Kenca ipepalemna budak perwira e, itadingken Jesus Kapernaum jenari lawes ia ku kota Nain si dauhna lebih 32 kilometer sebelah barat daya. Labo ia sisada. Murid-muridna bage pe nterem jelma ikut ras ia. Mungkin nggo nandangi ben kalak e seh i kota Nain. I bas dalan, jumpa kalak e ras rombongen kalak Jahudi si sangana mbaba mayat anak sekalak diberu si mbalu guna ikuburken.

I bas rombongen e, kalak si cedana kel atena eme mamak anak e. Ia nggo mbalu janah anakna si tonggal nggo mate. Sanga mate dilakina, lit denga si tading ras ia eme anak si ikelengina. Pasti kompak kel kalak e janah iarapkenna anakna e pagi si ngurus ia. Gundari ia pe nggo mate. Ise nari si banci nemani ras si ngurus ia?

Sanga idah Jesus diberu e, mekuah kel atena perban ceda kel ate diberu e janah sisada nari ngenca ia. Ipepalem Jesus pusuh diberu e nina, “Ula nai kam ngandung.” Jenari ideherina janah ijemakna ingan maba mayat e. (Lukas 7:​13, 14) Ngidah si ilakoken Jesus e, rempet ngadi rombongen e erdalan. Janah rukur kalak e, ‘Kai maksud dilaki enda janah kai si atena ibanna?’

Kai si iukuri kalak si ikut ras Jesus si nggo ngidah melala mukjizat Jesus? Mungkin lenga pernah idah kalak e ipekeke Jesus kalak mate. Aminna pe mbarenda nggo pernah kalak mate ipekeke, banci nge ilakoken Jesus ka bage? (1 Raja-Raja 17:​17-​23; 2 Raja-Raja 4:​32-​37) Nina Jesus, “O anak perana, kukataken man bandu, kekeken!” (Lukas 7:​14) E me si terjadi. Kundul me dilaki e janah ngerana ia! Ibereken Jesus ia man mamakna si sangana sengget janah ermeriah ukur. Gundari, lanai ia sisada.

 Kenca idah kalak si nterem e anak perana ndai tuhu-tuhu nggeluh, ipuji kalak e Jahwe, Sumber Kegeluhen, nina, “Sekalak nabi si mbelin nggo reh ku tengah-tengahta.” Si debanna ngataken, “Enggo iperdiateken Dibata mulihken umatNa.” (Lukas 7:​16) Berita enda minter seh ku sekeliling negri e janah seh ku kuta Jesus eme Nasaret, si dauhna lit kira-kira sepuluh kilometer. Berita e pe seh ku Judea i selatan.

Johanes Peridiken i bas penjara denga. Meriah kel akapna megi berita kerna kai si ilakoken Jesus. Iceritaken murid-murid Johanes man bana kerna mukjizat-mukjizat si iban Jesus. Uga tanggapenna?