Sanga Paskah tahun 32 M nggo ndeher, sibuk Jesus ngajar i Galilea. Jenari, banci saja lawes Jesus ku Jerusalem guna ngerayaken Paskah, bagi si isuruh Undang-Undang Dibata. Amin pe bage, arus Jesus hati-hati perban ibunuh kalak Jahudi atena ia. (Johanes 7:1) Kenca si e, mulih Jesus ku Galilea.

Banci saja Jesus sangana i Kapernaum paksa idahi kalak Parisi ras ahli Undang-Undang Musa ia. Kalak enda reh arah Jerusalem nari. Erkai kalak e reh? Idaram-darami kalak e alasen guna nuduh Jesus. Nungkun kalak e, “Engkai maka ilanggar murid-muridndu adat nini bulangta nai? Contohna, la iburihina tanna ope man.” (Matius 15:2) La pernah isuruh Dibata umatNa ngelakoken adat guna ‘mburihi tan seh ku siku-siku.’ (Markus 7:3) Tapi erdosa akap kalak Parisi murid-murid perban la ngelakoken si e.

La minter ijawap Jesus tuduhen e. Tapi ibuktiken Jesus maka kalak e nge si ngelanggar Undang-Undang Dibata. Nungkun Jesus, “Engkai maka ilanggar kena perentah Dibata erkiteken adat kena? Contohna, nina Dibata, ‘Hamatilah bapakndu ras mamakndu,’ janah, ‘Ise pe si ngisakken bapakna ntah pe mamakna arus ibunuh.’ Tapi ning kena, ‘Ise pe si ngataken man bapak ntah pe mamakna, “Kai pe si lit bas aku si banci erguna man kena eme pemere si ipersembahken man Dibata,” ia lanai perlu nghamati bapakna.’”​—Matius 15:​3-6; Keluaren 20:12; 21:17.

Ikataken kalak Parisi maka sen, barang, ntah kai pe si debanna, si nggo ijadiken “pemere si ipersembahken man Dibata” i bas rumah pertoton, lanai banci ipake guna nampati kalak si deban, aminna pe kerina e lit denga bas tanna. Contohna, sekalak anak banci saja lit senna si banci ipake guna nampati orang tuana si nggo metua ras mesera. Tapi adi ikataken anak e maka sen e “korban” man Dibata ntah man rumah pertoton, sen e lanai banci ipake guna nampati orang tuana. Padahal sen e lit denga bas tan anakna janah banci ipakena man dirina sendiri. Isalahgunakenna undang-undang e guna la ngelakoken tanggung jawap i bas ngurus orang tua.​—Markus 7:​11.

Segat kel ate Jesus perban iubah-ubah kalak Parisi Undang-Undang Dibata. Nina Jesus, “Nggo iban kena kata Dibata lanai meherga erkiteken adat kena. O kalak si munapik, tuhu kel si inubuatken Jesaya kerna kena, ‘Ihamati bangsa enda Aku alu biberna, tapi pusuhna ndauh i bas Aku nari. Sia-sia ia terus nembah Aku, erkiteken si iajarkenna perentah manusia.’” La terjawap kalak Parisi ranan Jesus si meser e. Emaka ipindoken Jesus gelah reh deherna jelma si nterem e, nina, “Begiken janah angkailah enda: Labo kai si masuk ku bas babah sekalak jelma si erbanca ia najis, tapi kai si ndarat arah babahna nari nge si erbanca ia najis.”​—Matius 15:​6-​11; Jesaya 29:13.

Kenca si e, isungkun murid-murid Jesus ia, “La kin itehndu maka kalak Parisi la kel senang megi katandu ena?” Ijawapna, “Kerina sinuan-sinuan si la isuan Bapakku si i surga iruah nge pagi. Pediat saja kalak e. Kalak e penegu-negu si pentang. Adi kalak pentang negu kalak pentang, ndabuh me ia duana ku lubang.”​—Matius 15:​12-​14.

Tempa-tempa mamang ate Jesus sanga Petrus eme si jadi wakil murid-murid, nungkun kerna kai si banci erban sekalak jelma jadi najis. Ijawap Jesus, “La kin iteh kena maka kai pe si masuk ku bas babah nusur ku beltek, kenca si e ipedarat ka? Tapi kai pe si ndarat i bas babah nari rehna i bas pusuh nari, e me si erbanca kalak najis. Contohna, i bas pusuh nari ndarat perukuren si jahat, pembunuhen, erlua-lua, perbahanen seks si salah, nangko, kesaksin si palsu, penghinan. Enda me si erbanca kalak jadi najis, tapi man ope lenga mburihi tan labo erban kalak jadi najis.”​—Matius 15:​17-​20.

Labo isepeleken Jesus kerna kebersihen, ntah pe labo ikatakenna maka sekalak jelma la perlu mburihi tan ope lenga man ntah nikapken pangan. Tapi, ipersingetina peminpin-peminpin agama si munapik perban ipersadana Undang-Undang Dibata si sempurna ras adat manusia. Alu terus terang ikataken Jesus maka si erban kalak jadi najis eme perbahanen jahat si rehna arah pusuh nari.