Sibuk kel Jesus sada wari enda. Kenca mulih ia arah Dekapolis nari, ipepalemna diberu si pendarahen janah ipekekena anak Jairus. Tapi labo e saja si ilakokenna. Kenca itadingkenna rumah Jairus, dua kalak si pentang ngikuti ia, janah alu sora megang ning kalak e, “Mekuah min atendu kami, o Anak Daud.”​—Matius 9:​27.

Alu ngelebuh Jesus “Anak Daud,” tek dilaki e maka Jesus me ahli waris tahta Daud janah ia me Mesias e. La iperdiateken Jesus kalak e perban inen Jesus atena uga tutusna ate kalak e. Sanga masuk Jesus ku sada rumah, ikut duana dilaki e ku bas. Isungkun Jesus kalak e, “Erkiniteken kin kena banci kena kupepalem?” Ijawap kalak e, “Ue, Tuan.” Emaka idadap Jesus mata kalak e janah nina, “Perban kena erkiniteken, jadi me bage.”​—Matius 9:​28, 29.

Minter kalak e banci erpengidah! Bagi si biasa ikataken Jesus, ilarangna kalak e cerita man kalak si deban kerna kai si ilakokenna. Tapi ban riahna ukur kalak e, iceritakenna ku japa pe.

Lawes kenca duana dilaki e ndai, lit si maba sekalak dilaki si irasuki malekat jahat, si erbanca la ia banci ngerana. Ipelawes Jesus me malekat jahat e, dungna banci ia ngerana. Jengang jelma si nterem ngidah si e, nina, “Lenga pernah terjadi si bagenda i bas Israel.” Kalak Parisi pe lit i je. La banci ipersoken kalak e mukjizat e, emaka mulihken ipitnah kalak e kerna kai si ilakoken Jesus, nina, “Ipelawesna malekat-malekat jahat alu penampat penguasa malekat jahat.”​—Matius 9:​33, 34.

Kenca si e, mulih Jesus ku kutana eme Nasaret. Gundari ia itemani murid-muridna. Sada tahun si lewat, ngajar ia i bas ingan pulung kalak Jahudi si lit i je. Luar biasa nge akap kalak e megi ajaren Jesus, tapi dungna itulak kalak e Jesus janah ibunuh kalak e atena ia. Gundari isampati Jesus ka atena teman sada kutana e.

I bas wari Sabat, mulihi Jesus lawes ku ingan pulung kalak Jahudi guna ngajar. Enterem kalak beluh iakapna Jesus ngajar, janah tersungkun-sungkun kalak e, “I ja nari nge rehna kepentaren ras perbahanenna si dem kuasa e?” Nina kalak e, “La kin ia anak tukang kayu? La kin Maria nge nandena, janah Jakup, Jusup, Simon ras Judas nge seninana? Janah turangna pe, la kin i jenda ras kita? I ja nari dage datna kerina enda?”​—Matius 13:​54-​56.

Menurut kalak e Jesus anak kuta Nasaret saja ngenca. Nina kalak e, “Itandai kami ia kitik-kitik nari, la mungkin ia Mesias e!” Aminna pe nggo ibuktiken Jesus maka ia pentar ras banci erban mukjizat, tapi tetap itulak kalak e ia. Janah keluargana sendiri pe nulak ia. Perban si e, nina Jesus, “I japa pe nabi ihamati tapi i kutana ras i bas keluargana lang.”​—Matius 13:⁠57.

Mamang ate Jesus ngidah kurangna kiniteken kalak e. Emaka la ibanna mukjizat i je “selain namaken tanna ku datas piga-piga kalak si sakit janah mpepalem kalak e.”​—Markus 6:5, 6.