Seh Jesus ras murid-muridna i Betsaida. I je, lit sekalak dilaki si pentang si ibaba kalak ku Jesus, janah ipindo kalak e gelah idadap ras ipepalem Jesus ia.

Jenari, ijemak Jesus tan dilaki e janah iteguna ku darat kuta. Iciduri Jesus mata dilaki e janah isungkunna, “Kai si idahndu?” Ijawap dilaki e, “Kuidah jelma, tapi bagi batang kayu si erdalan-dalan.” (Markus 8:​23, 24) Ijemak Jesus mata dilaki e janah banci ia erpengidah alu jelas. Kenca si e, isuruh Jesus ia mulih tapi ilarangna masuk ku bas kuta ndai.

Kenca si e, lawes Jesus ras murid-muridna ku sebelah utara i Kesarea i Pilipi. Arus kalak e nangkeng kira-kira 40 kilometer dauhna. Adina isibari arah datas lawit nari, ganjangna ingan si man dahin kalak e lit 350 meter. I sebelah timur-laut, lit Deleng Hermon janah i das tampuk deleng e lit saljuna. Banci saja erwari-wari dekahna perdalanen kalak e.

I bas tengah dalan, lawes Jesus guna ertoto sisada. Kira-kira siwah ntah sepuluh bulan nari, Jesus nandangi mate janah kuatir ia man murid-muridna. Mbaru-baru enda nterem pengikutna si bingung, kitik ukur, nterem ka si nadingken ia. Banci saja mamang ate kalak e perban la nggit Jesus ijadiken raja ntah pe erban mukjizat guna ncidahken ise ia situhuna.

Sanga reh murid-murid ku ingan Jesus ertoto, nungkun Jesus, “Nina kalak, ise kin Anak manusia e?” Ngaloi kalak e, “Piga-piga ngatakenca Johanes Peridiken, si debanna Elia, ras lit ka si ngatakenca Jeremia ntah salah sada nabi.” Enterem kalak si erpengakap maka Jesus eme salah sada nabi si nggo ipekeke. Emaka, iteh Jesus atena pendapat murid-muridna, nina, “Adi menurut kena, ise kin aku?” Mis ijawap Petrus, “Kam kap Kristus, Anak Dibata si nggeluh.”​—Matius 16:​13-​16.

Ikataken Jesus maka Petrus banci ermeriah ukur perban ipebetehken Dibata kerna si e man bana. Nina Jesus ka, “Kukataken ka man bandu, kam kap Petrus, janah i datas batu enda pagi kubangun runggunku, janah gerbang-gerbang Kuburen pe la banci nalukenca.” Si sangana icakapken Jesus eme runggun si nandangi ibanna. Adi anggota runggun e setia seh asa mate, ipekeke pagi kalak e guna nggeluh i surga. Erjanji Jesus man Petrus, “Kubereken pagi man bandu kunci-kunci Kerajan surga.”​—Matius 16:​18, 19.

Labo ibere Jesus man Petrus keduduken si ganjangen asangken rasul-rasul si deban. Labo ka ikatakenna maka Petrus si jadi pondasi utama runggun. Jesus kap pondasi utama runggun. (1 Korinti 3:​11; Epesus 2:​20) Tapi ibere Jesus man Petrus telu kunci. Ialoken Petrus tanggung jawap si istimewa guna mbuka kesempaten man piga-piga kelompok kalak gelah masuk ku Kerajan surga.

 I bas Pentakosta tahun 33 M, ipake Petrus kunci si pertama man kalak Jahudi ras kalak si dungna eragama Jahudi. Ipebetehken Petrus man kalak e kerna kai si arus ilakoken kalak e gelah selamat. Ipake Petrus kunci si peduaken guna mbuka kesempaten man kalak Samaria si erkiniteken. I bas tahun 36 M, ipake Petrus kunci si peteluken guna mbuka kesempaten man kalak arah bangsa si deban, contohna Kornelius ras si debanna.​—Perbahanen Rasul-Rasul 2:​37, 38; 8:14-17; 10:44-48.

Ceda kel ate rasul-rasul sanga ikataken Jesus i bas waktu si kentisik nari ia nandangi isiksa janah ibunuh i Jerusalem. Erkiteken la ieteh Petrus maka Jesus ipekeke pagi guna nggeluh i surga, itarik Petrus ia ku samping janah ipersingetina, “Mekuahlah atendu bandu, Tuan. Labo banci terjadi si enda kerina man bandu.” Tapi ipudiken Jesus me Petrus janah nina, “Laweslah ku pudiku, Setan! Kam kap si ngambati aku, perban kai si iukurindu labo perukuren Dibata tapi perukuren manusia.”​—Matius 16:​22, 23.

Kenca si e, ilebuh Jesus rasul-rasul ras murid-murid si debanna janah ijelaskenna man kalak e maka labo menukah guna jadi pengikutna. Nina Jesus, “Ise atena ngikutken aku, lanai ia banci nggeluh man dirina sendiri janah arus iangkatna tiang siksanna bage pe terus ikutkenna aku. Sebap ise pe si atena nelamatken kesahna, kebenen kesahna nge pagi, tapi ise pe si kebenen kesahna erkiteken aku ras erkiteken berita si meriah, selamat nge pagi.”​—Markus 8:​34, 35.

Jelas me, pengikut Jesus arus perpang ras nggit erkorban. Nina Jesus, “Ise pe i bas kalak enda nari si mela nandangi aku ras kata-kataku, Anak manusia pe mela ka nge pagi nandangi ia sanga reh Anak manusia e i bas kemulian Bapakna ras malekat-malekat si badia.” (Markus 8:38) Sanga Jesus reh, “ibalasna me tiap kalak menurut perbahanenna.”​—Matius 16:27.