I Kapernaum, sibuk kel Jesus bage pe empatna muridna. Sanga karaben, ibaba kalak i Kapernaum kalak si sakit man Jesus guna ipepalem. Mesera iakap Jesus ndarami waktu guna ertoto man Bapakna.

Paginna, i bas erpagi-pagi lampas janah gelap denga, medak Jesus janah lawes ia sisada ku darat. Idaramina ingan si melungen gelah banci ia ertoto man Bapakna. Tapi la ia banci ndekah bage. Kenca lanai idah kalak ndai Jesus, “Simon ras murid-murid si deban ndarami ia.” Perban Petrus si mpuna rumah, mungkin ia me si leben ndarami Jesus.​—Markus 1:​36; Lukas 4:​38.

Kenca nggo jumpa ras Jesus, nina Petrus, “Kerina kalak ndarami kam.” (Markus 1:37) La ateta mamang, engkai maka merhat kalak i Kapernaum gelah Jesus tetap i je. Iergai kalak e kel kai si nggo ilakoken Jesus, emaka “iusahaken kalak e gelah ula Jesus lawes i bas kalak e nari.” (Lukas 4:​42) Mpepalem pinakit saja kin ngenca dahin Jesus reh ku doni? Janah i bas daerah e saja kin ngenca ia ngelayani? Uga nina Jesus kerna si e?

Nina Jesus man murid-muridna, “Eta kita lawes ku ingan si deban, gelah banci ka aku erberita i je, sebap erkiteken si e me aku reh.” Nina Jesus man kalak si ngelarang ia lawes ndai, “Aku pe arus ka mberitaken berita si meriah kerna Kerajan Dibata ku kota-kota si deban, sebap erkiteken si e me aku isuruh.”​—Markus 1:38; Lukas 4:43.

Alasen utama Jesus reh ku doni eme mberitaken kerna Kerajan Dibata. Kerajan e me pagi si mpebadiaken gelar Bapakna ras si erban kerina penakit malem seh rasa lalap. Ibuktiken Jesus maka ia isuruh Dibata alu erban mukjizat-mukjizat. Ratusen tahun si mbarenda, nggo ilakoken Musa perbahanen-perbahanen si luar biasa guna mbuktiken maka ia isuruh Dibata.​—Keluaren 4:​1-9, 30, 31.

Emaka itadingken Jesus kota Kapernaum guna erberita ku kota-kota si deban, empatna muridna pe ikut ras ia. Si empat kalak e eme Petrus ras seninana Andreas bage pe Johanes ras seninana Jakup. Seminggu si lewat, nggo iundang Jesus kalak e jadi temanna erberita.

Mbelin kel asilna sanga Jesus ras empat muridna erberita i Galilea! Mbelang kel beritana kerna Jesus. “Berita kerna ia seh ku belang-belang Siria,” ku sepuluh daerah si igelari Dekapolis, janah seh ku daerah sebrang Lau Jordan. (Matius 4:​24, 25) Enterem kel kalak arah daerah e bage pe arah daerah Judea ngikutken Jesus ras murid-muridna. Enterem si maba kalak sakit gelah ipepalem Jesus. La ikecewaken Jesus kalak e. Ipepalemna kalak si sakit e janah ipelawesna malekat-malekat jahat arah kalak si kerasuken nari.