I tepi Lawit Galilea sebelah timur, ibere Jesus ribun kalak man alu mukjizat, jenari lawes ia sanga ijadiken kalak e atena ia raja. Berngina, erdalan ia i datas lawit si ergalumbang janah iselamatkenna Petrus, si sangana erdalan ka i datas lau tapi menam gedap perban kurang kinitekenna. Ipengadi Jesus ka angin si meter gelah la karam perahu murid-murid e.

Gundari, mulih Jesus ku pinggir Lawit Galilea sebelah barat, daerah Kapernaum janah jumpa ia ras kalak si pernah iberena man alu mukjizat. Isungkun kalak e ia, “Ndiganai kam seh i jenda?” Jenari, inasehati Jesus kalak e perban idarami kalak e ia gelah dat pangan saja atena, nina, “Ula erdahin guna pangan si banci mali. Erdahinlah guna pangan si ndekah tahan janah mereken kegeluhen si rasa lalap.” Jenari nungkun ka kalak ndai, “Kai si arus ilakoken kami guna ndahiken dahin Dibata?”​—Johanes 6:​25-​28.

Banci saja iakap kalak e si icakapken Jesus eme kerna dahin, ntah pe kerna kai si iarusken Undang-Undang Musa. Tapi si imaksudken Jesus eme dahin si seh kel pentingna, nina, “Guna ndahiken dahin Dibata, arus kena erkiniteken man kalak si isuruhNa.” Aminna pe nggo melala iban Jesus mukjizat, tapi la kalak e erkiniteken. Malahen, ipindoken kalak e gelah iban Jesus mukjizat gelah erkiniteken kalak e man Jesus, isungkun kalak e Jesus, “Kai nge si atendu ilakokenndu? Nini bulang kami nai, ipanna manna i taneh mesawang, bagi si lit tertulis, ‘IberekenNa man kalak e roti si reh i surga nari guna ipan.’”​—Johanes 6:29-​31; Masmur 78:24.

Erkiteken ipindoken kalak e mukjizat, ipebetehken Jesus ja nari Sumber kerina mukjizatna e, nina, “Situhuna, labo Musa si mereken roti i surga nari, tapi Bapakku nge si mereken roti situhu-tuhu i surga nari. Roti si ibereken Dibata eme ia si nusur arah surga nari janah mereken kegeluhen man doni.” La iangkai kalak e maksud Jesus, emaka ning kalak e, “O Tuan, bereken min lalap roti e man kami.” (Johanes 6:​32-​34) Kai erti “roti” si ikataken Jesus e?

Ijelasken Jesus, “Aku kap roti kegeluhen e. Ise pe si reh ndahi aku, lanai ia melihe. Janah, ise pe si erkiniteken man bangku, lanai ia muas. Tapi bagi si nggo kukataken man kena, nggo pe idah kena aku tapi lalap kena la tek man bangku. . . . Aku nusur arah surga nari, labo guna ngelakoken peratenku tapi ngelakoken peraten Si nuruh aku. Peraten Si nuruh aku, eme gelah kerina kalak si nggo iserahkenNa man bangku sada pe la bene, tapi gelah i bas wari pendungi pagi, kupekeke me kalak e. Sebap peraten Bapakku eme gelah tiap kalak si ngaloken Anak e janah erkiniteken man bana, ngaloken kegeluhen si rasa lalap.”​—Johanes 6:​35-​40.

Dungna, merawa kalak Jahudi si lit i je, janah mulai jungut-jungut, perban ikataken Jesus dirina “roti si nusur arah surga nari.” (Johanes 6:​41) Menurut kalak e, ia anak kalak Galilea i Nasaret nari ngenca. Sisungkun-sungkunen kalak e, “La kin ia Jesus anak Jusup? Sitandai kap bapakna ras mamakna.”​—Johanes 6:​42.

Nina Jesus, “Ula nai kena jungut-jungut. Labo ise pe banci reh ndahi aku adi la kin itarik Bapak si nuruh aku, janah i bas wari si pendungi pagi kupekeke me ia. Lit tertulis i bas Ajaren Nabi-Nabi, ‘Kerina kalak pagi iajari Jahwe.’ Kerina si megiken Bapak janah erlajar i bas Ia nari, reh ndahi aku. Enda labo ertina maka lit kalak si nggo pernah ngidah Bapak, tapi ia si reh i bas Dibata nari ngenca si nggo ngidah Bapak. Situhuna, ise pe si tek, ialokenna pagi kegeluhen si rasa lalap.”​—Johanes 6:​43-​47; Jesaya 54:13.

Mbarenda, sanga ngerana Jesus ras Nikodemus, nggo ijelasken Jesus maka lit hubungen kegeluhen si rasa lalap ras kiniteken man Anak manusia, nina, “Ise pe si erkiniteken man [Anak Dibata si tonggal] la ikernepken tapi ndatken kegeluhen si rasa lalap.” (Johanes 3:​15, 16) Tapi gundari, ijelasken Jesus man nterem kalak maka adi la kin erkiteken Jesus, labo banci idatken kalak e kegeluhen si rasa lalap. Manna bage pe roti situhu-tuhu si biasa lit i Galilea, labo banci mereken kegeluhen si rasa lalap. Uga maka sidatken kegeluhen si rasa lalap? Iulangi Jesus ka, “Aku kap roti kegeluhen.”​—Johanes 6:​48.

Kerna roti arah surga terus icakapken, intina kel eme sanga Jesus ngajar i bas ingan pulung kalak Jahudi i Kapernaum.