Sanga Jesus, Petrus, Jakup, ras Johanes nusur arah Deleng Hermon, jumpa kalak e ras jelma si nterem. Lit si la beres. Ikelilingi ahli-ahli Undang-Undang Musa murid-murid janah sijawapen ras kalak e. Sanga murid-murid si deban ngidah Jesus, meriah ukur kalak e janah iayakina Jesus guna ngalo-ngalosa. Isungkun Jesus kalak e, “Kai si ipersoalken kena ras kalak e?”​—Markus 9:​16.

I bas jelma si nterem e nari, lit sekalak dilaki si erjimpuh i lebe-lebe Jesus, nina, “O Guru, kubaba anakku si dilaki bandu erkiteken irasuki malekat jahat ia si erbanca ia bisu. Tiap irasuki malekat jahat e ia, idampes-dampeskenna ia ku taneh, janah rugup babahna, ipenna pe erderep ras bene gegehna. Enggo kupindoken man murid-muridndu mpelawessa, tapi la kalak e ngasup.”​—Markus 9:​17, 18.

Banci saja, itokohi ras ipandangi ahli-ahli Undang-Undang Musa murid-murid e perban la ngasup mpepalem anak dilaki e. Emaka la minter ijawap Jesus bapak anak e, tapi ngerana ia lebe man jelma si nterem e, nina, “O kena kalak si la erkiniteken ras jahat, asa kai nari dekahna aku arus terus ras kena? Asa kai nari dekahna aku arus sabar man kena?” Ranan si meser e ibelasken Jesus man ahli-ahli Undang-Undang Musa si nokohi murid-muridna. Jenari, ngerana Jesus man bapak anak si kerasuken e, “Baba ia ku jenda.”​—Matius 17:17.

Sanga ideheri anak e Jesus, kejang-kejang ia janah ndabuh ku taneh iban malekat jahat si ngerasuki ia. Jenari, guling-guling anak e janah rugup babahna. Nungkun Jesus, “Enggo asa dekahna ia bagena?” Ngaloi bapakna, “Kitik-kitikna nari, janah rusur idampeskenna ia ku bas api bage pe ku bas lau guna munuh ia. Tapi adi ngasup kam, mekuah min atendu janah sampati min kami.”​—Markus 9:​21, 22.

Nggo nyerah dilaki e sebap murid-murid Jesus pe la ngasup nampati ia. Ipetenang Jesus alu ngataken, “Kai nindu, ‘Adi aku ngasup’? La lit si la mungkin man kalak si erkiniteken.” Minter ngerana dilaki e alu megang, “Erkiniteken nge aku! Sampati min aku gelah tambah kinitekenku!”​—Markus 9:​23, 24.

Idah Jesus jelma si nterem ngayaki kalak e. I lebe-lebe kerina kalak, isergang Jesus malekat jahat e, nina, “Kam malekat jahat si erbanca bisu ras pasek, kuperentahken kam gelah ndarat i bas ia nari, janah ula nari rasuki ia!” Sanga ndarat malekat jahat e, nggo ibanna anak e serko janah kejang-kejang. Jenari, ampar me anak e janah lanai kemuit. Ngidah si e, nterem si ngataken, “Ia nggo mate!” (Markus 9:​25, 26) Tapi sanga ijemak Jesus tan anak e, medak me anak e. I bas paksa si e, “minter ia malem.” (Matius 17:18) Pasti luar biasa kel akap kalak e ngidah kai si ilakoken Jesus.

I bas waktu si lewat, sanga isuruh Jesus murid-muridna erberita, banci ipelawes kalak e malekat-malekat jahat. Emaka kenca masuk Jesus ku bas sada rumah, nungkun murid-muridna sanga la lit kalak si deban, “Engkai maka la banci ipelawes kami?” Ijelasken Jesus maka kurang kiniteken kalak e, nina, “Si bagenda alu toto ngenca banci mpelawessa.” (Markus 9:28, 29) Gelah banci mpelawes malekat jahat si megegeh, arus paguh kel kiniteken murid-murid e janah ertoto mindo kuasa arah Dibata nari.

Nina Jesus ka, “Perban kitik kiniteken kena. Situhuna, adi lit kin kiniteken kena asa biji sawi lah gia, banci ikataken kena man deleng enda, ‘Miser jenda nari ku jah,’ maka miser me ia, janah kai pe banci ilakoken kena.” (Matius 17:20) Tuhu-tuhu luar biasa kel kuasa kiniteken!

I bas ngelayani Jahwe, banci saja kiniseran ras kesusahenta bali bagi deleng si seh kel galangna janah la banci ipindahken. Tapi, adi sipepaguh kinitekenta, banci sidungi masalahta si bagi deleng galangna.