I bas wari Sabat si deban, idahi Jesus ingan pulung kalak Jahudi, banci saja i Galilea. I je ijumpaina sekalak dilaki si lumpuh tan kananna. (Lukas 6:6) Iperdiateken ahli Undang-Undang Musa ras kalak Parisi kai si ilakoken Jesus. Kai tujunna? Si e teridah sanga kalak e nungkun, “Banci kin kalak sakit ipepalem i bas wari Sabat?”​—Matius 12:10.

Menurut peminpin agama Jahudi, sekalak jelma banci ipepalem adi nggo nandangi mate. Contohna, i bas wari Sabat, la banci ipepalem kalak si penggel tulanna ntah pe nambari kalak si siher perban e labo banci erban mate. Jelas kel maka ahli Undang-Undang Musa ras kalak Parisi nungkun Jesus labo perban mekuah atena nandangi dilaki si sakit e. Tujun kalak e ndarami alasen guna nuduh Jesus.

Pasti iteh Jesus perukuren kalak e. Itehna maka nggo iban kalak e peraturen si kejam kerna kai si la banci ilakoken i bas wari Sabat. (Keluaren 20:​8-​10) Enggo rusur ipandangi kalak dahinna si mehuli. Gundari pasti reh segatna ate kalak nandangi Jesus, perban nina man dilaki si lumpuh tanna ndai, “Cinderken, marilah ku tengah.”​—Markus 3:3.

Ijawap Jesus ahli Undang-Undang Musa ras kalak Parisi, nina, “Adi ndabuh sada biri-biri kena ku bas lubang si mbages i bas wari Sabat, la kin itarik kena ku darat?” (Matius 12:11) Biri-biri ianggap kalak e erta, emaka la mungkin ipediat kalak e biri-biri e i bas lubang seh asa paginna, sebap biri-biri e banci mate janah kalak e rugi. Selain si e, nina Kitap si Badia, “Kalak bujur, ikelengina kap biri-birina.”​—Kuan-kuanen 12:10.

Jenari nina Jesus ka, “Manusia ndauh ergan asangken biri-biri. Emaka banci silakoken kai si mehuli i bas wari Sabat.” (Matius 12:12) Jadi, labo salah adi ipepalem Jesus dilaki e i bas wari Sabat. La banci ilawan peminpin-peminpin agama ranan Jesus, perban ia perkuah ate janah si ikatakenna e masuk akal. Emaka tetap kalak e sinik.

Meteh perukuren kalak e merawa janah sedih akap Jesus jenari itatapna ku sekelilingna. Janah nina, “Pepinter tanndu.” (Matius 12:13) Sanga ipepinter dilaki e tanna, malem me tanna e. Meriah kel ukur dilaki e, tapi uga tanggapen kalak si ndarami kesalahen Jesus?

Kalak Parisi la ermeriah ukur ngidah dilaki si ipepalem e, tapi minter kalak e lawes janah arih-arih kalak e ras “pengikut partai Herodes guna munuh Jesus.” (Markus 3:6) Lit piga-piga anggota partai e arah kelompok agama Saduki. Biasana, kalak Saduki ras kalak Parisi la sicocoken, tapi gundari ersada arih kalak e guna ngelawan Jesus.