Pasti meriah kel ukurndu ngaloken berita si meriah, si ibereken Dibata Jahwe. Berita enda guna kam ras kalak si ikelengindu.

Berita si meriah enda lit bas Pustaka si Badia eme buku si nggo itulis mbarenda, alu penegu-negu Dibata Jahwe. Arah buku e sipelajari kari empat buku i bas Pustaka si Badia si risiken berita si meriah man banta kerina. Gelar empat buku e ipake arah gelar dilaki-dilaki si ipilih Dibata guna nuliskenca, eme Matius, Markus, Lukas, ras Johanes.

Enterem kalak si nggelari buku-buku e empat Injil. Kata “injil” ngertiken “berita si meriah.” Bali bagi gelarna, empat buku e risiken berita si meriah kerna Jesus si ipilih Dibata guna nelamatken janah jadi Raja i bas Kerajan Dibata, si mereken pasu-pasu si tahan rasa lalap man kerina kalak si erkiniteken man bana.​—Markus 10:​17, 30; 13:13.

Banci saja kam tersungkun-sungkun ngkai maka lit empat buku bas Pustaka si Badia si nceritaken kerna kegeluhen ras ajaren Jesus.

Melala manpaat sidatken arah cerita kerna kai si ikataken ras si ilakoken Jesus. Cuba bayangkenndu lit empat dilaki si tedis i deher sekalak guru si terkenal e. Dilaki si tedis i lebe-lebe guru e, eme pengalo cuke. I sebelah kanan guru e, eme sekalak dokter. Dilaki si i sebelah kiri eme nelayan janah kompak kel ras guru e. Dilaki si peempatken eme si arah pudina si ngudan asangken telu dilaki si debanna. Empatna kalak e jujur. Tiap kalak lit sura-surana ras tujunna tapi la seri carana rukur. Adi itulisken empat dilaki e kerna ajaren ras dahin guru e, labo seri kerina ceritana. Tapi kerina si iceritaken kalak e, eme kerna kai si ilakoken ras si ikataken guru e. Bage ka pe kerna tulisen si nceritaken kerna Guruta si pentar eme  Jesus. Alu mbaca cerita e, sidatken kari terbuen manpaat.

Pengalo cuke ndai nulis guna kalak Jahudi, emaka ikelompokkenna piga-piga kejadin ras ajaren guru e gelah cocok man kalak Jahudi. Dokter nulisken kerna kalak sakit ras cacat si ipepalem, emaka la ituliskenna piga-piga kejadin si itulisken pengalo cuke, ntah pe banci saja ituliskenna alu cara si deban. Dilaki si kompak ras guru pe rusur nulisken kerna sipat ras perasan guru e. Dilaki si terngudan ndai pe labo melala si iceritakenna. Tapi kerina si itulisken kalak e benar. Bage ka pe, empat buku si nceritaken kerna kegeluhen Jesus nampati kita ngangkai dahinna, ajarenna, ras sipat-sipatna.

Banci saja buku e ikataken kalak ‘Injil Matius’ ntah pe ‘Injil Johanes.’ Enda labo salah perban tiap buku risiken “berita si meriah kerna Jesus Kristus.” (Markus 1: 1) Aminna pe empat bukuna, tapi isina sada eme berita si meriah kerna Jesus.

Enterem si nggit erlajar kerna Kata Dibata alu mbandingken ras mpeseri kejadin-kejadin bage pe kebenaren-kebenaren si lit bas buku Matius, Markus, Lukas, ras Johanes. Sekalak penulis arah Siria nari, eme Tatian, ngakui maka empat buku e benar janah rehna i bas Dibata nari. Kira-kira tahun 170 M, isusunna cerita kerna kegeluhen ras pelayanen Jesus bas buku si igelari Diatessaron.

Buku e mirip ras buku Jesus kap Dalan, Kebenaren, ras Kegeluhen. Tapi banci saja perban gundari nggo lebih siangkai erti arah erbage-bage nubuat ras perumpaman Jesus, buku Jesus kap Dalan, Kebenaren, ras Kegeluhen lebih benar ras lengkap. Alu bage banci siangkai ka kata-kata ras kai si ilakoken Jesus arah tangtangna nari seh asa kedungenna. Bukti-bukti si idatken pe erban kai si itulisken jadi reh jelasna, bage pe cara rukur penulis. Memang, labo siteh uga pastina kejadin arah tangtangna nari seh asa kedungen kejadin si itulisken bas Injil. Tapi, alu cara si masuk akal, buku enda isusun ceritana alu ratur.

Sanga ibacandu buku enda, cuba ukuri gunana man bandu ras man kalak si ikelengindu. Ingetlah kai si ikataken Jesus Kristus man rasul Tomas, “Aku kap dalan, kebenaren, ras kegeluhen. Ise pe la banci ndahi Bapak adi la kin arah aku.”​—Johanes 14:6.

Buku Jesus kap Dalan, Kebenaren, ras Kegeluhen banci nampati kam tek maka Jesus kap “dalan.” Arah Jesus ngenca kita banci ndeher ras Dibata bas toto. Jesus me dalan man kerina kalak gelah banci erdame mulihi ras Dibata. (Johanes 16:23; Roma 5:​8) Arah Jesus ngenca maka banci lit hubungenta si rembak ras Dibata.

Jesus kap “kebenaren.” Si rusur icakapken Jesus eme kebenaren janah kegeluhenna pe sue ras kebenaren si iajarkenna. Selain si e, melala nubuat jadi “‘ue’ ntah pe terjadi erkelangken ia.” (2 Korinti 1:​20; Johanes 1:​14) Nubuat-nubuat e mbuktiken maka penting kel tanggung jawap Jesus i bas ndalanken peraten Dibata.​—Ketangkasen 19:10.

Jesus Kristus kap “kegeluhen.” Iberekenna kegeluhenna si sempurna jadi tebusen gelah banci si datken kegeluhen “situhu-tuhu” eme kap “kegeluhen si rasa lalap.” (1 Timotius 6:​12, 19; Epesus 1:7; 1 Johanes 1:7) Ia pe mere “kegeluhen” man erjuta-juta kalak si nggo mate erkiteken ipekekena pagi kalak e janah ndatken kegeluhen si rasa lalap i Pardis.​—Johanes 5:​28, 29.

Kerina kita arus ngergai tanggung jawap Jesus i bas ndalanken peraten Dibata. Mbera meriah akapndu erlajar kerna Jesus eme kap “dalan, kebenaren, ras kegeluhen.”