Enggo dua tahun dekahna semangat kel Jesus erberita. Gundari santai-santai nge Jesus? Lang, tapi terus ia erberita i “kota-kota ras kuta-kuta [i Galilea]. Ngajar ia i bas ingan-ingan pulung kalak Jahudi janah iberitakenna berita si meriah kerna Kerajan. Ipepalemna kerina erbage pinakit ras kerina masalah kesehaten.” (Matius 9:​35) Arah kai si idahna e erban ia reh tekna maka berita si meriah arus terus iberitaken. Tapi uga carana?

Bas perdalanenna e, idah Jesus maka nterem kalak perlu penampat janah iapuli gelah rembak ras Dibata. Kalak e bali bagi biri-biri si la lit permakanna, ikuliti janah iambekken. Mekuah ate Jesus nandangi kalak e janah nina man murid-muridna, “Mbelang man peranin, tapi kurang si erdahin. Emaka pindolah man Si Mada peranin, gelah isuruhNa si erdahin guna peraninNa e.”​—Matius 9:​37, 38.

Iteh Jesus kai si banci nampatisa. Idilona 12 rasul-rasulna janah ibanna kalak e jadi enem kelompok. Janah iberena petunjuk si jelas, “Ula kam lawes ku daerah bangsa-bangsa si deban, janah ula masuk ku kota kalak Samaria. Tapi laweslah ndahi kalak Israel saja si bali bagi biri-biri si nggo papak. Sanga kena erberita, kataken, ‘Kerajan surga nggo ndeher.’”​—Matius 10:​5-7.

Kerajan si iberitaken kalak e seri ras Kerajan si ikataken Jesus i bas contoh toto si iajarkenna. ‘Kerajan nggo ndeher’ erkiteken Raja si ipilih Dibata eme Jesus Kristus nggo reh. Kai buktina maka murid-muridna jadi wakil Kerajan e? Ibereken Jesus kalak e kuasa guna mpepalem kalak si sakit, mpegeluh kalak mate. Janah la kalak e perlu igalari guna ngelakokenca. Jadi uga murid-murid e ndatken keperlunna tiap wari?

Ikataken Jesus man murid-muridna maka la perlu ibaba kalak e kai pe. La perlu ibaba kalak e emas, pirak, tembaga, bage pe ingan pangan, baju ganti, ntah pe selop i bas perdalanenna. Engkai maka bage? Nina Jesus, “Kalak si erdahin patut ngaloken upahna.” (Matius 10:10) Kalak si ngergai berita si ipeseh rasul-rasul e nge si mereken keperlun kalak e. Nina Jesus, “Ku rumah ise pe kena masuk, tadinglah i je ngayak kena lawes je nari.”​—Markus 6:​10.

Ibereken Jesus ka petunjuk man kalak e uga carana mpeseh berita Kerajan e, nina, “Adi masuk kena ku sada rumah katakenlah, ‘Mejuah-juah!’ Adi kena ialo-alo bas rumah e, reh me kedamen i je, tapi adi la kena ialo-alona, mulihken man kena kedamen e. I japa pe adi lit kalak si la ngaloken kena ntah pe la megiken kata-kata kena, kisamken abu si lit i bas nahe kena sanga itadingken kena rumah ntah pe kota e.”​—Matius 10:​12-​14.

Banci saja kerina kalak bas kota ntah pe kuta e nulak berita kalak e. Adi bage, kai pagi si terjadi? Ikataken Jesus maka iukum me pagi kalak e. Nina, “Situhuna, i bas Wari Penghakimen pagi, beraten ukumen man kota e asangken man Sodom ras Gomora.”​—Matius 10:15.