Ikataken ahli Undang-Undang Musa ras kalak Parisi maka Jesus mpelawes malekat jahat labo alu kuasa Dibata. Alu bage, ihina kalak e kesah si badia. Ise nge si idukung kalak e, Dibata ntah Setan? Nina Jesus, “Adi batang kena mejile, buahna pe mejile janah adi batang kena macik, buahna pe macik. Sebap arah buahna itandai kap batangna.”​—Matius 12:33.

Pasti la masuk akal adi ikataken maka Jesus banci mpelawes malekat jahat perban isampati Setan. Nggo ijelasken Jesus bas Kotbahna i Deleng, adi buahna mejile, batangna pe pasti mejile, labo macik. Buah kalak Parisi eme tuduhenna ngelawan Jesus. E mbuktiken maka kalak e macik. Nina Jesus man kalak e, “O, kesusuren nipe si erbisa, uga ning kena ngataken si mehuli adi kena pe jahat nge? Sebap kai si ibelasken rehna i bas pusuh nari.”​—Matius 7:​16, 17; 12:34.

Payo, rananta ncidahken isi pusuhta janah e pagi si jadi dasar guna ngukum kita. “Emaka i bas Wari Penghakimen pagi, arus ipertanggungjawapken manusia kerina ranan si la erguna si ibelaskenna. Sebap, arah ranan kena me kena ikataken benar, janah arah ranan kena ka kena ikataken ersalah.”​—Matius 12:​36, 37.

Enggo melala mukjizat iban Jesus, tapi ahli Undang-Undang Musa ras kalak Parisi lalap mindo, “O Guru, merincuh kel kami ngidah tanda i bas kam nari.” Amin gia idah kalak e langsung ntah pe lang mukjizat-mukjizat e, nggo nterem kel kalak si jadi saksi ngidah kai si ilakoken Jesus. Jadi nina Jesus man peminpin kalak Jahudi, “O kena kalak si jahat ras la setia, terus ipindo kena tanda, tapi la lit tanda ibereken selain tanda Nabi Juna.”​—Matius 12:​38, 39.

Ijelasken Jesus man kalak e kai ertina, nina, “Telu wari telu berngi dekahna Juna i bas beltek ikan si galang, bage ka me pagi Anak manusia e telu wari telu berngi dekahna i bas beltek taneh enda.” Ibendut ikan si galang Juna tapi dungna iutahkenna, e bali ras ipekeke. Enggo ikataken Jesus maka mate me ia pagi janah i bas wari peteluken ipekeke. Paksa terjadi pagi si e, peminpin-peminpin kalak Jahudi nulak “tanda Nabi Juna” la kalak e nggit ertobat ras berubah. (Matius 27:​63-​66; 28:​12-​15) Kalak e la seri ras “kalak Niniwe” si ertobat kenca ibegina berita si ipeseh Juna. Emaka isalahken kalak Niniwe me kalak si nggeluh bas jaman Jesus. Janah ikataken Jesus ka maka ratu arah Syeba pe isalahkenna kalak e. Sebap merhat ia megi kepentaren Salomo janah iergaina kel. Jenari nina Jesus, “I jenda lit si belinen asangken Salomo.”​—Matius 12:​40-​42.

Ipeseri Jesus kalak e ras dilaki si irasuki malekat jahat. (Matius 12:45) Erkiteken dilaki e la ngukuri kai si mehuli, mulihken me malekat jahat e radu ras pitu malekat jahat si deban si jahaten asa ia, jenari irasuki malekat-malekat e dilaki ndai. Kalak Israel pe nggo ibersihken janah nggo berubah bali bagi dilaki si nggo lanai irasuki malekat jahat ndai. Tapi kalak e reh jahatna perban itulak kalak e nabi-nabi Dibata, janah ilawan kalak e ka Jesus si lit i bas ia kuasa Dibata.

Sanga Jesus ngerana, reh senina-seninana bage pe nandena janah cinder kalak e i pudi jelma si nterem. Nina piga-piga kalak si kundul i deher Jesus, “Nandendu ras senina-seninandu paksana tedis i darat, jumpa atena ras kam.” Jenari ibuktiken Jesus maka rembak kel ia ras murid-muridna bali bagi ras turang, senina, ras nandena sendiri. Nina, “Nandeku ras senina-seninaku eme kalak enda, si megiken kata Dibata ras si ngelakokenca.” (Lukas 8:​20, 21) Situhuna penting nge akapna hubungenna ras keluargana, tapi pentingen akapna hubungenna ras murid-muridna. Meriah kel siakap meteh si e. Banci kita bage rembakna ras turang seninata sada kiniteken. Khususna sanga kalak si deban la tek man banta ntah pe sanga la kalak senang nandangi pendahinta!