Sanga Jesus ituduh kalak Jahudi ngelanggar peraturen wari Sabat perban ipepalemna sekalak dilaki, ijawap Jesus, “Bapakku terus erdahin ngayak gundari, emaka aku pe terus erdahin.”​—Johanes 5:​17.

Situhuna, kai si ilakoken Jesus labo ilarang i bas undang-undang Dibata kerna wari Sabat. Jesus erberita ras mpepalem kalak perban ia ngusih dahin si mehuli si ilakoken Dibata. Emaka tiap wari terus ilakoken Jesus dahin si mehuli. Jawapen Jesus man kalak si mandangi ia erban kalak e reh rawana, dungna ibunuh kalak e atena Jesus. Uga maka bage?

Selain nuduh Jesus ngelanggar aturen wari Sabat, kalak e pe la senang megi Jesus ngaku jadi Anak Dibata. Ianggap kalak e Jesus nghina Dibata perban ikatakenna Ia Bapakna berarti seri Jesus ras Dibata. Tapi Jesus la mbiar, janah ijelaskenna hubungenna si rembak ras Dibata. Nina, “Keleng ate Bapak nandangi Anak, janah icidahkenNa kerina man Anak e kai si ilakokenNa.”​—Johanes 5:​20.

Bapak eme Sumber Kegeluhen. Enda nggo ibuktikenNa alu mereken kuasa man manusia guna mpekeke kalak mate. Nina Jesus, “Bali bagi Bapak nggo ipekekeNa kalak si mate, jenari iberekenNa kegeluhen man bana, bage ka me Anak, ipegeluhna pagi ise pe si atena ipegeluhna.” (Johanes 5:21) Kata-kata e tuhu-tuhu penting janah mereken arapen! Aminna pe gundari kekeken si iban Anak e labo kekeken daging. Nina Jesus, “Ise pe si megiken kataku enda janah tek man Dibata si nuruh aku, ndatken kegeluhen si rasa lalap janah labo ihakimi. Janah, ia bali bagi kalak si nggo mate tapi gundari nggo nggeluh mulihi.”​—Johanes 5:24.

Memang lenga bo lit si ipekeke Jesus, tapi ikatakenna bage man kalak si nuduh ia guna ngataken kerna kekeken si nandangi terjadi. Nina Jesus, “Reh me waktuna maka kerina kalak si lit i bas kuburen megi sorana pagi, jenari ndarat me.”​—Johanes 5:​28, 29.

Penting kel tanggung jawap Jesus selaku hakim ras mpekeke kalak mate. Aminna pe bage, ikatakenna maka ganjangen nge Dibata asangken ia, nina, “Kai pe labo banci kulakoken menurut peratenku saja. . . . La kuhakimi kalak menurut peratenku tapi menurut peraten Si nuruh aku nge.” (Johanes 5:30) Enda me tangtangna ikataken Jesus man jelma si nterem kerna tanggung jawapna si penting i bas peraten Dibata. Tapi kalak si nuduh Jesus nggo itehna kerna si e. Ingetken Jesus kalak e, nina, “Enggo isuruh kena kalak njumpai Johanes, janah nggo ikataken Johanes kerna kebenaren.”​—Johanes 5:33.

Dua tahun si lewat, nggo ipebetehken Johanes man peminpin agama Jahudi kerna Kalak si nandangi reh kenca ia, si igelari pagi “Nabi” ras “Kristus.” (Johanes 1:​20-​25) Isingetken Jesus man kalak Jahudi e maka iergai kalak e kel sange Johanes si gundari nggo ipenjara, nina Jesus, “I bas waktu si kentisik, merhat kena ngaloken terangna e.” (Johanes 5:35) Aminna pe bage, kesaksin si ibereken Jesus belinen asangken si ilakoken Johanes Peridiken.

‘Dahin e [termasuk mpepalem kalak] si jadi bukti maka aku isuruh Bapak.’ Jenari nina Jesus ka, “Bapak si nuruh aku e pe nggo ersaksi kerna aku.” (Johanes 5:​36, 37) Contohna, ibereken Dibata kesaksin kerna Jesus sanga ia iperidiken.​—Matius 3:​17.

Emaka, arusna labo lit alasen kalak e nuduh Jesus. Kitap si Badia si iakui kalak e ipelajarina mereken bukti si jelas kerna Jesus. Nina Jesus, “Adi tek kin kena man Musa, arusna tek ka nge kena man bangku, sebap Musa e nge si nulisken kerna aku. Tapi adi la kena tek man kai si ituliskenna, uga ka kena banci tek man kai si kukataken?”​—Johanes 5:​46, 47.