Ibereken Jesus man rasul-rasulna petunjuk si jelas janah isuruhna kalak e dua-dua guna erberita. Tapi labo e saja ngenca. Ipersingetina ka kalak e, nina, “Perdiatekenlah! Kusuruh kena bali bagi nuruh biri-biri ku tengah-tengah srigala. . . . Hati-hatilah nandangi manusia, sebap ibaba kalak pagi kena ku pengadilen setempat janah iligasina kena i bas ingan-ingan pulung kalak Jahudi. Ibabana pagi kena ku lebe-lebe gubernur-gubernur ras raja-raja erkiteken aku.”​—Matius 10:​16-​18.

Payo, isiksa me pagi pengikut Jesus. Tapi ikataken Jesus ka, “Sanga kena iserahken kalak e, ula kena kuatir kerna uga ras kai si arus ikataken kena. Ibereken nge kari man kena kai si arus ikataken kena i bas paksa si e, sebap si ngerana labo ngenca kena, tapi kuasa Bapak kena si ngerana erkelangken kena.” Nina Jesus ka, “Kalak si ersenina mereken seninana pagi gelah ibunuh, bage pe bapak nandangi anakna. Anak-anak ngelawan orang tuana janah iberekenna gelah ibunuh. Segat pagi ate kerina kalak man kena erkiteken gelarku. Tapi kalak si megenggeng seh ku kedungenna iselamatken pagi.”​—Matius 10:​19-​22.

Erkiteken penting kel erberita, emaka isuruh Jesus pengikutna hati-hati gelah banci kalak e terus erberita. Nina, “Adi isiksa kalak kena i bas sada kota, kiamlah ku kota si deban. Situhuna, kerina kota Israel lenga pagi serser isiari kena seh asa Anak manusia reh.”​—Matius 10:23.

Seh kel jelasna petunjuk, persinget, bage pe kata-kata Jesus si mpegegehi man 12 rasulna! Pasti penting kel siakap kata-kata Jesus e erkiteken erguna ka man kalak si erberita kenca Jesus mate janah ipekeke. Enda teridah arah kata-katana man murid-muridna “segat pagi ate kerina kalak man kena,” labo saja man rasul-rasul e tapi man ise pe si erberita. Selain si e, labo lit iceritaken kerna rasul-rasul si ibunuh anggota keluargana ntah pe si ibaba ku gubernur-gubernur bage pe raja-raja sedekah kalak e erberita i Galilea.

Pastilah si e lit hubungenna ras kita gundari. Sebap nina labo pagi dung dahin erberita e ilakoken murid-muridna “seh asa Anak manusia reh.” Maksud Jesus murid-muridna terus pagi erberita kerna Kerajan Dibata seh asa Jesus Kristus imuliaken selaku Raja ras Hakim si ipilih Dibata.

Sanga rasul-rasul erberita, arusna la ate kalak e mamang adi lit si la senang. Emaka nina Jesus, “Labo ganjangen sekalak murid asangken guruna, bage pe labo ganjangen sekalak suruh-suruhen asangken tuanna.” Maksud Jesus jelas. Ia pe iadapina perbahanen kalak si la mehuli janah isiksa ia erkiteken mberitaken Kerajan Dibata. Emaka murid-muridna pe ngadapi si e. Nina Jesus, “Ula mbiar man kalak si banci munuh daging tapi la banci meneken kesah, tapi mbiarlah man Dibata si banci ngkernepken daging ras kesah i Gehena.”​—Matius 10:​24, 28.

I bas si e nggo ibereken Jesus contoh. La ia mbiar mate gelah tetap setia man Jahwe. Dibata Si Madakuasa banci ngkernepken “kesah” (eme arapen kegeluhen si rasa lalap) ntah pe banci mpekeke kalak guna ndatken kegeluhen si rasa lalap. Kata-kata enda pasti mpegegehi rasul-rasul!

Guna mbuktiken kekelengen Dibata nandangi pengikutna, iceritakenna sada perumpaman, “La kin dua perik cipcip adi idayaken ergana sada sen logam si kitik ngenca? Tapi labo sada pe perik e ndabuh ku taneh alu la iteh Bapak kena. . . . Emaka ula mbiar, ergan nge kena asangken melala perik cipcip.”​—Matius 10:​29, 31.

Berita si ipeseh murid-murid Jesus e erban anggota keluarga jadi lanai sada arih, lit si ngaloken lit ka si lang. Nina Jesus, “Ula iakap kena aku reh ku doni enda maba dame.” Emaka anggota keluarga si ngaloken kebenaren Pustaka si Badia arus pang. Nina Jesus ka, “Ise pe si kelengen atena bapakna ntah pe mamakna asangken aku, ia la cocok ras aku, janah ise pe si kelengen atena anakna si dilaki ntah si diberu asangken aku, ia la cocok ras aku.”​—Matius 10:​34, 37.

Tapi piga-piga kalak meriah ukurna ngalo-ngalo murid Jesus. Nina, “Ise pe si mereken sada cangkir lau mbergehlah gia man salah sada i bas kalak si kitik enda erkiteken ia muridku, ialokenna nge pagi upahna.”​—Matius 10:42.

Tuhu-tuhu isikapken Jesus rasul-rasulna alu petunjuk, persinget, bage pe kata-kata si mpegegehi. Emaka lawes me kalak e “ku kerina kuta si lit bas daerah e guna mberitaken berita si meriah ras mpepalem kalak.”​—Lukas 9:6.