Idah Jairus diberu si sakit pendarahen e ipepalem Jesus. Pastilah anakna si sakit e pe banci ipepalem Jesus, aminna pe iakapna maka ‘gundari anakna si diberu pasti nggo mate.’ (Matius 9:​18) Banci denga nge ndia anakna e ipepalem?

Sanga ngerana denga Jesus ras diberu si ipepalemna ndai, piga-piga dilaki reh arah rumah Jairus janah nina, “Anakndu nggo mate! Man kai nari ngelatihi Guru ena?”​—Markus 5:​35.

Pasti sedih kel Jairus megisa! Anakna si tonggal nggo mate. Jairus kalak si ihamati si gundari nggo bene arapenna. Jesus pe ibegina berita e janah iapulina Jairus, nina, “Ula mbiar, erkiniteken sajalah.”​—Markus 5:​36.

Itemani Jesus me Jairus mulih ku rumahna. Seh kenca kalak e i je, nterem kalak si ngandung, serko, ras ipekpekina bana perban ceda atena. Masuk Jesus ku rumah e, janah nina, “Anak enda labo mate tapi medem nge ia.” (Markus 5:​39) Megi si e, itawai kalak e Jesus. Perban iteh kalak e maka anak e nggo tuhu-tuhu mate. Alu gegeh i bas Dibata nari, ibuktiken Jesus kari maka kalak mate banci nggeluh mulihi seri ras ngingeti kalak si medem.

Isuruh Jesus jelma si nterem e ndarat arah rumah nari. Tapi Petrus, Jakup, Johanes, ras orang tua anak e ibabai Jesus ndahi anak e. Ijemakna anak e, janah nina, “‘Talita kumi,’ adi iterjemahken, ertina: ‘O anak diberu, kukataken bandu, medakken!’” (Markus 5:​41) Minter anak e medak janah erdalan. Bayangken uga ­riahna akap Jairus ras diberuna ngidah si e! Gelah tek kalak maka anak e nggo nggeluh mulihi, isuruh Jesus gelah ia ibere man.

Bagi biasana, la ipediat Jesus kalak si ipepalemna e cerita man kalak si deban kerna kai si ilakokenna. Sekalenda pe ilarang Jesus ka orang tua anak e cerita. Tapi ban riahna ukur kalak e, iceritakenna “ku belang-belang daerah e.” (Matius 9:​26) Adi idahndu kalak si ikelengindu nggeluh mulihi, la kin iceritakenndu man kalak si deban? Enda me kalak si peduaken si ipekeke Jesus si itulis bas Pustaka si Badia.