nungkun kalak Jahudi, “Mukjizat kai si banci icidahkenndu man kami guna mbuktiken maka lit hakndu ngelakoken si e kerina?” Ijawap Jesus, “Runtuhkenlah rumah pertoton enda, janah i bas telu wari kubangun ka mulihi.”​—Johanes 2:​17-​19; Masmur 69:10.

Akap kalak Jahudi maka Jesus ncakapken kerna rumah pertoton i Jerusalem, emaka nungkun kalak e, “Rumah pertoton enda ibangun 46 tahun dekahna, tapi kam, ibangunndu atendu i bas telu wari?” (Johanes 2:​20) Situhuna, rumah pertoton si imaksud Jesus eme dagingna. Telu tahun kenca si e, paksa Jesus ipekeke, inget murid-murid kata-katana e.