Enggo melala si ilakoken Jesus sedekah pelayanenna i Galilea. Tapi maksud Jesus labo i Galilea saja ia erberita. Nina, “Aku pe arus ka mberitaken berita si meriah kerna Kerajan Dibata ku kota-kota si deban. . . . Emaka lawes ia erberita i bas ingan-ingan pulung kalak Jahudi i Judea.” (Lukas 4:​43, 44) Enda waktu si cocok janah perayan i Jerusalem nggo ndeher.

I bas Injil, sitik ngenca cerita kerna pelayanen Jesus i Judea, buen iceritaken kerna pelayanenna i Galilea. Aminna pe buen kalak Judea la senang nandangi berita Jesus, la ia ngadi erberita ras ngelakoken perbahanen si mehuli i japa pe ia tading.

Lawes Jesus ku kota si penting i Judea, eme Jerusalem, guna ngerayaken Paskah tahun 31 M. Lit ingan si meriah i deher Gerbang Biri-Biri, i je lit kolam si galang si igelari Betesda. Enterem si sakit, pentang, ras lumpuh reh ku kolam e. Engkai? Perban kolam e iteki banci mpepalem pinakit adi masuk ku bas sanga launa erburak ntah pe berguncang.

Gundari wari Sabat, iidah Jesus sekalak dilaki i deher kolam e si sakit 38 tahun dekahna. Nungkun Jesus, “Nggit nge kam malem?” Ijawap dilaki e, “O Pak, la lit kalak si namaken aku ku bas kolam e sanga erburak launa. Masuk kenca ateku ku bas, mis lebei kalak.”​—Johanes 5:​6, 7.

Sengget kel dilaki e bage pe kalak si megiken Jesus sanga nina, “Cinderken! Angkat amakndu, jenari erdalanlah.” (Johanes 5:8) Minter cinder dilaki e. Minter malem pinakitna e, iangkatna amakna jenari erdalan ia!

La meriah akap kalak Jahudi ngenen kejadin si luar biasa e, tapi segat atena janah nina man dilaki e, “Wari Sabat kap sendah. La banci iangkatndu amakndu.” Ijawap dilaki e, “Nina kalak si nggo mpepalem aku ndai, ‘Angkat amakndu, jenari erdalanlah.’” (Johanes 5:​10, 11) Segat ate kalak Jahudi perban lit kalak si mpepalem i bas wari Sabat.

Nungkun ka kalak Jahudi, “Ise si nuruhsa kam ngangkat amak e ras erdalan?” Engkai maka isungkun kalak e dilaki e? Perban “Jesus nggo lawes arah tengah jelma si nterem” e, janah la iteh dilaki e gelar Jesus. (Johanes 5:​12, 13) Tapi i bas kesempaten si deban jumpa denga dilaki e ras Jesus. I bas rumah pertoton jumpa me dilaki e ras Jesus dungna itehna ise si mpepalem ia i deher kolam ndai.

Idarami dilaki e me kalak Jahudi si nungkuni ia kerna ise si erbanca ia malem. Ikatakenna man kalak e, Jesus kepe si mpepalem ia. Megi si e, lawes kalak Jahudi e ndahi Jesus. Tujun kalak e labo guna meteh ngkai banci iban Jesus perbahanen si luar biasa e, tapi guna nalahken Jesus perban ilakokenna sanga wari Sabat. Janah mulai ipandangi kalak e ia!