Kenca ipersingeti Jesus kalak Parisi si erban adat guna mentingken bana, lawes Jesus ras murid-muridna. Lawes kalak e ku sebelah barat lawit. Tujun kalak e eme kota Tirus ras Sidon i Punike.

Idah Jesus i je rumah si banci iinganina, tapi la ate Jesus ieteh kalak si deban maka ia sangana i je. Aminna pe bage, tetap saja idah kalak Jesus. Misalna, lit sekalak diberu kalak Junani si rehna arah daerah e, mindo man Jesus, “Mekuah min atendu aku, Tuan, Anak Daud. Anakku si diberu irasuki malekat jahat, mekelek kel keadanna.”​—Matius 15:22; Markus 7:​26.

Kenca si e, ipindo murid-murid man Jesus, “Suruhlah ia lawes, erkiteken terus ia nderkuh man banta.” La diate Jesus diberu e janah nina, “Aku isuruh Dibata ndahi kalak Israel ngenca, si bali bagi biri-biri si nggo papak.” Tapi la nyerah diberu e. Idahina Jesus janah erjimpuh man bana, nina, “O Tuan, sampati min aku!”​—Matius 15:​23-​25.

Banci saja, iuji Jesus kiniteken diberu e, emaka nina, “La patut ibuat roti i bas anak-anak nari janah iambekken man anak-anak biang.” (Matius 15:26) Paksa si e, la merga akap kalak Jahudi bangsa si deban. Tapi ipake Jesus istilah “anak-anak biang,” mbuktiken maka ermediate Jesus man kalak arah bangsa si deban. Paksa Jesus ngerana kerna si e, pasti teridah arah ayo bage pe sora Jesus si lembut.

La kitik ukur diberu e megi ranan Jesus, malahen alu meteruk rukur ikatakenna, “Payo, Tuan, tapi situhuna anak-anak biang pe man rimah-rimah si ndabuh arah meja tuanna nari nge.” Isadari Jesus maka tuhu-tuhu erkiniteken diberu e, emaka nina, “Mbelin kel kinitekenndu. Jadilah bagi si iarapkenndu.” (Matius 15:​27, 28) Aminna pe anak diberu e la lit i je, ipepalem Jesus ia! Sanga diberu e mulih, idapetina anakna tayang i bas ingan medem, janah “malekat jahat e nggo lawes.” Anak e nggo malem!​—Markus 7:​30.

Lawes Jesus ras murid-muridna arah Punike nari ku Lau Jordan. Banci saja, isebrangi kalak e Lau Jordan arah sebelah utara Lawit Galilea, jenari lawes ku daerah Dekapolis. I je, nangkeng Jesus ras murid-muridna ku deleng, tapi banci denga jelma si nterem e njumpai kalak e. Rehen kalak e maba jelma si lumpuh, cacat, pentang, ras bisu. Itamaken kalak e kalak si sakit e i deher nahe Jesus, janah ipepalem Jesus kalak e. Luar biasa kel akap jelma si ngidah kejadin e. Ipuji kalak e Jahwe, Dibata Israel.

Iperdiateken Jesus kel sekalak dilaki si pasek janah mesera ngerana. Pasti iangkaindu uga perasan dilaki e sanga i tengah jelma si nterem e. Banci saja iteh Jesus maka la akap dilaki e sikap i je, emaka ibaba Jesus ia lawes ku ingan si melungen. Sanga kalak e dua-dua saja, lit si ate Jesus ilakokenna. Imasukkenna jari-jarina ku cuping dilaki e. Jenari, ercidur Jesus janah ikuitna dilah dilaki e. Kenca si e, inen Jesus ku langit, janah nina, “Eppata,” si ertina, “Terbukalah.” Minter dilaki e erpemegi janah banci ngerana alu sikap. Ilarang Jesus kalak e cerita man ise pe. Ate Jesus min gelah erkiniteken kalak man bana erkiteken ngidah perbahanen ras megiken ajarenna.​—Markus 7:​32-​36.

Mukjizat Jesus guna mpepalem erban “jengang kel” kalak e, janah ning kalak e, “Luar biasa kel kerina si ilakokenna. Ibanna kalak pasek erpemegi, ras kalak bisu pe banci ngerana.”​—Markus 7:​37.