Kalak Jahudi si tading i pantai barat-laut i Lawit Galilea megi berita maka Jesus nggo mulih arah Dekapolis nari. Banci saja nterem si meteh maka nggo ipengadi Jesus angin si meter ras galumbang bage pe kerna kalak si ipepalem arah kerasuken malekat jahat nari. Emaka “nterem kalak” reh ku pantai, kemungkinen i daerah Kapernaum guna ngalo-ngalo Jesus. (Markus 5:​21) Nusur kenca Jesus arah perahu nari, minter idahi kalak e. 

Lit sekalak si merhat kel jumpa ras Jesus eme Jairus. Ia kepala ingan pulung kalak Jahudi si lit i Kapernaum. Erjimpuh ia i lebe-lebe Jesus, janah mindo kel ia, nina, “Anakku si diberu si kitik denga mekelek kel penakitna. Rehlah min kam janah tamaken tanndu ku datasna gelah banci ia malem janah tetap nggeluh.” (Markus 5:​23) E ngenca anak Jairus janah umurna 12 tahun denga. Uga tanggapen Jesus nandangi pemindon Jairus e?​—Lukas 8:​42.

I bas perdalanen ku rumah Jairus, nterem kalak si ikut ras ia lanai sabar. Ngarap kalak e ngidah mukjizat Jesus si deban. Tapi sekalak diberu si lit i tengah-tengah kalak e ngukuri uga gelah pinakitna si mekelek e banci malem.

Diberu e kalak Jahudi, nggo 12 tahun ia pendarahen. Nggo rusur ia ertambar ku erbage-bage dokter janah nggo keri senna. Tapi la malem-malem. Janah pinakitna e “reh kelekna.”​—Markus 5:​26.

Cuba bayangkenndu, penakitna e labo saja erban ia la ergegeh tapi e man kemelanken ka. Biasana kalak si bage penakitna la ia nggit iteh kalak. Selain si e, menurut Undang-Undang Musa, diberu si pendarahen ianggap najis. Ise pe si ndadap ia ntah pe ndadap uisna si kena dareh arus ridi janah najis ia seh karaben.​—Imamat 15:​25-​27.

Sanga ibegi diberu e “berita kerna Jesus,” idaramina ia. Perban ia najis, erbuni-buni ia lewat i bas jelma si nterem e, janah nina, “Adi kudadap saja pe uisna si arah darat e, tentu malem nge aku.” Sanga idadapna ujung uis Jesus, mis ngadi pendarahenna e! Ia “nggo malem i bas penakitna si mekelek e nari.”​—Markus 5:​27-​29.

Kenca si e nina Jesus, “Ise si ndadap aku?” Menurutndu, uga nge perasan diberu e megi kata-kata Jesus? Ijawap Petrus me Jesus nina, “Nterem kel jelma i sekelilingndu janah siasak-asaken ku kam.” Jadi ngkai maka isungkun Jesus, “Ise si ndadap aku?” Nina Jesus, “Lit si ndadap aku, sebap kugejapken ndarat kuasa i bas aku nari.”​—Lukas 8:​45, 46.

Perban iteh diberu e kai si ilakokenna e nggo tereteh, erjimpuh ia i lebe-lebe Jesus janah nggirgir kel ia. I lebe-lebe jelma si nterem e, iceritakenna uga kin situhuna pinakitna e janah gundari nggo malem. Nina Jesus ngapuli diberu e, “O Nakku, kinitekenndu nggo erban kam malem. Laweslah alu dame, janah malemlah i bas penakitndu si mekelek e nari.”​—Markus 5:​34.

Jelas me, Kalak si ipilih Dibata guna merentah doni enda kalak si melias ras perkuah. Labo saja ia ermediate man kalak tapi ngasup ka ia nampatisa!