Kira-kira nggo sada tahun dekahna Johanes Peridiken i bas penjara. Terus ibegina kerna mukjizat si iban Jesus. Iceritaken murid-muridna kerna anak sekalak diberu mbalu i Nain si ipekeke Jesus. Cuba bayangkenndu uga perasan Johanes sanga megi si e. Pasti merhat Johanes langsung megikensa arah Jesus. Emaka, isuruh Johanes dua muridna. Erkai? Guna nungkun Jesus, “Kam kin kalak si nandangi reh e, ntah itimai kami denga kalak si deban?”​—Lukas 7:​19.

Johanes e kalak si erkiniteken, uga maka bage penungkunenna? Dua tahun si nggo lewat, sanga iperidikenna Jesus, idahna kesah si badia nusur ku datas Jesus. Ibegina ka sora Dibata si ngataken maka ngena ateNa Jesus. La lit buktina kiniteken Johanes reh urakna. Sebap ipujiken Jesus nge Johanes paksa si e. Adi bage, ngkai maka bagenda penungkunen Johanes man Jesus?

Banci saja merhat Johanes langsung megi Jesus si ngataken maka ia me Mesias. Enda pasti erban Johanes reh semangatna i bas penjara. Emaka, lit maksud si deban arah penungkunen e. Itehna nubuat-nubuat i bas Pustaka si Badia si ngataken maka Kalak si Ipilih Dibata e jadi raja ras si mbebasken pagi. Tapi, piga-piga bulan kenca Jesus iperidiken, Johanes ipenjaraken. Emaka isungkun Johanes ntah lit nge kalak si deban si erban nubuat kerna Mesias e terjadi.

La minter iakui Jesus maka ia me Mesias e, tapi iberekenna bukti maka ia isuruh Dibata alu mpepalem kerina kalak si sakit. Emaka nina man murid-murid Johanes, “Dahilah Johanes, turiken man bana kai si ibegi ras si idah kena: Kalak pentang gundari erpengidah, si lumpuh erdalan, si sakit kusta ipepalem, si pasek erpemegi, si mate ipekeke, janah berita si meriah iberitaken man kalak mesera.”​—Matius 11:​4, 5. 

Penungkunen Johanes e ncidahken maka ngarap ia ilakoken Jesus terbuen asangken si nggo ilakokenna. Banci saja ngarap ia ibebasken Jesus arah penjara. Tapi ikataken Jesus gelah ula iarapken Johanes terbuen mukjizat.

Kenca lawes murid-murid Johanes, ikataken Jesus man jelma si nterem maka Johanes lebihen asangken nabi. Ia kap “persuruhen” Jahwe si inubuatken i bas Maleaki 3:1. Ia pe nabi Elia si inubuatken i bas Maleaki 4:​5, 6. Nina Jesus, “Situhuna, Johanes Peridiken kap si mbelinna i bas kerina si lahir i bas diberu nari, tapi si kitikna i bas Kerajan surga belinen asangken ia.”​—Matius 11:11.

Alu ngataken si kitikna i bas Kerajan surga belinen asangken Johanes, e ertina Johanes la pagi ikut ku surga. Isikapken Johanes dalan man Jesus, tapi mate ia ope lenga ibuka Kristus dalan ku surga. (Heber 10:​19, 20) Aminna pe bage, Johanes sekalak nabi si erkiniteken man Dibata, janah nggeluh ia pagi i doni jadi rakyat Kerajan Dibata.